އަތޮޅުތަކުގައި ވަޤުފު މަޝްރޫޢު ކުރިއަށްގެންދާ ފުރަތަމަ ރަށަކަށް ހދ.ނެއްލައިދޫ

ސަރުކާރުގެ ވަޤުފް މަޝްރޫޢުގެ ދަށުން އަތޮޅުތެރޭގައި ގާއިމުކުރެވޭ ފުރަތަމަ ވަޤުފް ޢިމާރާތް ހދ.ނެއްލައިދޫގައި ތަރައްޤީކުރުމަށް ސަރުކާރުން ނިންމަވައިފިއެވެ.

މިމަޝްރޫޢުގެ ދަށުން ނެއްލައިދޫގައި މަސްވެރިކަމާ ގުޅޭ މަސައްކަތް ކުރުމަށް ކުއްޔަށް ދޫކުރެވޭނެ 10 އައުޓްލެޓް ޢިމާރާތްކުރުމަށްވަނީ ހަމަޖެހިފައެވެ.

އިސްލާމި ކަންތައްތަކާ ބެހޭ ވުޒާރާގައި ބޭއްވި ރަސްމިއްޔާތެއްގައ ނެެއްލައިދޫގައި ވަޤުފް ޢިމާރާތް ތަރައްޤީކުރުމުގެ އެއްބަސްވުމުގައިވަނީ ސޮއިކުރައްވާފައެވެ. މިއެއްބަސްވުމުގައި އިސްލާމީ ކަންތައްތަކާ ބެހޭ ވުޒާރާގެ ފަރާތުން ސޮއިކުރެއްވީ ވަޒީރު، ޑރ.މުޙައްމަދު ޝަހީމް ޢަލީ ސަޢީދެވެ. ނެއްލައިދޫ ކައުންސިލްގެ ފަރާތުން ސޮއިކުރެއްވީ، ކައުންސިލްގެ ރައީސް މުޙައްމަދު އަލީފެވެ.

މި ރަސްމިއްޔާތުގައި ވާހަކަފުޅު ދައްކަވަމުން އިސްލާމީ ކަންތައްތަކާ ބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު ވިދާޅުވީ، ވަޤުފްގެ މަޝްރޫޢުތައް އިތުރުކޮށް އޭގެ ނަފާ ކަނޑައެޅޭ ދާއިރާތަކަށް ލިބޭގޮތަށް ފުޅާކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މެނިފެސްޓޯގައި ހިމެނޭ ކަމެއްކަމަށެވެ. އެގޮތުން ނެއްލައިދޫ ކައުންސިލާއެކު ވެވުނު އެއްބަސްވުމުގެ ދަށުން އެރަށުގައި ވަޤުފް މަޝްރޫޢެއް ކުރިއަށްގެންގޮސް އޭގެ ނަފާ ދީނީ ކަންކަން ކުރިއެރުވުމަށް ލިބޭނެކަމަށެވެ.

ވަޒީރު ވިދާޅުވީ ރަށްރަށުގައި ވަޤުފް އިމާރާތްތައް އިތުރުކުރުމަކީ ވުޒާރާގެ އަމާޒެއްކަމަށެވެ. އަދި ނެއްލައިދޫގައި މި މަޝްރޫޢު ކުރިއަށް ގެންދިއުމަށް ނިންމެވީ އެވުޒާރާއަށް ލިބުނު ޕްރޮޕޯސަލްތައް ދިރާސާކުރުމަށްފަހު ފެނުނު އެންމެ ރަނގަޅު އެއް ޕްރޮޕޯސަލަކީ ނެއްލައިދޫ ކައުންސިލުން ހުށައަޅާފައިވާ ޕްރޮޕޯސަލަށްވުމުންކަމަށް ވަޒީރު ވިދާޅުވިއެވެ.

ވަޤުފް މަޝްރޫޢުގެ ދަށުން، ހދ.ނެއްލައިދޫގައި ލަނޑާ، ފަރުމަސް އަދި ކަނޑުމަސްވެރިކަމާ ގުޅޭ މަސައްކަތްކުރުމަށް ޢާއްމުންނަށް ކުއްޔަށް ދިނުމަށް 10 އައުޓްލެޓް ޢިމާރާތްކުރުމަށްވަނީ ހަމަޖެހިފައެވެ. މި 10 އައުޓްލެޓް ތަރައްޤީކޮށްގެން ލިބޭ ނަފާއިން ރަށުގެ މިސްކިތްތައް މަރާމާތުކުރުމަށާއި، ދީނީ އަދި އިޖުތިމާޢީ މަސައްކަތްކުރުމަށް މަގުފަހިވެގެންދާނެކަމަށް ނެއްލައިދޫ ކައުންސިލުންވަނީ ފާހަގަކުރައްވާފައެވެ.

ރާއްޖޭގެ މިސްކިތްތަކަށް ކުރަން ޖެހޭ ޚަރަދުތައް ކުރުމަށް އަޢުޤާފް ޕްރޮޕަޓީސްތައް ރާއްޖޭގައި ޤާއިމްކުރުމަށް ސަރުކާރުން ގެންދަވަނީ މަސައްކަތް ކުރައްވަމުންނެވެ. އައުޤާފްގެ ނިޒާމަކީ އިސްލާމީ އިޤްތީޞާދީ ނިޒާމްގެ މުހިންމު އަސާސެއްކަމަށް އިސްލާމީ ކަންތައްތަކާ ބެހޭ ވުޒާރާއިން ވިދާޅުވެއެވެ. އެގޮތުން ވަޤުފްގެ ޢިމާރާތް ތަރައްޤީކުރުމަށް ހުޅުވާލި ފުރުސަތުގައި 14 ރަށު ކައުންސިލާއި، 10 އަތޮޅު އަދި ސިޓީ ކައުންސިލުން ޕްރޮޕޯސަލް ހުށައަޅާފައިވާކަމަށް އިސްލާމީ ކަންތައްތަކާ ބެހޭ ވުޒާރާއިން ވިދާޅުވެއެވެ.