ދޯންޏެއްގެ ބުރަފަތީގައި ޖެހި 15 އަހަރުގެ ކުއްޖަކު މަރުވެއްޖެ

އދ. ދިގުރަށް ކައިރިއަށް ސްނޯކްލިންއަށް ދިޔަ ކުޑަކުއްޖަކު ދޯންޏެއްގެ ބުރަފަތީގައި ޖެހި މަރުވެއްޖެއެވެ.

ފުލުހުން ވިދާޅުވީ މަރުވެފައިވަނީ ސިންގަރޫރަށް ނިސްބަތްވާ އުމުރުން 15 އަހަރުގެ އަންހެން ކުއްޖެއްްކަމަށެވެ. ފުލުހުން ވިދާޅުވީ، މަރުވި ކުއްޖާއަކީ އދ. ދިގުރަށަށް ވޭލް ޝާކް ރިސާޗްއެއް ހަދަން ސްޓަޑީ ޓުއަރއެއްގައި ގޮސްއުޅުނު ޓީމުގައި ހިމެނޭ ކުއްޖެއްކަމަށެވެ. އަދި އެ ކުއްޖާ މަރުވީ ސްނޯކްލިންއަށް ގޮސް އުޅުނު ދޯނިން މޫދަށް ފުންމާލި ވަގުތު ދޯނީގެ ބުރަފަތީގައި ޖެހި ޒަހަމްވެގެންކަމަށްވެސް ފުލުހުން ވިދާޅުވެއެވެ.

ފުލުހުން ވިދާޅުވީ އެ ކުއްޖާ ހެލްތު ސެންޓަރަށް ގެންދިޔައިރުވެސް މަރުވެފައިވާކަމަށް ހެލްތް ސެންޓަރުން ފުލުހުންނަށް މައުލޫމާތު ދީފައިވާކަމަށް ފުލުހުން ބުނެއެެވެ.

މި ހާދިސާ ފުލުހުންނަށް ރިޕޯޓްކޮށްފައިވަނީ މިއަދު ހެނދުނު 9:55 ގައެވެ. މި މައްސަލަ ފުލުހުން ތަހުޤީގުކުރަމުންދާކަމަށް އެ މުވައްސަސާއިން ވިދާޅުވެއެވެ.