މަޓާޓޯގެ "މޯލްޑިވްސް ފައިންޑަރ 2025" ލަންޑަންގައި އިފްތިތާހުކޮށްފި

މަޓާޓޯގެ "މޯލްޑިވްސް ފައިންޑަރ 2025" މަޖައްލާ ރަސްމީކޮށް އިފްތިތާހުކޮށްފިއެވެ.

"މޯލްޑިވްސް ފައިންޑަރ"އަކީ މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއަރ އޮޕަރޭޓާރސް (މަޓާޓޯ) އިން ކޮންމެ އަހަރަކު ނެރޭ މަޖައްލާއެކެވެ. އެ މަޖައްލާގެ މިއަހަރުގެ އަދަދު ނެރެދެއްވީ، އިނގިރޭސިވިލާތުގެ ލަންޑަންގައި މިހާރު ކުރިއަށްދާ ވޯލްޑް ޓްރެވަލް މާކެޓު ފެއަރގައި ފަތުރުވެރިކަމާބެހޭ ވަޒީރު އިބްރާހިމް ފައިސަލެވެ.

މަޓާޓޯއިން ބުނީ މި މަޖައްލާ ނެރެފައިވަނީ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އާއި ފަތުރުވެރިކަމާބެހޭ މިނިސްޓްރީގެ އެންޑޯސްމަންޓާ އެކުގައެވެ. މި މަޖައްލާގައި ދިވެހިރާއްޖޭގެ އެކި މައުލޫމާތުތައް ހިމަނާފައިވާއިރު، ރާއްޖެއިން ބައިނަލްއަޤްވާމީ ފެންވަރުގެ ކެއިންބުއިމާއި، ފޮޓޯގްރަފީގެ ހިދުމަތާއި އަދި ރާއްޖޭގެ ސަގާފަތާއި ގުޅޭ މައުލޫމާތާއި ދިވެހިރާއްޖޭގެ ރީތި އެކި މަންޒަރުތައް ހިމަނާފައިވެއެވެ. މީގެއިތުރުން ފަތުރުވެރިކަމުގެ ދާއިރާގައި ފާހަގަކޮށްލެވޭ ޝަޚްޞިއްޔަތުތަކާއި ހުނަރުވެރިންނާއި އެކި ވިޔަފާރިތަކުގެ ލިޔުންތަކާއި ދަތުރުވެރިންނަށް ބޭނުންވާ މުހިންމު މައުލޫމާތުވެސް ހިމަނާފައިވެއެވެ.

މި މަޖައްލާ އިފްތިތާހުކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން މަޓާޓޯގެ ސީއީއޯ އާމިނަތު ސޫޒަން ވިދާޅުވީ މި މަޖައްލާ ނެރުމުގެ މައިގަނޑު މަޤްޞަދަކީ ދިވެހިރާއްޖޭގެ ފަތުރުވެރިކަމުގެ ދާއިރާ އިތުރަށް ކުރިއެރުވުމާއި، ބައިނަލްއަޤްވާމީ ފެންވަރުގައި ރާއްޖޭގެ ފަތުރުވެރިކަން އިޝްތިހާރުކޮށް، އިތުރު ފަތުރުވެރިން ރާއްޖެއަށް ޒިޔާރަތްކުރުމަށް ހިތްވަރު ދިނުންކަމަށެވެ.