ލޯބިވެރިޔާއަށް ބިރުދައްކައި، ބްލެކްމެއިލް ކުރިކަމުގެ ތުހުމަތުގައި ފުލުހަކު ހައްޔަރުކޮށްފި

ލޯބިވެރިޔާއަށް ބިރުދައްކައި ބްލެކްމެއިލް ކުރިކަމުގެ ތުހުމަތުގައި ފުލުހަކު ހައްޔަރުކޮށްފިއެވެ.

ދިވެހި ފުލުހުންގެ ޚިދުމަތުން ވިދާޅުވީ މި މައްސަލައިގައި ހައްޔަރުކޮށްފައިވަނީ އއ. މަތިވެރި ޕޮލިސް ސްޓޭޝަންގައި މަސައްކަތް ކުރާ އެ ރަށުގެ ފަޒާ، އުމުރުން 19 އަހަރުގެ ޒައިދާން މުޙައްމަދު ކަމަށެވެ. އޭނާ އަކީ ރެކްރޫޓް ފުލުހެއް ކަމަށް ފުލުހުން ވިދާޅުވިއެވެ.

ފުލުހުން ވިދާޅުވީ، ޒައިދާން އޭނާގެ ލޯބިވެރިޔާގެ އޮރިޔާން މަންޒަރު ފެންނަ ފޮޓޯ އަދި ވީޑިއޯ ސޯޝަލް މީޑިއާގައި ލީކުކޮށްލާނެ ކަމަށްބުނެ ބިރުދައްކައި ބްލެކްމެއިލް ކުރިކަމަށް ތުހުމަތު ކުރެވޭ ކަމަށެވެ. މި މައްސަލައިގައި އިއްޔެ އޭނާ ހައްޔަރުކޮށްފައިވަނީ ކޯޓު އަމުރެއްގެ ދަށުން ކަމަށް ފުލުހުން ވިދާޅުވިއެވެ.

މި މައްސަލައާ ގުޅިގެން ޒައިދާންގެ ބަންދާމެދު ގޮތެއް ނިންމުމަށް މަތިވެރި މެޖިސްޓްރޭޓް ކޯޓަށް ހާޒިރުކުރުމުން ތިން ދުވަހަށް ބަންދުކުރުމަށް ނިންމާފައިވާ ކަމަށް ފުލުހުން ވިދާޅުވެއެވެ.

މި މައްސަލަ ފުލުހުން ދަނީ އިތުރަށް ތަހުގީގުކުރަމުންނެވެ.