ބަޖެޓުގެ ތާށިކަމާއެކުވެސް 38 މަޝްރޫޢު ނިންމައިފި، އަހަރު ނިމުމުގެ ކުރިން އިތުރު 26 މަޝްރޫޢު ނިންމާނެ

ތަރައްޤީއަށް ހިންގި މަޝްރޫއުތަކުގެ ތެރެއިން މިއަހަރުގެ މިހާތަނަށް 38 މަޝްރޫޢުގެ މަސައްކަތް ނިމިފައިވާކަމަށާއި، މިއަހަރު ނިމުމުގެ ކުރިން އިތުރު 26 މަޝްރޫޢުގެ މަސައްކަތް ނިމޭނެކަމަށް ޢިމާރާތްކުރުމާއި ބިނާރާބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ. ވަޒީރު މިހެން ވިދާޅުވީ އަންނަ އަހަރަށް ލަފާކުރާ ބަޖެޓާ ގުޅޭގޮތުން ވާހަކަފުޅު ދައްކަވަމުންނެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގުރާމްގައި ވާހަކަފުޅުދައްކަވަމުން ޢިމާރާތްކުރުމާއި ބިނާރާބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވީ މަޝްރޫޢުތައް ކުރިއަށް ގެންދިއުމަށް މިއަހަރު އެންމެ ބޮޑަށް ދަތިވީ، މަޝްރޫއުތައް ނުހިންގޭނެ ކުޑަ ޢަދަދުތަކުން ބަޖެޓުގައި ފައިސާ ހިމަނާފައި ހުރުމުންކަމަށެވެ. ނަމަވެސް ވަކި ތަރުތީބަކުން މަޝްރޫޢުތައް ނިންމަމުން އަންނަކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ މިދިޔަ ސަރުކާރުގައި ބައެއް މަޝްރޫޢުތައް ހިންގުމަށް ބައެއް ރަށްރަށަށް ދެތިން މީހަކު ގެންގޮސްގެން މަޝްރޫޢުތައް ފަށާފައި އެބަހުރި ކަމަށެވެ. ވުމާއެކު މަޝްރޫއުތައ ްކުރިއަށްނުގޮސް ވަރަށް ބޮޑަށް މަޑުޖެހިފައި އެބަހުރިކަމަށެވެ. އެހެންކަމުން މިސަރުކާރުން މަޝްރޫޢުތައް އަވަހަށް ނިންމޭނެ ގޮތަށް މަޝްރޫޢުތަކުގެ މަސައްކަތްތައް ތަރުތީބުވެފައިވާކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ މަޝްރޫޢުގެ މަސައްކަތްތައް އަވަސްކުރަން ކުރެވުނު މަސައްކަތްތަކާއެކު މިއަހަރުގެ މިހާތަނަށް 38 މަޝްރޫޢުގެ މަސައްކަތް ނިމިފައިވާ ކަމަށެވެ. އަދި މިއަހަރު ނިމުމުގެ ކުރިން އިތުރު 26 މަޝްރޫޢެއްގެ މަސައްކަތް ނިމޭނެކަމަށްވެސް ވަޒީރު ވިދާޅުވިއެވެ.

"މިސާލަކަށް ފެނާއި ނަރުދަމާގެ މަސައްކަތަކީ ރައްޔިތުންނަށް ލިބެންޖެހޭ އަސާސީ ޚިދުމަތެއް ޤާއިމްކުރުމުގެ މަސައްކަތް. އެ މަސައްކަތްތައް އެބަހުރި ހުއްޓިފައި، ނުކުރެވިފައި. އެހެންވެ އެ މަޝްރޫޢުތައް މިހާރު ވަނީ ފެނަކައިގެ ދަށުން ނަގައި އެމްޑަބްލިޔުއެސްސީއާ ހަވާލުކޮށްފައި. އަޅުގަނޑުމެންގެ އަމާޒަކީ މިއަހަރަށް ކަނޑައެޅިފައި އޮތް ބަޖެޓުން އެއްވެސް މަޝްރޫޢެއް ނުހުއްޓި ކުރިއަށްގެންގޮސް، ވީހާވެސް އަވަހަކަށް ނިންމުން." ވަޒީރު ވިދާޅުވިއެވެ.

ޢިމާރާތްކުރުމާއި ބިނާރާބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވީ އަންނަ އަހަރަށް ދައުލަތުން ކަނޑައަޅާފައިވާ ބަޖެޓުން ބޯހިޔާވަހިކަމަށް ޚާއްސަ އިސްކަމެއްދީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަޢުދުވެވަޑައިގެންފައިވާ ގިނަ މަޝްރޫޢުތަކެއް ބަޖެޓު ތަންދޭ މިންވަރަކުން ކުރިއަށްގެންދެވޭނެ ކަމަށެވެ.

އަންނަ އަހަރުގެ ބަޖެޓުގައި ޕަބްލިކް ސެކްޓަރ އިންވެސްޓްމަންޓް ޕްރޮގްރާމް، ޕީއެސްއައިޕީގެ ދަށުން ކުރިއަށް ގެންދިޔުމަށް ހަމަޖެހިފައިވާ 695 މަޝްރޫޢުއަކަށް 12.4 ބިލިޔަން ރުފިޔާ ބަޖެޓުގައި ހިމަނައިފައިވެއެވެ. މީގެ ތެރޭގައި މިހާރު ހިނގަމުންދާ 396 މަޝްރޫޢުއަކަށް 7.6 ބިލިޔަން ރުފިޔާ ކަނޑައަޅާފައިވާއިރު، މީގެ ކުރިން ބަޖެޓުގައި ހިމަނާފައި އޮތްނަމަވެސް އަމަލީ މަސައްކަތްތައް ފަށާފައިވާނުވާ 62 މަޝްރޫޢުއަކަށް 1.6 ބިލިޔަން ބަޖެޓުގައި ހިމަނާފައިވެއެވެ.