ޔުއެފާ ނޭޝަންސް ލީގުގައި ރޭ އިސްރާއީލާ ދެކޮޅަށް ފްރާންސް ކުޅުނު މެޗު ލަނޑެއް ނުޖެހި އެއްވަރުވި ނަމަވެސް މުބާރާތުގެ ކުއާޓާ ފައިނަލުގެ ޖާގައެއް ފްރާންސް އިން ހޯދައިފި އެވެ.
ޕެރިހުގެ ސްޓޭޑްޑި ފްރާންސްގައި ސަލާމަތީ ފިޔަވަޅުތައް ވަރަށް ވަރުގަދަ ކޮށްގެން ކުޅެފައިވާ މި މެޗު އެއްވަރު ވެފައިވާއިރު ފްރާންސަށް ވަނީ ގްރޫޕް ދޭއްގެ ދެވަނަ މަގާމު ލިބިފަ އެވެ. މި ގްރޫޕުން އިޓަލީ އާއި ފްރާންސަށް ކުއާޓާ ފައިނަލުގެ ޖާގަ ކަށަވަރު ވެފައިވަނީ ދެން ހިމެނޭ ބްލްޖިއަމް އާއި އިސްރާއީލަށް ކުރިއަށް އޮތް މެޗުން މޮޅުވިނަމަވެސް ޕޮއިންޓް ތާވަލަށް އަންނާނެ ބަދަލެއް ނެތުމުގެ ސަބަބުންނެވެ.
މި މެޗަށް ފްރާންސް އިން ތައްޔާރުވަމުންދިޔައިރު މިދިޔަ ހަފްތާގައި ޔޫރޮޕާ ލީގުގައި އިސްރާއީލުގެ މެކަބީ ތެލް އަވީވް ނެދަލަންޑްސް ގައި ކުޅުނު މެޗުގައި ހިނގާދިޔަ ހަމަނުޖެހުންތަކާއި ގުޅިގެން ފަސް މީހަކަށް އަނިޔާވެފައިވާއިރު އިސްރާއީލާއި ފަލަސްތީނާ ދެމެދު މިހާރު ހިނގަމުންދާ ހަނގުރާމައާއި ދެކޮޅަށް ގިނަ ބަޔަކު ވަނީ ޕެރިހުގެ މަގުތަކުގައި މުޒާހަރާކޮށްފަ އެވެ. އަދި މި މެޗު ނުކުޅެ ބޮއިކޮޓް ކުރުމަށްވެސް ފްރާންސަށް ގިނަ ބަޔަކު ވަނީ ގޮވާލާފަ އެވެ.
މި މެޗު ކުރިއަށް ދިޔައިރު ފަލަސްތީނަށް ތާއިދު ކުރާ ފަރާތްތަކުން ވަނީ އެ ގައުމުގެ ދިދަ ދަނޑުތެރޭގައި ވިހުރުވާލާފަ އެވެ.
ފްރާންސްގެ އެންމެ މަޝްހޫރު އެއް ސްޓޭޑިއަމްގައި އެ ގައުމުން މެޗެއް ކުޅުނުއިރު އެންމެ މަދު އަދަދަކަށް ސަޕޯޓަރުން ވަދެފައިވަނީ މި މެޗުގަ އެވެ. މި މެޗު ބެލުމަށް ޖުމްލަ ވަދެފައިވަނީ 16611 މީހުންނެވެ.
މި މެޗަށް ނެގި ފްރާންސްގެ ސްކޮޑުން ފޯވަޑް ކިލިއަން އެމްބާޕޭ އަށް ފުރުސަތު ދީފައިނުވާއިރު އަނިޔާގެ ސަބަބުން އެ ޓީމުގެ ފޯވަޑް އުސްމާން ޑެމްބެލޭ ވެސް ވަނީ ބާކީކޮށްފަ އެވެ. އެހެންކަމުން އިސްރާއީލާއި ދެކޮޅަށް ކުޅުނު މި މެޗުގައި ފްރާންސްގެ ފޯވަޑް ލައިން ފެނުނީ އާދައިގެ ގޮތަކަށެވެ.
މި މެޗުގައި ފްރާންސްގެ ކްރިސްޓޮފާ އެންކުންކޫ އާއި މާކަސް ތުރާމް އަށް ވަނީ ލަނޑު ޖަހަން ރަގަޅު ފުރުސަތުތަކެއް ލިބިފަ އެވެ.