މަސްވެރިކަމުގެ ދާއިރާގައި ހުރި ބޮޑެތި މައްސަލަތަކަށް މި ސަރުކާރުން ހައްލު ގެނެސްދޭނެ: ވަޒީރު ޝިޔާމް

މަސްވެރިކަމުގެ ސިނާއަތުގައި ހުރި ބޮޑެތި ދަތިތަކާއި މައްސަލަތަކަށް، ރައީސުލްޖުމްހުރިއްޔާ ޑރ.މުޙައްމަދު މުޢިއްޒުގެ ވެރިކަމުގައި އްލު ލިބޭނެ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙުމަދު ޝިޔާމް ވިދާޅުވެއްޖެއެވެ.

ވަޒީރު ޝިޔާމު މިހެން ވިދާޅުވީ ކޮންމެ އަތޮޅެއްގައި، އަސާސީ ރޭޓެއްގައި ތެޔޮ ލިބޭނެ އިންތިޒާމު ހަމަޖެއްސެވުމަށް، "ފިއުލު ސްޓޯރޭޖް"ތައް ގާއިމްކުރުމުގެ މަޝްރޫޢު އިފްތިތާޙްކުރުމަށް ރައީސް އޮފީހުގައި ބޭއްވި ރަސްމިއްޔާތުގައި ވާހަކަދައްކަވަމުންނެވެ.

މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙުމަދު ޝިޔާމު ވިދާޅުވީ މަސްވެރިކަމުގެ ސިނާއަތަށް މިހާ ޒަމާންވީއިރު، މި ދާއިރާގައި ހުރި މައްސަލަތަކަށް ދާއިމީ ހައްލެއް ލިބިފައިނުވާ ކަމަށެވެ. އަދި މިކަމުގެ ސަބަބަކީ މައްސަލަތައް ހައްލުކުރުމަށް އަބަދުވެސް ހޯދިފައިވަނީ ވަގުތީ ހައްލުތަކަކަށްވުން ކަމަށް ވަޒީރު ވިދާޅުވިއެވެ.

ވަޒީރު ޝިޔާމު ވިދާޅުވީ މަސްވެރިންނަށް ކުރިމަތިވެފައިވާ ގޮންޖެހުންތަކަށް ހައްލު ހޯދުމުގެ މަސައްކަތްތައް، ރައިސް ޑރ.މުޢިއްޒު ވެރިކަމަށް އިންތިޚާބުވެވަޑައިގަތުމައެކު ފަށްތަވާފައިވާކަމަށެވެ.

"އެއީ 30 ސެޕްޓެމްބަރު 2023ގައި، ހުވާކުރެއްވުމުގެ ކުރިއަށް މަސައްކަތްޕުޅު ފަށްޓަވައިފި، މަސްވެރިންގެ މައްސަލަތަކަށް ހައްލު ހޯދުމަށް. އެއާއެކު މުޅި ސިނާއަތުގެ ހުރިހައި ގޮންޖެހުންތަކަށް ހައްލު ހޯދުމަށް ފެށްޓެވި މަސައްކަތް، ފުރަތަމަ 3 އަހަރުތެރޭގައި ހައްލުކުރެވިގެންދާނެ،" ވަޒީރު ޝިޔާމު ވިދާޅުވިއެވެ.

ވަޒީރު ޝިޔާމު ވިދާޅުވީ މަސްވެރިންނަށް ހުރި ދަތިތަކަށް ހައްލު ހޯއްދަވައިދެއްވުމަށް ރައީސުލްޖުމްހުރިއްޔާ އިސްނަންގަވައިގެން މަސައްކަތްކުރައްވާ ކަމަށެވެ. އެގޮތުން މި ދާއިރާގެ ހުރިހާ ކަމެއްގައިވެސް ވަރަށް ގާތުން ކަންކަން ބައްލަވައި މަސައްކަތް ކުރައްވަމުންގެންދަވާކަމަށް ވަޒީރު ޝިޔާމު ވިދާޅުވިއެވެ.