މި މަހުގެ 15އިން ފެށިގެން ވޭޕް މަނާކުރުމަށް ހުށަހެޅި އިސްލާހު މަޖިލީހުން ފާސްކޮށްފި

މި މަހުގެ 15ވަނަ ދުވަހުން ފެށިގެން ރާއްޖޭގައި ވޭޕް މަނާކުރާގޮތަށް ދުންފަތް ކޮންޓްރޯލް ކުރުމާބެހޭ ޤާނޫނަށް ހުށަހެޅި އިސްލާހު ރައްޔިތުންގެ މަޖިލީހުން ފާސްކޮށްފިއެވެ.

ރާއްޖޭގައި ދުންފަތް ކޮންޓްރޯލް ކުރުމަށް ސަރުކާރުން އަންނަނީ ހަރުކަށި ފިޔަވަޅުތަކެއް އަޅުއްވަމުންނެވެ. އެގޮތުން ޤާނޫނަށް އިސްލާހު ގެނެސް މި މަހުން ފެށިގެން ދުންފަތުގެ ބާވަތްތަކުން ނަގާ އިމްޕޯޓް ޑިއުޓީވެސް މިހާރު ވަނީ ބޮޑުކޮށްފައެވެ.

ރާއްޖޭގައި ވޭޕް މަނާކުރުމަށް ސަރުކާރުގެ ފަރާތުން ދުންފަތް ކޮންޓްރޯލް ކުރުމާބެހޭ ޤާނޫނަށް ހުށަހެޅި އިސްލާހު މަޖިލީހުން ފާސްކޮށްފައިވަނީ 54 މެންބަރުންގެ ވޯޓުންނެވެ. މަޖިލީހުން ފާސްކުރި އިސްލާހުގައިވާގޮތުން އީ-ސިނގިރޭޓްފަދަ ވޭޕްކުރަން ބޭނުންވާ އާލާތްތައް ރާއްޖެ އެތެރެކުރުމާއި ވިއްކުމާއި ހިލޭ ބެހުމާއި ބޭނުންކުރުން މަނާވާނެއެވެ. އަދި އެފަދަ ތަކެތި ރާއްޖެއަށް އެތެރެކޮށްފިނަމަ 50،000 ރުފިޔާއިން ޖޫރިމަނާކުރުމާއެކު އެތެރެކުރާ ކޮންމެ އެއްޗަކަށް 10،000 ރުފިޔާގެ މަގުން ޖޫރިމަނާކުރާނެކަމަށް އިޞްލާހުގައިވެއެވެ.

ވޭޕްކުރަން ބޭނުންކުރާ އެއްވެސް ބާވަތެއްގެ އާލާތެއް ރާއްޖޭގައި ވިއްކައިފިނަމަ އެ ފަރާތެއް 20،000 ރުފިޔާއިން ޖޫރިމަނާކުރުމާއެކު ކޮންމެ އެއްޗަކަށް 10،000 ރުފިޔާގެ މަގުން ޖޫރިމަނާކުރަން ބިލުގައި ހިމަނުއްވާފައިވެއެވެ. އަދި އެފަދަ އާލާތެއް ހިލޭ ބަހައިފިނަމަ އެ އަމަލެއް ކުރި މީހަކު 10،000 ރުފިޔާއިން ޖޫރިމަނާ ކުރާނެއެވެ. އަދި ވޭޕުގެ އެއްވެސް ބާވަތެއް ބޭނުންކޮށްފި މީހަކު 5،000 ރުފިޔާއިން ޖޫރިމަނާކުރުމަށްވެސް ދުންފަތް ކޮންޓްރޯލް ކުރުމާބެހޭ ޤާނޫނަށް ގެންނެވި އިސްލާހުގައި ވަނީ ބަޔާންކުރައްވާފައެވެ.

މީގެ އިތުރުން ވޭޕް ކުރުމަށް ބޭނުންކުރާ އެއްވެސް އާލާތެއް ކުޑަކުއްޖަކަށް ވިއްކައިފިނަމަ ނުވަތަ ހިލޭ ދީފިނަމަ އެފަދަ އާލާތްތައް ވިއްކުމުންނާއި ހިލޭ ބެހުމުން ކުރާ ޖޫރިމަނާގެ އިތުރަށް 50،000 ރުފިޔާގެ ޖޫރިމަނާއެއް ކުރާނެކަމަށްވެސް މަޖިލީހުން ފާސްކުރި އިޞްލާހުގައިވެއެވެ.

ދުންފަތުގެ ބާވަތްތައް 21 އަހަރުން ދަށުގެ އެއްވެސް މީހަކަށް ވިއްކުމާއި އެފަދަ އުފެއްދުމެއް ވިއްކުމުގައި ބައިވެރިކުރުވުންވެސް މި އިސްލާހުގެ ދަށުން މަނާވާނެއެވެ. އަދި އެކަން އެނގޭގޮތަށް އެފަދަ ތަކެތި ވިއްކާ ތަންތަނުގައި އިންޒާރު ހަރުކުރަންވެސް މި އިސްލާހުގައިވަނީ ހިމަނުއްވާފައެވެ. މިހާރު ދުންފަތުގެ އުފެއްދުންތައް ވިއްކޭނެ އެންމެ ހަގު އުމުރަކީ 18 އަހަރެވެ.

މި އިސްލާހުގެ ދަށުން ދުންފަތުގެ ބާވަތްތައް ރާއްޖޭގައި އިޝްތިހާރުކުރުމާއި އެތަކެތި އާންމުންނަށް ފެންނާނެހެން ބެހެއްޓުމާއި އާންމުންނަށް ފެންނާނެހެން އެއްތަނުން އަނެއްތަނަށް އުފުލުންވެސް މަނާވާނެއެވެ. އަދި ރާއްޖޭގައި ދުންފަތް އުފެއްދުމާއި ދުންފަތުގެ އެއްވެސް ބާވަތެއް އުފެއްދުންވެސް މަނާވާނެއެވެ.

ދުންފަތުގެ ބާވަތްތައް އެތެރެކޮށް، ބޭރުކުރާ އަދި ގަނޑުކޮށްނާއި ވަކިވަކިން ވިއްކާ ކޮންމެ ފަރާތެއްވެސް އެކަމަށް ޚާއްސަ ލައިސަންސް ނަގަން ޖެހޭގޮތަށް ޤާނޫނަށް ގެންނެވި އިސްލާހުގައި ވަނީ ބަޔާންކޮށްފައެވެ. މި ލައިސަންސް ހަމައެކަނި ދުންފަތާ ގުޅުންހުރި ވިޔަފާރި ހިންގުމަށް ދޫނުކުރާނެކަމަށްވެސް އިސްލާހުގައި ވަނީ ބަޔާންކޮށްފައެވެ.

މި ބިލު ދިރާސާ ކުރުމަށްފަހު އިޖުތިމާޢީ ކޮމިޓީން ވަނީ ދެ އިސްލާހެއް އިތުރުކޮށްފައެވެ. އެއީ ދައުލަތުގެ އިދާރާތައް ހިންގާ އިމާރާތްތަކާއި އެ އިމާރާތުގެ ގޯތީގައި ދުންފަތް ބޭނުންކުރުން މަނާކުރުމާއި ދުންފަތާ ދުރުވުމަށް ދެވޭ ފަރުވާގައި ބޭނުންކުރާ ބާވަތްތައް ދުންފަތް މާނަކުރުމުގައި ނުހިމެނުމަށް ގެނައި އިސްލާހެވެ. މަޖިލީހުން ބިލު ފާސްކުރީ މި ދެ އިސްލާހު ހިމެނޭގޮތަށެވެ.

މަޖިލީހުން ފާސްކުރި މި ބިލަށް މަހުގެ 15ވަނަ ދުވަހުން ފެށިގެން އަމަލުކުރުމަށް ހިމަނާފައިވާއިރު، ޤާނޫނަކަށްވެ އަމަލު ކުރަން ފަށާނީ ރައީސުލްޖުމްހޫރިއްޔާ ބިލު ތަސްދީގުކުރެއްވުމުންނެވެ.