ރާއްޖޭގެ އިތުރު 19 ރަށަކަށް އެމްއައިބީގެ ޚިދުމަތް ފުޅާކުރުމަށް ޙަވާލުކޮށްފި
-
19 ރަށެއްގައި 23 އޭޓީއެމް ޤާއިމް ކުރާނެ
-
މި މަސައްކަތް 1 އަހަރު ދުވަހުގެ ތެރޭގައި ނިންމުމަށް ވަނީ ހަމަޖެހިފައި
މޯލްޑިވްސް އިސްލާމިކް ބޭންކުގެ ޚިދުމަތްތައް ފުޅާކޮށް ރާއްޖޭ އިތުރު 19 ރަށެއްގައި އޭޓީއެމް ބެހެއްޓުމުގެ އެއްބަސްވުމުގައި ސޮއިކޮށްފިއެވެ. މި އެއްބަސްވުން އެކުލަވާލާފައިވަނީ އިޤްތިޞާދީ ތަރައްޤީއާއި ވިޔަފާރިއާއިބެހޭ ވުޒާރާއާއި މޯލްޑިވްސް އިސްލާމިކް ބޭންކާއި ދެމެދުއެވެ.
ރައީސުލްޖުމްހޫރިއްޔާ އޮފީހުގައި ބޭއްވި މި ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ. މި އެއްބަސްވުމުގައި އިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާގެ ފަރާތުން ސޮއިކުރެއްވީ، ވަޒީރު މުޙައްމަދު ސަޢީދުއެވެ. އިސްލާމިކް ބޭންކުގެ ފަރާތުން، މި އެއްބަސްވުމުގައި ސޮއިކުރެއްވީ އެ ބޭންކުގެ މެނޭޖިން ޑިރެކްޓަރ މުފައްދަލް އިދްރީސް ޚުމްރީއެވެ.
މި އެއްބަސްވުމުގެ ދަށުން، ރާއްޖޭގައި އިސްލާމިކް ބޭންކު 19 ރަށެއްގައި އިސްލާމިކް ބޭންކުގެ އޭޓީއެމް ޤާއިމްކުރާނެއެވެ. މީގެ ސަބަބުން ރާއްޖޭގެ 16 އަތޮޅަކަށް އެމްއައިބީގެ ޚިދުމަތް ފޯރުކޮށްދެވޭނެއެވެ. މި މަސައްކަތް ޙަވާލުކޮށްފައިވަނީ އެއް އަހަރު ދުވަހުގެ ތެރޭގައި ކަމަށް އިޤްތިޞާދީ ތަރައްޤީއާ ބެހޭ ވުޒާރައިން ވިދާޅުވެއެވެ.
މި ރަސްމީއްޔާތުގައި ވާހަކަފުޅުދައްކަވަމުން އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވަނީ، މި މަސައްކަތަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅެއް ކަމަށްވާ ރައްޔިތުންގެ މާލީ ބައިވެރުވުން ކަށަވަރުކުރުމަށް، ކުރެވޭ މަސައްކަތުގެ ދަށުން ފަށާ މަސައްކަތެއް ކަމަށެވެ. އަދި މިކަމުގެ އެއް ބައިވެރިއެއް ގޮތުގައި އިސްލާމިކް ބެންކުން ދެއްވާ އެއްބާރުލުމަށް ވަޒީރު ސަޢީދު ޝުކުރު އަދާކުރެއްވިއެވެ.
"މާލީ މުހިންމު ޚިދުމަތްތަކެއް ލިބޭނެ ފަދަ އިންތިޒާމުތައް މުޅި ރާއްޖޭގެ ކޮންމެ ރަށަކުންވެސް ހަމަޖެހިގެން ދިއުން ރައީސްގެ ވަޢުދެއް. އަދި މިއީ ޑިޖިޓަލް އިކޮނޮމީގެ މުހިންމުގެ ތަނބެއް. ޑިޖިޓަލް އިކޮނޮމީއެއް ޤާއިމްކުރުމަށް އިސްލާމިކް ބޭންކުން ކުރެއްވާ މަސައްކަތަށް ޝުކުރު ދަންނަވަން " ވަޒީރު ސަޢީދު ވިދާޅުވިއެވެ.
މިވަގުތުވެސް ރާއްޖޭގެ އެކި ސަރަހައްދުތަކުގައި 39 އޭޓީއެމްއެއް ބަހައްޓައިގެން އެމްއައިބީން ދަނީ ޚިދުމަތް ދެމުންނެވެ. އަދި މި އެއްބަސްވުމާއެކު އިތުރު 23 އޭޓީއެމެއް 19 ރަށެއްގައި ބަހައްޓާނެ ކަމަށް އެމްއައިބީއިން ވިދާޅުވެއެެވެ. މީގެ އިތުރުންވެސް ޚިދުމަތް އިތުރަށް ފުޅާކުރުމަށް އެމްއައިބީގެ އިތުރު ޚިދުމަތްތަކެއް ރަށްރަށުގައި ޤާއިމްކުރާނެ ކަމަށް އެމްއައިބީން ވިދާޅުވެއެވެ.
އެމްއައިބީއާއެކު ސޮއިކުރެވުނު މި އެއްބަސްވުމުގެ އިތުރަށް ރާއްޖޭގެ ރަށްތަކަށް އޭޓީއެމް ޚިދުމަތް ފުޅާކުރުމަށް ބޭންކް އޮފް މޯލްޑިވްސްއާއެކު 109 އޭޓީއެމް ރަށްތަކުގައި ބެހެއްޓުމުގެ އެއްބަސްވުމުގައިވެސް ވަނީ ސޮއިކޮށްފައެވެ. މިއީ ރާއްޖޭގެ ރަށްތަކުގައި އޭޓީއެމް ޚިދުމަތް ފޯރުކޮށްދެއްވުމަށް ރައީސުލްޖުމްހޫރިއްޔާ ވެވަޑައިގަންނަވާ މަސައްކަތުގެ ދަށުން ކުރަމުންދާ މަސައްކަތްތަކެވެ.