ކޮންމެ އަތޮޅެއްގައި އަސާސީ ރޭޓުގައި ތެޔޮ ލިބޭނެ އިންތިޒާމު ހަމަޖައްސަނީ

ކޮންމެ އަތޮޅަކުން އަސާސީ ރޭޓެއްގައި ތެޔޮ ލިބޭނެ އިންތިޒާމު ހަމަޖެއްސުމަށް، "ފިއުލު ސްޓޯރޭޖްތައް" ގާއިމްކުރުމުގެ މަޝްރޫޢު އިފްތިތާޙް ކޮށްދެއްވައިއެވެ.

މި މަޝްރޫޢު އިފްތިތާޙްކޮށްދެއްވީ ރައީސުލްޖުމްހޫރިއްޔާގެ އޮފީހުގައި ބޭއްވި ޚާއްސަ ރަސްމިއްޔާތުގައި ރައީސުލްޖުމްހުރިއްޔާ ޑރ.މުޙައްމަދު މުޢިއްޒެވެ.

ތެލަކީ އަސާސީ ޚިދުމަތެއްގެ ގޮތުގައި ކަނޑައަޅައި، ރާއޖޭގެ ކޮންމެ އަތޮޅެއްގައި މަދުވެގެން އެއް ރަށުގައި އެސް.ޓީ.އޯ ރޭޓުގައި އާންމުރައްޔިތުންނަށް ޕެޓްރޯލާއި ޑީސަލް ލިބޭނެ ފަސޭހަ އިންތިޒާމެއް ހަމަޖެއްސެވުމަކީ ރައީސުލްޖުމްހުރިއްޔާ ޑރ.މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ.

މި މަޝްރޫޢާއެކު މަސްވެރިންނަށާއި އާންމުރައްޔިތުންނަށް ހެޔޮ އަގެއްގައި ތެޔޮ ލިބޭނެ އިންތިޒާމު ހަމަޖެހޭނެއެވެ.
މި މަޝްރޫޢު އިފްތިތާހުކޮށްދެއްވުމަށް ބޭއްވި ރަސްމިއްޔާތުގައި އެސްޓީއޯގެ މެނޭޖިންގ ޑިރެކްޓަރު ޝިމާދު އިބްރާހީމް ވިދާޅުވީ މިމަޝްރޫޢުގެ ދަށުން މިއަހަރުގެ ޖޫންމަހުގެތެރޭގައި ހުޅުމާލޭގައި އެސްޓީއޯ ރޭޓުގައި ތެޔޮ ލިބޭނެ އިންތިޒާމު ހަމަޖައްސާފައި ވާކަމަށެވެ.

މި މަޝްރޫޢުގެ ދަށުން 19 ރަށެއްގައި މި އިންތިޒާމުތައް ހަމަޖައްސައި 2026ގެ ފެބްރުއަރީގެ ކުރިން މި މަޝްރޫޢުގެ މަސައްކަތް ނިންމުމަށް އެސްޓީއޯއިން ވަނީ ނިންމަވާފައެވެ.
ޝިމާދު ވިދާޅުވީ މަސްވެރިކަން ތަރައްޤީވަމުންއަންނަ މިންވަރަށް ބަލައި އިތުރު ރަށްރަށުގައިވެސް މިޚިދުމަތްދިނުމުގެ އިންތިޒާމުތައް ހަމަޖައްސަވާނެކަމަށެވެ.

"މަޝްރޫޢު ކުރިއަށްގެންދަން ރާވާފައިވަނީ ކޮންޓެއިނަރުގެ ޒަރިއްޔާއިން ތެޔޮ ފޯރުކޮށްދީގެން. މި ޚިދުމަތް ދޭނީ ޖެޓީ ސަރަހައްދުން،" ޝިމާދު ވިދާޅުވިއެވެ.

މި ރަސްމިއްޔާތުގައި މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙުމަދު ޝިޔާމް ވިދާޅުވީ މިއީ މަސްވެރިންނަށް ގިނަ ފަސޭހަތަކަކާއި ލުއިތަކެއް ލިބޭނެ ޚިދުމަތެއްކަމަށެވެ.

"އަގުބޮޑުކޮށް މަސްވެރިން ތެޔޮ ގަންނަންޖެހޭ ޖެހުމަށް، ދާއިމީ ޙައްލެއް ހޯދުމުގެ މަސައްކަތް މިފެށީ، މީގެ ކޮންމެ ތަނަކީ ގާތްގަނޑަކަށް 8 ނޫނީ 9 މިލިޔަން ރުފިޔާގެ އިންވެސްޓުމަންޓެއް، އަދި ޑިމާންޑު އޮތް މިންވަރަކުން ތަންތަން އިތުރުކުރާނެ." ވަޒީރު ޝިޔާމު ވިދާޅުވިއެވެ.

މި މަޝްރޫޢުގެ ދަށުން ފެލިވަރާއި ކޫއްޑޫގައިވެސް ތެޔޮ ރައްކާކުރާނެ ޒަމާނީ ތަންތަން ގާއިމުކޮށް މަސްވެރިންނަށް ފަސޭހައިން ތެޔޮ ފޯރުކޮށްދިނުމުގެ އިންތިޒާމު ހަމަޖެއްސުމަށްވަނީ ހަމަޖެހިފައެވެ.