ލުބްނާނަށް ބޮންއަޅައި ތިން މީހުން ޝަހީދުކޮށްލައި, ޔުނިފިލްގެ ހަތަރު ސިފައިން ޒަޚަމުކޮށްލައިފި

ޔަހޫދީ ފައުޖުގެ ނިރުބަވެރި ސިފައިން ލުބްނާންގެ ޞަޔިދާއަށް ދިން ނިރުބަވެރި ޙަމަލާތަކެއްގައި ތިން މީހުން ޝަހީދުކޮށްލައި, ލުބްނާންގައި ހަރަކާތްތެރިވާ އދގެ ސުލްޙަ ބަލަހައްޓާ ފައުޖު (ޔުނިފިލް)ގެ ހަތަރު ސިފައިން ޒަޚަމުކޮށްލައިފިއެވެ. ޞަޔިދާގައި ހުރި ޗެކްޕޮއިންޓަކަށް އަމާޒުކޮށް ދިން ޙަމަލާގައި ލުބްނާންގެ އަސްކަރިއްޔާގެ ތިން ސިފައިން ވެސް ޒަޚަމުވިއެވެ. ޒަޚަމުކޮށްލާފައިވާ ޔުނިފިލްގެ ސިފައިންގެ ތެރޭގައި ހިމެނެނީ މެލޭޝިޔާގެ ސިފައިންނެވެ.

ޔަހޫދީ ފައުޖުގެ ޙަމަލާތައް އަމާޒުކޮށްފައި ވަނީ ޗެކް ޕޮއިންޓް ހުރަސްކޮށް ދަތުރު ކުރަމުން ދިޔަ ކާރަކަށެވެ. ޙަމަލާގައި ޝަހީދު ކޮށްލާފައި ވަނީ އެ ވަގުތު ކާރުގައި ތިބި ތިން މީހުންނެވެ. ޒަޚަމުވެފައިވާ ޔުނިފިލްގެ ސިފައިންނަކީ, އެ ވަގުތު އެ ސަރަޙައްދުން ދަތުރު ކުރަމުންދިޔަ އދގެ އުޅަނދެއްގައި ތިބި މީހުންނެވެ.

ޔުނިފިލުން ވަނީ މި ކަމާ މެދު ކަންބޮޑުވުން ފާޅުކޮށްފައެވެ. އެ އިދާރާއިން ބުނީ, ޒަޚަމު ކޮށްލާފައި ވަނީ ލުބްނާންގައި ހިންގަމުންދާ އޮޕަރޭޝަންގައި ގުޅުމަށް ލުބްނާނަށް ދަތުރު ކުރި ސިފައިން ކަމުގައެވެ. އަސްކަރީ ޑްރޯނެއް ބޭނުންކޮށް ޔަހޫދީ ފައުޖުން ޙަމަލާ ދީފައި ވަނީ އދގެ އުޅަނދުގެ ކައިރިއަށް ކަމުގައި ވެސް ޔުނިފިލުން ބުންޏެވެ.

ޔަހޫދީ ފައުޖުން ދިން ޙަމަލާގައި ޒަޚަމު ކޮށްލާފައިވާ ޔުނިފިލްގެ ސިފައިންނަށް, އެ ސަރަޙައްދުގައި ހަރަކާތްތެރިވަމުން ދިޔަ ލުބްނާންގެ ރެޑް ކްރޮސްގެ ޞިއްޙީ ޚިދުމަތްތެރިން ވަނީ ފަރުވާ ދީފައެވެ. އެ ޙަމަލާތަކާ ގުޅިގެން ޔުނިފިލުން ވަނީ, އެ ފައުޖުގެ ސިފައިންނަށް އަމާޒުކޮށް ޙަމަލާ ދިނުން ހުއްޓައިލުމަށް ޔަހޫދީ ފައުޖަށް ގޮވައިލާފައެވެ. މިއީ, ޔަހޫދީ ސިފައިން ޔުނިފިލްގެ ސިފައިންނަށް ޙަމަލާ ދީފައިވާ ފުރަތަމަ ފަހަރެއް ނޫނެވެ. ހުސްވި މަހު ވެސް ޔަހޫދީ ފައުޖުން ވަނީ އަސްކަރީ ޓޭންކުފަހަރު ބޭނުންކޮށް ލުބްނާންގައި ހުންނަ ޔުނިފިލްގެ މައި މަރުކަޒަށް ޙަމަލާ ދީފައެވެ. އަދި, އެ ތަނުގައި ހަރަކާތްތެރިވަމުންދާ ސިފައިންނަށް ބިރު ދައްކާފައެވެ.

ލުބްނާންގެ އަސްކަރިއްޔާއިން ބުނީ, ޢަވާލީ ޗެކް ޕޮއިންޓަށް އަމާޒުކޮށް ޔަހޫދީ ފައުޖުން ދީފައިވާ ނިރުބަވެރި ޙަމަލާގައި ގިނަ އަދަދެއްގެ އެއްގަމު އުޅަނދަށް ގެއްލުންވި ކަމުގައެވެ. މަސްރަޙު ދިރާސާ ކުރާ ފަރާތްތަކުން ބުނީ, މިއީ ޔަހޫދީންގެ ނިރުބަވެރި ޙަމަލާތަކުން ސަލާމަތް ކަން ހޯދުމަށް އަމިއްލަ ގެދޮރު ދޫކޮށް ދަތުރު ކުރަމުންދާ މީހުންނަށް އަމާޒުކޮށް ދީފައިވާ ޙަމަލާއެއް ކަމަށް ޤަބޫލު ކުރެވޭ ކަމުގައެވެ. ސަބަބަކީ, އެ ސަރަޙައްދަށް ޙަމަަލާ ދިނުމުގެ ކުރިން, އެ ސަރަޙައްދު ހުސްކޮށް, ޢަވާލީ ކޯރުގެ އުތުރުގެ ސަރަޙައްދަށް ދަތުރު ކުރުމަށް ޔަހޫދީ ފައުޖުން އެ ސަރަޙައްދުގެ ރައްޔިތުންނަށް އަންގާފައި އޮތުމެވެ. ޔަހޫދީ ފައުޖުން ރައްކާތެރި ކަމަށް ބުނެފައިވާ ސަރަޙައްދަށް ދަތުރު ކުރެވެނީ ޢަވާލީ ޗެކް ޕޮއިންޓް މެދުވެރިކޮށެވެ.

ލުބްނާންގެ މުސްލިމުންގެ ނަސްލުހޭދު ކުރަން ޔަހޫދީ ފައުޖުން ލާއިންސާނީ ޖަރީމާތަކެއް ހިންގަން ފަށާފައި ވަނީ މީގެ 13 ވަރަކަށް މަސް ކުރިންނެވެ. އެއީ, ފަލަސްޠީނުގެ ޣައްޒާގެ މުސްލިމުންނާ ދެކޮޅަށް ލާއިންސާނީ ޢުދުވާނެއް ފެށުމާ ގުޅިގެން, ލުބްނާންގެ މުޖާހިދުންގެ ޖަމާޢަތް, ޙިޒްބުاللهން ޒަޔަނިސްޓު އިސްރާއީލުގެ ރަށްތަކާއި ޔަހޫދީ ފައުޖުގެ އަމާޒުތަކަށް ދެމުން ދިޔަ ޙަމަލާތަކުގެ ބަދަލު ހިފުމުގެ ގޮތުންނެވެ. ވެރިރަށް ބައިރޫތުގެ އިތުރުން ދެކުނުގެ ރަށްތަކާއި އަލް-ބިޤާޢު ވާދީގެ ސަރަޙައްދުތަކަށް ޔަހޫދީ ފައުޖުން ބޮންއަޅަން ފަށާފައި ވަނީ ސެޕްޓެންބަރު 23ވަނަ ދުވަހުއެވެ.

ޔަހޫދީ ފައުޖުގެ ނިރުބަވެރި ސިފައިން އޮކްޓޫބަރު 1ވަނަ ދުވަހުން ފެށިގެން ދަނީ ލުބްނާންގެ ދެކުނުގެ ސަރަޙައްދުތަކުގައި ވެސް ހަރަކާތްތެރިވަމުންނެވެ. ޙިޒްބުاللهގެ މުޖާހިދުން ދަނީ ޔަހޫދީ ފައުޖުގެ ސިފައިންނާ ކުރިމަތިލައި, ޖިހާދު ކުރަމުންނެވެ. ޔަހޫދީ ފައުޖުން ބުނީ, ޙިޒްބުاللهގެ މުޖާހިދުން ދިން ޙަމަލާތަކެއްގައި ލުބްނާންގެ ދެކުނުގައި ޤަތުލުޢާންމު ހިންގަމުންދާ ސިފައިންގެ ތެރެއިން ފަސް މީހުން މަރުވެފައިވާ ކަމުގައެވެ. އަދި, އިތުރު 16 ސިފައިން ޒަޚަމުވެފައިވާ ކަމުގައެވެ.

ޔަހޫދީންގެ މެދުކެނޑުމެއް ނެތް ޢުދުވާނީ ޙަމަލާތަކަށް ރައްދު ދިނުމުގެ ގޮތުން ޙިޒްބުاللهން ދަނީ ޒަޔަނިސްޓުންގެ ރަށްތަކަށް އަމާޒުކޮށް ވެސް ވަރުގަދަ ޙަމަލާތަކެއް ދެމުންނެވެ. ޙިޒްބުاللهން ބުނީ, ޔަހޫދީ ފައުޖުގެ ޚެރްމޮން އަސްކަރީ މަރުކަޒަށް އަމާޒުކޮށް ފާއިތުވި 24 ގަޑިއިރުގެ ތެރޭގައި ގިނަ އަދަދެއްގެ ރޮކެޓު ޙަމަލާތަކެއް ދީފައިވާނެ ކަމުގައެވެ. މީގެ އިތުރުން, ފަލަސްޠީނުގެ ވެރިވެގަނެފައިވާ ބިންތަކުގައި ޔަހޫދީން ވަޒަންވެރި ކުރުވާފައިވާ ލީމާނާއި ޚަނީތާގެ އިތުރުން ސާރަށް ވެސް ނުރައްކާތެރި ޙަމަލާތަކެއް ދީފައިވާނެ ކަމުގައެވެ. އިސްރާއީލުގެ މުހިންމު ރަށެއް ކަމުގައިވާ ޚައިފާގައި ހުންނަ ޢާންމުން ދިރިއުޅޭ އެޕާޓްމަންޓް އިމާރާތަކަށް ވެސް ޙިޒްބުاللهން ޙަމަލާދީފައިވެއެވެ.

ލުބްނާނުގެ މުސްލިމުންނާ ދެކޮޅަށް ހިންގަމުންދާ ޢުދުވާނުގައި ޝަހީދު ކޮށްލާފައިވާ ޢާންމުންގެ ޢަދަދު ވަނީ 3,050އަށް އުފުލިފައެވެ. އޭގެ ތެރޭގައި ގިނަ ޢަދަދެއްގެ އަންހެނުންނާއި ކުޑަކުދިން ހިމެނޭ ކަމުގައި ލުބްނާނުގެ ޞިއްޙަތާ ބެހޭ ވުޒާރާއިން ބުންޏެވެ. އަދި, ޒަޚަމު ކޮށްލާފައިވާ މީހުންގެ ޢަދަދު 13,658އަށް އަރައެވެ. ޔަހޫދީންގެ ޢުދުވާނުގައި ގެދޮރު ނެތިކޮށްލާފައިވާ މީހުންގެ ޢަދަދު 1.2 މިލިޔަނަށް އުފުލިފައިވާއިރު, އދން ބުނީ އޭގެ ތެރެއިން ގިނަ ޢަދަދެއްގެ ބަޔަކު މި ވަގުތު ދިރިއުޅެމުން ދަނީ މަގުތަކުގެ މަތީގައި ކަމުގައެވެ.