ސަރުކާރުގެ އަމާޒަކީ ދުރާލާ އިންޒާރުދޭ ނިޒާމުތައް ޤާއިމުކޮށް، ހުރިހާ ރައްޔިތުންގެ ރައްކާތެރިކަން ޔަގީންކުރުން: ރައީސުލްޖުމްހޫރިއްޔާ

ކާރިޘާތަކުން ރައްކާތެރިވުމަށްޓަކައި ދުރާލާ އިންޒާރުދޭ ނިޒާމުތައް ޤާއިމުކޮށް، ރާއްޖޭގެ ހުރިހާ ކަންކޮޅެއްގައި އުޅޭ ހުރިހާ ރައްޔިތުންގެ ރައްކާތެރިކަން ކަށަވަރުކުރުމަށް ސަރުކާރުން ވަރަށް ބޮޑު އިސްކަމެއް ދެއްވާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ އަޒަރުބައިޖާނުގައި މިހާރު ކުރިއަށްދާ ކޮޕް ސަމިޓުގެ ތެރެއިން ބޭއްވި ޕެނަލް ޑިސްކަޝަނެއްގައި ވާހަކަފުޅު ދައްކަވަމުންނެވެ.

ކާރިޘާތަކުން ރައްކާތެރިވުމަށްޓަކައި ދުރާލާ އިންޒާރުދޭ ނިޒާމުތަކާއި ދުނިޔެ ހޫނުވުމާއި ގުޅޭގޮތުން ބޭއްވި ބައްދަލުވުމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ ރާއްޖެއަށް އެތައް ގޮތަކުން ބޮޑެތި ގެއްލުންތަކެއް ލިބުނު ސުނާމީ ކާރިސާއިން ގިނަ ފިލާވަޅުތަކެއް ލިބިގެންދިޔަކަމަށެވެ. އެގޮތުން ދުރާލާ ލިބޭ އިންޒާރުތަކާއި ތައްޔާރީ ހާލަތުގައި ތިބުމަކީ ގިނަ ބައެއްގެ ފުރާނަ ސަލާމަތްކޮށް، ގެއްލުން ކުޑަކުރެވޭނެ ކަމެއްކަމަށް ރައީސުލްޖުމްހޫރިއްޔާ ފާހަގަކުރެއްވިއެވެ.

ރައީސުލްޖުމްހޫރިއްޔާ ވިދާޅުވީ މޫސުމީ ނުރައްކާތަކުން ސަލާމަތްވުމަށް އެމަނިކުފާނު ވެރިކަމާއި ހަވާލުވުމަށްފަހު ރެޒިލިއަންސް އެޖެންޑާއެއް ތައާރަފްކޮށްފައިވާކަމަށާއި، ރާއްޖެއަކީ މިފަދަ ސްޓްރެޓީޖިކް ރޯޑްމެޕެއް އެކަށައެޅި ފުރަތަަމަ ޤައުމުކަމަށެވެ. އަދި ސަރުކާރުން އެކަށައަޅާ 20 އަހަރުގެ ތަރައްޤީގެ ޕްލޭންގައި ކްލައިމެޓް ރެޒިލިއަންސް، ޑިސާސްޓަރ ޕްރިޕޭއާޑްނަސް އަދި އާލީ ވާނިން ސިސްޓަމްތަކަށް އިސްކަންދީފައިވާނެކަމަށާއި މިއީ މުސްތަޤްބަލް ރައްކާތެރިކުރުމަށް އަޅާ މުހިއްމު ފިޔަވަޅެއްކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.

"ކާރިސާތަކުން ރައްކާތެރިވުމަށްޓަކައި ދުރާލާ އިންޒާރުދޭ ނިޒާމުތައް ޤާއިމުކޮށް، ރާއްޖޭގެ ހުރިހާ ސަރަހައްދެއްގައި އުޅޭ މީހުންގެ ރައްކާތެރިކަން ކަށަވަރުކޮށްދިނުމަށް ސަރުކާރުން ވަރަށް ބޮޑު އިސްކަމެއްދެއްވާ" ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ ކާރިޘާތަކުން ރައްކާތެރިވުމަށްޓަކައި ދުރާލާ އިންޒާރުދޭ ނިޒާމްތަކަކީ ދިރިއުޅުމަށް ކުރާ މަސައްކަތަށް ކުރެވޭ ބޮޑު އިންވެސްޓްމަންޓެއްކަމަށާއި، މިއީ އިޤްތިޞާދީގޮތުން ކޮންމެހެންވެސް ކުރަންޖެހޭ ކަމެއްކަމަށެވެ. އަދި މި މަސައްކަތުގައި ރާއްޖެއިން ކުރިއެރުންތަކެއް ހޯދާފައިވާއިރު، އެ މަސައްކަތް ކާމިޔާބުކުރުމަށް އިތުރު ވަސީލަތްތަކާއި އެހީތެރިކަން ބޭނުންވާކަންވެސް ރައީސުލްޖުމްހޫރިއްޔާ ފާހަގަކުރެއްވިއެވެ. އެހެންކަމުން މިކަމުގައި ބައިނަލްއަޤްވާމީ އެހީތެރިކަމާއި އެއްބާރުލުން ބޭނުންވާކަމަށާއި ހާއްސަކޮށް މެރިން ފޯކާސްޓިންގ އެންޑް އޮބްޒަވޭޝަން އަދި އާލީ ވާނިން ކެޕެބަލިޓީ ތަރައްޤީކުރުމުގައި އެހީތެރިކަން ބޭނުންވާކަން ރައީސުލްޖުމްހޫރިއްޔާ ފާހަގަކުރެއްވިއެވެ.