ބާސެލޯނާ އަށް ކުޅެމުން އަންނަ ސްޕެއިނުގެ ވިންގް، ލަމީން ޔަމާލް އާއި ޕޮލެންޑްގެ ފޯވާޑް، ރޮބަޓް ލެވަންޑޯސްކީ އަށް އަނިޔާވެ، ދުވަސްތަކަކަށް ކުޅުމާ ދުރަށްދާން ޖެހިފައިވާ ކަމަށް އެ ކްލަބުން ބުނެފިއެވެ.
އެ ކްލަބުން ބުނީ، ހޯމަ ދުވަހު ހެދި ޓެސްޓުތަކަށްފަހު ޔަމާލްގެ ފައިގެ ކުޑަހުޅަށް ލިބިފައިވާ އަނިޔާގެ ސަބަބުން ތިން ހަފްތާއެއްހާ ދުވަހުގެ މުއްދަތަށް ކުޅުމާ ދުރުގައި ހުންނަން ޖެހިދާނެ ކަމަށާއި، ލެވަންޑޯސްކީގެ ބުރަކަށްޓަށް ލިބިފައިވާ އަނިޔާއިން ރަނގަޅުވުމަށް 10 ވަރަކަށް ދުވަސްވަންދެން އަރާމުކުރަންޖެހޭނެ ކަމަށެވެ.
އެހެންކަމުން، މި ދެ ކުޅުންތެރިންނަށް ވެސް ކުރިއަށް އޮތް އިންޓަނޭޝަނަލް ބްރޭކްގައި ސްޕެއިނާއި ޕޮލެންޑުން ޔުއެފާ ނޭޝަންސް ލީގުގައި ކުޅުމަށް ހަމަޖެހިފައިވާ މެޗުތަކުގައި ނުކުޅެވޭނެ އެވެ.
މި ފަހަރުގެ ސީޒަނުގެ ސްޕެނިޝް ލީގުގައި މިހާތަނަށް ކުޅުނު 13 މެޗުގައި 14 ލަނޑުޖަހައިފައިވާ ލެވަންޑޯސްކީ ލަނޑުލިސްޓުގެ އެންމެ ކުރީގައި އޮތްއިރު، މީގެތެރެއިން ގިނަ ލަނޑުތައް ޖަހައިދިނުމުގައި އުމުރުން 17 އަހަރުގެ ޔަމާލްގެ ދައުރު ބޮޑެވެ.
ޔަމާލް އަކީ މިވަގުތު ބާސެލޯނާގައި ހުރި އެންމެ ހުނަރުވެރި އެއްކުޅުންތެރިޔާ އެވެ. އޭނާ ވަނީ މި ފަހަރުގެ ސީޒަނުގައި މިހާތަނަށް ހުރިހާ މުބާރާތެއްގައި ބާސެލޯނާ އަށް ކުޅެދިން 15 މެޗުގައި ހަ ލަނޑުޖަހައިފައެވެ. އެންމެ ފަހުގެ ޔޫރޯ ފުޓްބޯޅަ މުބާރާތް ސްޕެއިނަށް ކާމިޔާބުކޮށްދިނުމުގައި ވެސް ޔަމާލް ވަނީ މުހިއްމު ދައުރެއް އަދާކޮށްފައެވެ.
ޔަމާލް އަށް އަނިޔާވީ، މިދިޔަ ހަފްތާގައި ބާސެލޯނާ އިން ސާބިއާގެ ރެޑް ސްޓަރ ބެލްގްރޭޑްއާ ދެކޮޅަށް ޔުއެފާ ޗެމްޕިއަންސް ލީގުގައި ކުޅުނު މެޗުގައެވެ. މި އަނިޔާގެ ސަބަބުން ލީގުގައި މި ހަފްތާގެ އާދީއްތަ ދުވަހު އެ ޓީމުން ރަށުން ބޭރުގައި ރެއާލް ސޮސިއެޑާޑް އަތުން 1-0 އިން ބަލިވި މެޗުގައި ޔަމާލް ނުކުޅެއެވެ. މިއީ ލީގުގައި އެ ޓީމުގެ ދެވަނަ ބައްޔެވެ.