މިއަދުން ފެށިގެން މިމަހުގެ ނިޔަލަށް ކްރިމިނަލް ކޯޓް ރިސެސްއަށް ދިއުމަށް އެކޯޓުން ނިންމަވައިފިއެވެ.
އެހެންކަމުން މިއަދުން ފެށިގެން މިމަހުގެ ނިޔަލަށް ކްރިމިނަލް ކޯޓްގެ ޝަރީޢަތްތައް އާންމުކޮށް ކުރިއަށްގެންދަވާ ވަރަށްވުރެ މަދުން ކުރިއަށްގެންދެވި ނަމަވެސް އެކޯޓުން ކުރިއަށްގެންދަވާ އެހެނިހެން މަސައްކަތްތައް ކުރިއެކޭ އެއްގޮތަށް ކުރިއަށްގެންދަވާނެކަމަށް ކްރިމިނަލް ކޯޓުން މަޢުލޫމާތުދެއްވައެވެ.އެގޮތުން ބަންދަށް މުއްދަތު ދެއްވުމާއި މައްސަލަތައް ބައްލަވައިގެންނެވުމާއި، އިދާރީ މަސައްކަތްތައް ކުރިއަށްގެންދަވާނެކަމަށް އެކޯޓުން މަޢުލޫމާތުދެއްވައެވެ.
ކްރިމިނަލް ކޯޓުގެ ޤާޟީންގެ މަޖިލީހުން ނިންމަވާފައިވަނީ މިއަހަރުގެ ރިސެސްގެ މުއްދަތު ދެބަޔަށް ބައްސަވާލައްވައިގެން ކުރިއަށްގެންދެވުމަށެވެ. އެގޮތުން ފުރަތަމަ ރިސެސްއަށް ދާން ނިންމަވާފައިވަނީ މިއަދުން ފެށިގެން މިމަހުގެ 30 ވަނަ ދުވަހުގެ ނިޔަލަށެވެ. އަދި ދެވަނަ ރިސެސްއަށް ދާން ނިންމަވާފައިވަނީ ޑިސެމްބަރު 1 އިން 15 ވަނަ ދުވަހުގެ ނިޔަލަށެވެ.
އާންމު ގޮތެއްގައި ކްރިމިނަލް ކޯޓް ރިސެސްއަށް ދަނީ މި ތާރީޚުތަކުގައި އެހެން ނަމަވެސް ވޭތުވެދިޔައަހަރު ސުޕްރީމް ކޯޓުން ކޯޓްތައް ރިސެސްއަށް ނުދިއުމަށް އެންގެވުމާ ގުޅިގެން މިދިޔައަހަރުގެ ޑިސެމްބަރުމަހު ކްރިމިނަލް ކޯޓްވެސް ރިސެސްއަށް ގޮސްފައެއް ނުވެއެވެ.