ޑިޕްލޮމެސީ ކުރިއެރުވުމުގެ މަސައްކަތްތުގައި، ރާއްޖޭގެ ސަޤާފަތް މުހިންމު ދައުރެއް އަދާކުރާކަމަށް ޚާރިޖީ ވަޒީރު އަބްދުﷲ ޚަލީލް ވިދާޅުވީއެވެ. ވަޒީރު މިހެން ވިދާޅުވީ، ޑިޕްލޮމެޓުންނަށް އަމާޒުކޮށްގެން ޤައުމީ ޔުނިވަރސިޓީގައި ބޭއްވި ހަރަކާތެއްގައި ބައިވެވަޑައިގެން ވާހަކަފުޅުދައްކަވަމުންނެވެ.
މި ހަރަކާތަކީ ޤައުމީ ޔުނިވަރސިޓީގެ މާސްޓަރ އޮފް ޕޮލިޓިކަލް ސައެންސް އެންޑް އިންޓަނޭޝަނަލް އެެފެއާޒް ދަރިވަރުން ބޭއްވި ހަރަކާތެކެވެ. މި ހަރަކާތަކީ ރާއްޖޭގައި ހަރަކާތްތެރިވާ ޑިޕްލޮމެޓުންނަށް ރާއްޖޭގެ ސަޤާފަތާއި ގުޅޭ މައުލޫމާތު ދިނުމަށް ބޭއްވި ސެމިނާއެކެވެ. މިގޮތުން މި ސެމިނާގެ ދިވެހި ސަޤާފަތާއި ތަރީޙާއި ގުޅޭ މައުލޫމާތައި ދިވެހިންގެ ކެއިން ބުއިމުގެ އާދަތަކާއި ގުޅޭގޮތުން ޕްރެޒެންޓޭޝަންތައް ދީފައިވެއެވެ.
ޚާރިޖީ ވަޒީރު ޑރ. އަބްދުﷲ ޚަލީލް ވިދާޅުވީ، ރާއްޖެއަކީ މުއްސަނދި ސަޤާފަތެއް ލިބިފައިވާ ޤައުމެއް ކަމަށެވެ. އަދި އެ ސަޤާފަތަކީ އެހެން ޤައުމުތަކުގެ ސަޤާފަތްތަކާއި ގުޅުވައި، ތަފާތުތައް ނައްތާލުމަށް ބާރުއަޅާ ސަޤާފާތެއް ކަމަށް ވަޒީރު ވިދާޅުވިއެވެ. އަދި މި ކުރިއެރުވުމަކީ، ޤައުމުގެ އާދަކާދަތަކާއި ސަޤަފަތްތައް ބޭރުގެ ފަރާތްތަކަށް ދައްކާލުމަށްވުރެ ފުޅާކޮށް ކުރަންޖެހޭ މަސައްކަތެއް ކަމުގައި ވަޒީރު ފާހަގަކުރެއްވިއެވެ. މީގެ އިތުރުން ވަޒީރުވަނީ ރާއްޖޭގެ ޑިޕްލޮމެސީގެ މަސައްކަތުގައި ރާއްޖޭގެ ސަޤާފަތް މުހިންމު ދައުރެއް އަދާކުރައްވާ ކަމަށެވެ.
ވަޒީރު ޚަލީލް ވަނީ ސަޤާފީ ޑިޕްލޮމެސީގެ ތެރެއިން ބައެއް އާދަކާދައާއި ސަޤާފަތް ދަސްކުރުމަށް ފުރުސަތު ފަހިވެގެންދާ ކަން ފާހަގަކުރެއްވާފައެވެ. އެގޮތުން އެމަނިކުފާނުގެ އަމިއްލަފުޅު ތަޖުރިބާގައިވެސް ޤައުމެއްގެ ތަޖުރިބާތަކާއި ވާހަކަތައް ހިއްސާކުރުމުގެ މުހިންމުކަން ފާހަގަކުރެވިފައިވާކަމަށް ވަޒީރު ވިދާޅުވިއެވެ.
ދިވެހިރާއްޖޭގެ ސަޤާފަތް ހިމާޔަތްކޮށް އަންނަ އޮތް ޖީލުތަކަށް ފޯރުކޮށްދިނުމަށް އަދުގެ ސަރުކާރުން ވަރަށް ބޮޑު އިސްކަމެއް ދެއްވާކަމަށް ވަޒީރު، ޚަލީލް ވިދާޅުވިއެވެ. މިގޮތުން އެކަމަށް ޚާއްސަ ވުޒާރާއެއް އުފައްދަވައިގެން މަސައްކަތް ކުރަމުންދާއިރު، ސަރުކާރުގެ އެކި ސިޔާސަތުތަކުންވެސް މިކަން ފެނިގެންދާކަމަށް ޚަރިޖީ ވަޒީރުގެ ފާހަގަކުރެއްވިއެވެ.
ޚާރިޖީ ވަޒީރު ވަނީ ދިވެހި ސަޤާފަތް ދިވެހި ރާއްޖެއާ މެދު ބޭރުގެ ފަރާތްތައް ދެކޭގޮތް ބަދަލުކޮށްލާ ކަމަށެވެ. އަދި މިކަމުގެ ސަބަބުން، ވިޔަފާރިއާއި ފަތުރުވެރިކަމާއި ތަޢުލީމީ ދައިރާއަށް ފުރުޞަތު ލިބިގެންދާ ކަމަށް ވަޒީރު ވިދާޅުވިއެވެ.