އިޓަލީވިލާތުގައި ރާއްޖޭގެ އެމްބަސީއެއް ހުޅުވަނީ

އިޓަލީވިލާތުގައި ރާއްޖޭގެ އެމްބަސީއެއް ހުޅުވުމުގެ މަސައްކަތް ކުރައްވަމުން ގެންދަވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، ޖުމްހޫރީ ދުވަހުގެ ޚާއްސަ ޖަލްސާގައި ވާހަކަފުޅުދައްކަވަމުންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވީ، މިސަރުކާރުގެ އަމާޒަކީ ހުރިހާ ގައުމަކާއެކުވެސް ގާތް ގުޅުމެއް ބާއްވައި ޚާރިޖީ ގުޅުން ވަރުގަދަކުރެއްވުންކަމަށެވެ. އެގޮތުން ބޭރުގެ ޤައުމުތަކުގައި އެމްބަސީތައް ހުޅުވުމުގެ މަސައްކަތް ކުރައްވަމުން ގެންދަވާކަމަށެވެ.

ރައީސް ވިދާޅުވީ، އިޓަލީވިލާތުގައި ރާއްޖޭގެ އެމްބަސީއެއް ހުޅުވުމަށް މިހާރު ހުއްދަ ލިބިފައިވާކަމަށެވެ. އެހެންކަމުން އެ ޤައުމުގައި ރާއްޖޭގެ އެމްބަސީއެއް ހުޅުވުމުގެ މަސައްކަތް ކުރައްވަމުން ގެންދަވާކަމަށް ވިދާޅުވިއެވެ.

"މި ނިމިގެންދާ އަހަރުގެ ތެރޭގައި އަޅުގަނޑުމެން ތުރުކީގައި އެމްބަސީއެއް ހުޅުވައިފިން. އަޅުގަނޑުމެންނަށް މިހާރު ހުއްދަ ލިބިފައި އެބައޮތް އިޓަލީވިލާތުގައި އެމްބަސީއެއް ހުޅުވަން. އަޅުގަނޑުމެން އެކަމަށް ހުށައަޅައިގެން އިރާދަކުރެއްވިއްޔާ އަޅުގަނޑުމެންގެ ޓޫރިޒަމަށް ވަރަށް މުހިންމު ވީމަ އެކަން ކުރަން ނިންމީ. އަދި ހަމަ އެއާއެކީގައި އަޅުގަނޑުމެންގެ ވިޔަފާރިއަށް މުހިންމު ގައުމުތަކާ އެކީގައިވެސް އަޅުގަނޑުމެން ބޭނުންތެރި ތަންތަނުގައި ޤައުމަށް ފައިދާހުރި ތަންތަނުގައި އެމްބަސީތަކާއި ހައި ކޮމިޝަންތައް ހުޅުވާނަން." ރައީސް ވިދާޅުވިއެވެ.

އިޓަލީވިލާތަކީ ރާއްޖެއަށް ގިނަ އަދަދަކަށް ފަތުރުވެރިން އަންނަ ޤައުމެކެވެ. އެގޮތުން މިއަހަރުގެ މިހާތަނަށް އިޓަލީވިލާތަކީ ރާއްޖެއަށް 5 ވަނައަށް އެންމެ ގިނަ ފަތުރުވެރިން އައި ޤައުމެވެ. އެ ޤައުމުން މިހާތަނަށް ރާއްޖެއަށް 116،195 ފަތުރުވެރިން ވަނީ އައިސްފައެވެ.

ރާއްޖޭން ބޭރުގެ ޤައުމުތަކުގައި ރާއްޖޭގެ 16 އެމްބަސީއާއި ހައިކޮމިޝަންތައް މިހާރުވެސް ވަނީ ހުޅުވާފައެވެ.