އަމިއްލަ ބޭނުމަށް ފަތުރުވެރިން ގެންނަ ބައެއް ތަކެތިން ޑިއުޓީ މާފުވާގޮތަށް އުޞޫލު އިސްލާޙުކޮށްފި

ރާއްޖެއަށް ޒިޔާރަތްކުރާ ފަތުރުވެރިން އަމިއްލަ ބޭނުމަށް ގެންނަ ބައެއް ތަކެތިން ޑިއުޓީ މާފުވާގޮތަށް އުޞޫލު އިސްލާޙުކޮށްފިއެވެ.

ދަތުރުވެރީން ގެންނަ ތަކެއްޗާއި އަމިއްލަ ފަރާތްތަކުގެ ކުދިކުދި ބޭނުންތަކަށް ގެންނަ ތަކެއްޗާއި ވިޔަފާރި ސާމްޕަލްގެ ގޮތުގައި ގެންނަ ތަކެތީން ޑިއުޓީ މާފުކުރުމުގެ އުޞޫލަށް ސަރުކާރުން ވަނީ އިސްލާޙު ގެނެސްފައެވެ.

މީގެ ކުރިން މި އުޞޫލުގައިވާގޮތުން ރާއްޖެއިން ބޭރުން ދަތުރުކޮށްފައި އަންނަ ކޮންމެ މީހަކަށް، އޭނާ ގެންނަ ތަކެތީން ކޮންމެ ދަތުރަކަށް ޑިއުޓީ މާފުކުރެވޭ ތަކެތީގެ ގޮތުގައި ފަތުރުވެރިންގެ އަމިއްލަ ބޭނުމަށް އެމީހުން ގެންނަ ސިނގިރޭޓާއި ސުއްޓާފަދަ ތަކެތިން ޑިއުޓީ މާފުކުރެވޭގޮތަކަށް ނޯވެއެވެ.

ނަމަވެސް މިހާރު ގެނައި އިސްލާޙުގައި ރާއްޖެއިން ބޭރުން ދަތުރުކޮށްފައި އަންނަ، އުމުރުން 18 އަހަރު ފުރިފައިވާ ބޭރުގެ ފަތުރުވެރީން އަމިއްލަ ބޭނުމަށް ގެންނަ ސިނގިރޭޓާއި ސުއްޓާފަދަ ތަކެތީގެ ތެރެއިން 200 ސިނގިރޭޓް ނުވަތަ 25 ސުއްޓާ ނުވަތަ 250 ގްރާމުގެ ދުންފަތް ހިމެނޭހެން މިއިން ކޮންމެ އެއްޗަކަށް ކަނޑައަޅާފައިވާ މިންވަރަށްވުރެ އިތުރުނުވާނަމަ ޑިއުޓީ މާފުކުރެވޭނެކަމަށް ބަޔާންކޮށްފައިވެއެވެ.

އެހެންކަމުން ސިނގިރޭޓުފަދަ ތަކެތި ފަތުރުވެރިންނަށް ރާއްޖެ އެތެރެކުރެވޭ މިންވަރު ހިފެހެއްޓޭނެއެވެ. އެގޮތުން އުޞޫލުގައި ބަޔާންކޮށްފައިވާ މިންވަރަށްވުރެ އިތުރަށް ސިނގިރޭޓާއި ސުއްޓާއާއި ދުންފަތް ފަތުރުވެރިންނަށް ރާއްޖެ އެތެރެނުކުރެވޭނެއެވެ. އަދި ކަނޑައަޅާފައިވާ މިންވަރަށްވުރެ ތަކެތި އިތުރުނަމަ، ބޮންޑުގެ ގޮތުގައި ކަސްޓަމްސްއިން މި ތަކެތި ހިފަހައްޓާނެއެވެ. ނަމަވެސް ދަތުރު ނިންމާލުމަށްފަހު ރާއްޖެއިން ފުރަމުން މި ތަކެތި ފަތުރުވެރިންނަށް ނެނގޭނެކަމަށް މޯލްޑިވްސް ކަސްޓަމްސް ސަރވިސްއިން ވިދާޅުވެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އެކްސްޕޯޓް އިމްޕޯޓްގެ ޤާނޫނުގެ ދަށުން ސިނގިރޭޓާއި ބިޑިއަށް ނަގާ އިމްޕޯޓް ޑިއުޓީގެ ސްޕެސިފިކް ރޭޓް 3 ރުފިޔާއިން 8 ރުފިޔާއަށް މަތިކުރުމަށް ނިންމަވާފައެވެ. އެމަނިކުފާނުގެ އަމާޒަކީ ސިނގިރޭޓާއި ދުންފަތް ބޭނުންކުރުންފަދަ ޞިއްޙަތަށް ނުރައްކާތެރި އާދަތަކުން ދިވެހި މުޖުތަމަޢު ސަލާމަތްކުރުމެވެ. މިކަން ކުރުމަށް ޤާނޫނު އިސްލާޙުކުރުމުގެ މަސައްކަތް ދަނީ ކުރަމުންނެވެ.