ނ.ޢ.ވ ޢިއްޒަތް މޫސާ ޢަލީ ޖަލީލް ޚާއްޞަކުރެއްވީ 3 ނޮވެމްބަރުގެ ސިފައިންނަށް

މިއަހަރުގެ ނަޞްރުގެ ދުވަހު ރައީސުލްޖުމްހޫރިއްޔާ އެރުއްވި ނިޝާން ޢަސްކަރީގެ ވެރިކަމުގެ ޢިއްޒަތް ޚާއްސަކުރަނީ 3 ނޮވެންބަރު 1988ގައި ރާއްޖެއަށް ދިން ޢުދުވާނީ ހަމަލާއާއި ގުޅިގެން އެމަނިކުފާނުގެ ކޮމާންޑުކަމުގެ ދަށުން މަސައްކަތްކުރެއްވި ސިފައިންނަށްކަމަށް މޭޖަރ ޖެނެރަލް ރިޓަޔަރޑް މޫސާ އަލީ ޖަލީލް ވިދާޅުވެއްޖެއެވެ.

ސޯޝަލް މީޑިޔާގައި ޙިއްސާކުރެއްވި ޕޯސްޓެއްގައި މޫސާ ޢަލީ ޖަލީލް ވިދާޅުވީ 3 ނޮވެންބަރު 1988 ވަނަ ދުވަހު ރާއްޖެއަށް ދިން ޢުދުވާނީ ހަމަލާއާ ގުޅިގެން ކުރި ހަނގުރާމާގައި އޭނާގެ ކޮމާންޑުކަމުގެ ދަށުން މާލެ މަގުމައްޗަށް ޕެޓްރޯލްކުރަން ހިތްވަރުގަދަ ސިފައިންތަކެއް ނުކުންނެވި ކަމަށެވެ. އަދި ނަޞްރުގެ ދުވަހުގެ ޖަލްސާގައި ރައީސުލްޖުމްހޫރިއްޔާ އެރުއްވި ޢިއްޒަތް ޚާއްސަކުރަނީ ނޮވެންބަރުމަހުގެ 3 ވަނަ ދުވަހު ކޮމާންޑަކަމުގެ ދަށުން ނުކުންނެވި ސިފައިންނަށްކަމަށް މޫސާ ޢަލީ ޖަލީލް ވިދާޅުވިއެވެ.

މޫސާ ޢަލީ ޖަލީލްވަނީ 3 ދަހަރު ނުވަތަ ތިރީސް އަހަރަށްވުރެ ދިގު މުއްދަތަކަށް ދިވެހިރާއްޖޭގެ ޤައުމީ ދިފާޢީ ބާރަށް ކޮށްދެއްވި ޚިދުމަތް އަގުވަޒަންކޮށް ނިޝާން ޢަސްކަރީގެ ވެރިކަމުގެ ޢިއްޒަތް ރައީސުލްޖުމްހޫރިއްޔާ އެރުވިކަމަށްޓަކައި އެމަނިކުފާނަށާއި ދިފާޢީ ވަޒީރު މުޙައްމަދު ޣައްސާން މަޢުމޫނަށް ޝުކުރުދަންނަވާފައެވެ.

އަދި ނޮވެންބަރުމަހުގެ 3 ވަނަ ދުވަހު ދެއްވި ހިތްވަރަށްޓަކައި އޭރު ސިފައިންގޭގައި މަސައްކަތްކުރެއްވި އިސްވެރިންނަށާއި އޭރުގެ ރައީސުލްޖުމްހޫރިއްޔާ އަލްއުސްތާޛު މަޢުމޫން ޢަބްދުލްޤައްޔޫމަށްވެސް ނިޝާން ޢަސްކަރީގެ ވެރިކަމުގެ ޢިއްޒަތުގެ ވެރިޔާ މޫސާ ޢަލީ ޖަލީލް ޝުކުރު ދެންނެވިއެވެ.

Alhamdhu lillaahi, the President HE Dr Muizzu conferred the Grand Order of Military Honour (GOMH) on me.
Thank you Mr President.
I dedicate the esteemed Grand Order of Military Honour (GOMH) to :-
(1)The troops I commanded during the 3 Nov 88 Udhuvaanee Hamala…1

— General Jaleel (Rtd) (@GeneralJaleel) November 5, 2024

ދިވެހި ދައުލަތުގެ މަތިވެރި އިއްޒަތެއްކަމަށްވާ، ނިޝާން ޢަސްކަރީގެ ވެރިކަމުގެ އިއްޒަތް މޭޖަރ ޖެނެރަލް ރިޓަޔަރޑް މޫސާ އަލީ ޖަލީލަށް އެރުވީ ނަސްރުދުވަހުގެ ރަސްމީ ޖަލްސާގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.

"ނިޝާން އަސްކަރީގެ ވެރިކަން" (ނ.އ.ވ) މިއީ ގައުމާއި ރައްޔިތުންގެ ސަލާމަތަށްޓަކައި އަސްކަރީގޮތުން ސިފައިން ކުރާ ހިދުމަތަށާއި، ގައުމެއްގެއިސްތިގްލާލާއި ސިޔާދަތު ރައްކާތެރިކުރުމުގެ ގޮތުން ހާއްސަ މުހިންމު ހިދުމަތްތަކެއް ކޮށްފައިވާ މީހުންނަށާއި، ބައިނަލްއަގްވާމީ ފެންވަރެއްގައި އަސްކަރީގޮތުން ވިޔަސް، ހިދުމަތްކޮށްފައިވާ މީހުންނަށް ދެވޭ އިއްޒަތެކެވެ.

ނިޝާން އަސްކަރީގެ ވެރިކަމުގެ ޢިއްޒަތް، މޭޖަރ ޖެނެރަލް (ރިޓަޔަރޑް) މޫސާ ޢަލީ ޖަލީލަށް އެރުވުމަށް ރައީސުލްޖުމްހޫރިއްޔާ ކަނޑައެޅުއްވީ، ދިވެހި ޤައުމާއި ރައްޔިތުންގެ ސަލާމަތަށްޓަކައި އަސްކަރީ ގޮތުން ކުރެއްވި އަގުހުރި ޚިދުމަތްތަކާއި، ޤައުމުގެ އިސްތިޤްލާލާއި ސިޔާދަތު ރައްކާތެރިކޮށް ދެމެހެއްޓުމަށްޓަކައި ކޮށްދެއްވި މަސައްކަތްޕުޅުތަކާއި، ޚާއްޞަކޮށް، 1988 ނޮވެންބަރު މަހުގެ 3 ވަނަ ދުވަހު ރާއްޖެއަށް ކުރިމަތިވި ނުރައްކާތެރި ޢުދުވާނީ ޙަމަލާއާ ގުޅިގެން، ދިވެހި ޤައުމާއި ރައްޔިތުންގެ ދިފާޢުގައި ކުރެއްވި މަތިވެރި ޖިހާދުގެ އަގު ވަޒަންކުރެއްވުމުގެ ގޮތުންނެވެ.

ނިޝާން އަސްކަރީގެ ވެރިކަމުގެ ޢިއްޒަތް، މޭޖަރ ޖެނެރަލް (ރިޓަޔަރޑް) މޫސާ ޢަލީ ޖަލީލަށް އެރުވުމަށް، ރައީސުލްޖުމްހޫރިއްޔާ ނިންމަވާފައިވާއިރު، މީގެ ކުރިން އެމަނިކުފާނަށްވަނަށް ޖިހާދުގެ ރަތް މެޑަލާއި ދިގުމުއްދަތެއްގައި ޚިދުމަތް ކުރުމުގެ މެޑަލްވެސް ވަނީ ދެއްވާފައެވެ. ދިފާޢީ ވަޒީރުކަންވެސް ކުރައްވާފައިވާ މޭޖަރ ޖެނެރަލް މޫސާ ޢަލީ ޖަލީލަކީ ދިވެހިރާއްޖޭގެ ޤައުމީ ދިފާޢީ ބާރު ހަރުދަނާ ގޮތުގައި ބިނާކުރެއްވުމަށް، މުހިއްމު މަސައްކަތްޕުޅުތަކެއް ކުރައްވާފައިވާ ބޭފުޅެކެވެ.