މިހާރު ކުރިއަށްދާ ތިލައުތުރު ފުޓްސަލް މުބާރާތް 2024 ގެ ސެމީ ފައިނަލަށް ބާރަށް، އިހަވަންދޫ، އުތީމު އަދި ދިއްދޫ ދަތުރުކޮށްފިއެވެ.
ތިލަދުންމަތީ އުތުރުބުރީ އަތޮޅު ކައުންސިލުން އިންތިޒާމުކޮށްގެން ކުރިއަށްގެންދާ މި މުބާރާތް މި އަހަރު ބާއްވަނީ ކެލާގައެވެ. މި މުބާރާތުގައި ހއ. އަތޮޅުގެ 10 ޓީމެއް ބައިވެރިވެފައިވާއިރު، މުބާރާތް މިހާތަނަށް ކުރިއަށްދިޔައީ ދެ ގްރޫޕަކަށް ބަހާލައިގެންނެވެ.
ސެމީގެ ޖާގައެއް ހޯދި ބާރަށުން ގްރޫޕް އޭގެ އެއްވަނަ ހޯދިއިރު، މި ގްރޫޕުގެ ދެވަނައަށް ދިޔައީ ދިއްދޫއެވެ. ގްރޫޕް ބީގެ އެއްވަނަ އިހަވަންދޫން ހޯދިއިރު، މި ގްރޫޕުގެ ދެވަނަ ހޯދާފައިވަނީ އުތީމުންނެވެ.
މުބާރާތުގެ ގްރޫޕް ސްޓޭޖުގެ ފަހު މެޗުތައް އިއްޔެ ކުޅުނުއިރު، ކެލާ ފުޓްސަލް ދަނޑުގައި އިއްޔެ ހަވީރު ކުޅުނު ގްރޫޕް އޭގެ މެޗުގައި ދިއްދޫ އާއި މުރައިދޫ ވަނީ 2-2 ގެ ނަތީޖާއަކުން އެއްވަރުވެފައެވެ. މި މެޗުގައި މުރައިދޫގެ ލަނޑުތައް ޖަހައިދިނީ މުޙައްމަދު އައުސް އާއި، އުފާލް އަބްދުﷲ އެވެ. ދިއްދޫގެ މުޙައްމަދު ޝަނާއު ނަސީރު އެ ޓީމަށް ފަރަގު ކުޑަކޮށްދިންއިރު، ދިއްދޫގެ އަނެއް ލަނޑަކީ މުރައިދޫގެ މުޙައްމަދު ޒައިން ހަސަން އަތުން ބައިކޮޅަށް ވަން ލަނޑެކެވެ.
މި މުބާރާތުގައި އިއްޔެ ހަވީރު ކުޅުނު ގްރޫޕް ބީގެ މެޗުން އުތީމު ވަނީ 7-2 ގެ ނަތީޖާއަކުން އުލިގަން ބަލިކޮށްފައެވެ. މި މެޗުގައި އުތީމުގެ މުޙައްމަދު މަޒީން އާއި، މުޙައްމަދު ނަބީލް، މިއިން ކޮންމެ ކުޅުންތެރިއަކު ދެ ލަނޑު ޖެހިއިރު، އެ ޓީމުގެ އަނެއް ލަނޑުތައް ކާމިޔާބުކޮށްދިނީ ތޯހާ މުޙައްމަދާއި، އަލީ އިލްހާމް އަދި މުޙައްމަދު ރުޝްދާނެވެ. އުލިގަމު ޓީމުގެ ލަނޑުތައް ޖަހައިދިނީ ޔޫސުފް ޝާހިދާއި، ހުސައިން ޔަމީނެވެ.
މީގެ އިތުރުން މި މުބާރާތުގައި ރޭ ކުޅުނު ގްރޫޕް އޭގެ މެޗުގައި ބާރަށާއި ފިއްލަދޫ ބައްދަލުކުރިއިރު، މި މެޗު ނިމުނީ 3-3 ގެ ނަތީޖާއަކުން އެއްވަރުވެގެންނެވެ. ފޯރިގަދަ ކުޅުމެއް ފެނިގެންދިޔަ މި މެޗުގައި ބާރަށުގެ ލަނޑުތައް ޖަހައިދިނީ މުޙައްމަދު ޝަމާއިލް އާއި، އަޙަމްދު ޝަޒީމް އަދި މުޙައްމަދު މާއިސްއެވެ. އަދި މެޗުގައި ފިއްލަދޫގެ ލަނޑުތައް ކާމިޔާބުކޮށްދިނީ މުޙައްމަދު ހުޝާމާއި، އާދަމް ޝާހިދު މުޙައްމަދު އަދި އަލީ އަފްރާހެވެ.
މި މުބާރާތުގައި ރޭ ކުޅުނު ގްރޫޕް ސްޓޭޖުގެ ފަހު މެޗުގައި ގްރޫޕް ބީގައި ހިމެނޭ ކެލާއިން ވަނީ 1-0 ގެ ނަތީޖާއަކުން އިހަވަންދޫ ބަލިކޮށްފައެވެ. މި މެޗުގައި ފެނިގެންދިޔަ ހަމައެކަނި ލަނޑު ކެލާއަށް ކާމިޔާބުކޮށްދިނީ އަޙްމަދު ސާޖިދެވެ.
މި މުބާރާތުގެ ސެމީގެ ފުރަތަމަ މެޗުގައި ބާރަށާއި އުތީމު ބައްދަލުކުރާއިރު، ސެމީގެ ދެވަނަ މެޗުގައި އިހަވަންދޫ ނުކުންނާނީ ދިއްދޫއާ ދެކޮޅަށެވެ.