މިއަދުން ފެށިގެން ވޭޕްގެ އެއްވެސް ބާވަތެއް ރާއްޖެ އެތެރެކުރުން މަނާ!

މިއަދުން ފެށިގެން ވޭޕްގެ އެއްވެސް ބާވަތެއް ރާއްޖެ އެތެރެކުރުން މަނާކޮށްފިއެވެ. މިގޮތަށް އަމަލުކުރަން ފަށާފައިމިވަނީ ދުންފަތް ކޮންޓްރޯލް ކުރުމާބެހޭ ޤާނޫނަށް ގެނައި އިސްލާހު ރައީސުލްޖުމްހޫރިއްޔާ ތަޞްދީޤުކުރައްވުމާއި ގުޅިގެންނެވެ.

ރާއްޖޭގައި ދުންފަތް ކޮންޓްރޯލް ކުރުމަށް ސަރުކާރުން އަޅަން ނިންމާފައިވާ ފިޔަވަޅުތަކަށް އެކި މަރުހަލާތަކަށް ބަހާލައިގެން އަމަލުކުރެއްވުމަށް ޤާނޫނުތަކަށް ވަނީ އިސްލާހު ގެނެސްފައެވެ. އެގޮތުން، މި މަހުގެ ފުރަތަމަ ދުވަހުން ފެށިގެން ރާއްޖެއަށް އެތެރެކުރާ ދުންފަތުގެ ބާވަތްތަކުން ނަގާ އިމްޕޯޓް ޑިއުޓީ ވަނީ ބޮޑުކޮށްފައެވެ.

ދުންފަތް ކޮންޓްރޯލް ކުރުމާބެހޭ ޤާނޫނަށް ގެނައި އިސްލާހުގައި ވާގޮތުން އެ ޤާނޫނުގެ 2 ވަނަ މާއްދާއިން 10ވަނަ މާއްދާއާ ހަމައަށް އަމަލުކުރަން ފަށާނީ އަންނަ މަހުގެ 15ވަނަ ދުވަހުން ފެށިގެންނެވެ. އެހެން މާއްދާތަކަށް މި މަހުގެ 15އިން ފެށިގެން އަމަލުކުރަންޖެހޭނެކަމަށް ބަޔާންކޮށްފައިވާއިރު މިއަދުން ފެށިގެން ރާއްޖެއަށް ވޭޕާއި އީ-ސިނގިރޭޓް އަދި އެފަދަ ތަކެއްޗަށް ބޭނުންވާ ފްލޭވަރ ފަދަ ތަކެތި އެތެރެކުރުން މިވަނީ މަނާވެފައެވެ. މި ޤާނޫނާ ޚިލާފަށް މިއަދުން ފެށިގެން އެފަދަ އެއްވެސް އެއްޗެއް ރާއްޖެއަށް އެތެރެކޮށްފިނަމަ ފިޔަވަޅު އަޅާނެއެވެ.

އެގޮތުން، ރާއްޖެއަށް ވޭޕްގެ ބާވަތްތަކާއި އެއާއެކު ބޭނުންކުރުމަށް ތައްޔާރުކޮށްފައި ހުންނަ ބާވަތްތައް އެތެރެކޮށްފިނަމަ އެފަރާތެއް 50،000 ރުފިޔާއިން ޖޫރިމަނާ ކުރެވޭނެއެވެ. އަދި އެތެރެކުރާ ކޮންމެ އިލެކްޓްރޯނިކް ސިނގިރޭޓް ނުވަތަ ވޭޕަކަށް 10،000 ރުފިޔާގެ މަގުން ޖޫރިމަނާ ކުރެވޭނެއެވެ.

މީގެ އިތުރުން، ދައުލަތުގެ އެންމެހައި އިދާރާތައް ހިންގާ އިމާރާތްތަކާއި އެ ތަންތަނުގެ ގޯތިތެރޭގައި ދުންފަތުގެ އިސްތިޢުމާލުކުރުން މިހާރު މަނާވާނެއެވެ. އަދި ވިޔަފާރިއެއް ނުވަތަ ޚިދުމަތެއް ފޯރުކޮށްދޭ ތަންތަނުގައި ހުއްދަ ނުނަގައި ނުވަތަ ހުއްދައާ ޚިލާފުވާގޮތަށް ދުންފަތުގެ އިސްތިޢުމާލުކޮށްފިނަމަ، އެކަން ކުރި ފަރާތާއި، އެ ތަނެއްގެ ވެރިފަރާތް ނުވަތަ އެ ތަނެއް ހިންގާ ފަރާތް ޖޫރިމަނާކުރުމާއި، އެ ތަނެއްގައި ދުންފަތުގެ އިސްތިޢުމާލުކުރުމަށް ދޫކޮށްފައިވާ ހުއްދަ ބާޠިލުކޮށް، އެ ތަނަކަށް ދޫކޮށްފައިވާ ވިޔަފާރިކުރުމުގެ ހުއްދަ ވަގުތީގޮތުން ހިފެހެއްޓުމުގެ ބާރު ވަނީ ދީފައެވެ.

ވޭޕުގެ ބާވަތްތައް މިއަދުން ފެށިގެން ރާއްޖެ އެތެރެކުރުން މަނާކޮށްފައިވާއިރު ދެވަނަ މަރުހަލާގެ ދަށުން އަންނަ މަހުގެ 15 ވަނަ ދުވަހުން ފެށިގެން ވޭޕް ބޭނުންކުރުމާއި ވިއްކުމާއި ހިލޭ ބެހުންވެސް މަނާވާނެއެވެ. އަދި މި ތާރީޚުން ފެށިގެން ރާއްޖޭގައި ހުއްދަ ލިބިގެން ވިއްކާ ދުންފަތުގެ އެއްވެސް ބާވަތެއް ގަނެ ވިއްކޭނީ 21 އަހަރުން މަތީގެ މީހުންނަށެވެ. މިހާރު 18 އަހަރުން މަތީގެ ކޮންމެ މީހަކަށްވެސް ދުންފަތުގެ ބާވަތްތައް ގަނެވިއްކެއެވެ.

ވޭޕްކުރަން ބޭނުންކުރާ އެއްވެސް ބާވަތެއްގެ އާލާތެއް ރާއްޖޭގައި ވިއްކައިފިނަމަ އަންނަ މަހުގެ 15ން ފެށިގެން އެ ފަރާތެއް 20،000 ރުފިޔާއިން ޖޫރިމަނާކުރުމާއެކު ކޮންމެ އެއްޗަކަށް 10،000 ރުފިޔާގެ މަގުން ޖޫރިމަނާކުރެވޭނެއެވެ. އަދި އެފަދަ އެއްޗެއް ހިލޭ ބަހައިފިނަމަ އެކަން ކުރި މީހަކު 10،000 ރުފިޔާއިން ޖޫރިމަނާކުރާނެއެވެ.

މީގެ އިތުރުން ވޭޕް ކުރުމަށް ބޭނުންކުރާ އެއްވެސް އާލާތެއް ކުޑަކުއްޖަކަށް ވިއްކައިފިނަމަ ނުވަތަ ހިލޭ ދީފިނަމަ އެފަދަ އާލާތްތައް ވިއްކުމުންނާއި ހިލޭ ބެހުމުން ކުރާ ޖޫރިމަނާގެ އިތުރަށް 50،000 ރުފިޔާގެ ޖޫރިމަނާއެއް ކުރާނެކަމަށްވެސް މިހާރު އަމަލުކުރަން ފަށާފައިވާ އިސްލާހުގައި ވަނީ ބަޔާންކޮށްފައެވެ.

ދުންފަތް ކޮންޓްރޯލުކުރުމާބެހޭ ޤާނޫނަށް ގެނައި އިޞްލާޙުގައިވާގޮތުން ދުންފަތުގެ އެއްވެސް ބާވަތެއް އެ ވިއްކާ ފަރާތަކުން އިސްތިހާރުކުރުމާއި، ޤާނޫނާ ޚިލާފަށް ދުންފަތުގެ ބާވަތްތައް އިސްތިހާރުކުރުމާއި، ސްޕޮންސަރކުރުމާއި، ޕްރޮމޯޓުކުރުންވެސް މަނާވާނެއެވެ. އަދި ދުންފަތުގެ ބާވަތްތައް ވިއްކާ ތަނެއްގައި ދުންފަތުގެ އެއްވެސް ބާވަތެއް ނުވަތަ ދުންފަތުގެ ބާވަތެއް އެކުލެވޭ ފޮށި ނުވަތަ ކާޓަން ނުވަތަ އެނޫންވެސް އެފަދަ ތަކެތި ބަންދުކޮށްފައި ހުންނަ އެއްޗެއް، އާންމުންނަށް ފެންނާނޭހެން ބެހެއްޓުމާއި، އެފަދަ އެއްޗެއް އާންމުންނަށް ފެންނާނޭހެން އެއް ތަނުން އަނެއް ތަނަށް އުފުލުމާއި، އެގޮތަށް މުދާ ބަހައްޓައިފި ނަމަ ނުވަތަ އުފުލައިފި ނަމަ، އެއީ އިސްތިހާރުކުރުން ކަމުގައި ބެލެވޭނެއެވެ.