މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) އިން އިންތިޒާމުކޮށްގެން ބޭއްވި ގައުމީ ބިލިއާޑް މުބާރާތުގެ ޓީމު އިވެންޓް ޗެމްޕިއަންކަން ދިވެހި ސިފައިންގެ ކުލަބުން ހޯދައިފިއެވެ.
މުބާރާތުގެ ޓީމު އިވެންޓުގެ ޗެމްޕިއަންކަން ޑީއެސްސީން ހޯދާފައިވަނީ ރޭ ކުޅުނު މުބާރާތުގެ އެންމެ ފޯރިގަދަވި އިވެންޓު ކަމަށްވާ ޓީމު އިވެންޓުގެ ފައިނަލުގައި ލޮރެންޒޯއާއި ވާދަކޮށް 3-2 ގޭމުން މެޗު ކާމިޔާބުކޮށްގެންނެވެ.
މި އަހަރުގެ ގައުމީ މުބާރާތުގެ ސިންގަލްސް އިވެންޓުތަކުގެ ތެރެއިން ފިރިހެން ސިންގަލްސް ޗެމްޕިއަންކަން ހޯދާފައިވަނީ މުޙައްމަދު ދުންޔާޒެވެ. އޭނާ ޗެމްޕިއަންކަން ހޯދީ ފައިނަލުގައި ހުސެއިން ފަޔާޒް ބަލިކޮށްގެންނެވެ. އަންހެން ސިންގަލްސް ޗެމްޕިއަންކަން އާމިނަތު ފާތީ ހޯދީ ފައިނަލުގައި ފަގީހާ އިބްރާހީމް ބަލިކޮށްގެންނެވެ.
ޑަބަލްސް އިވެންޓުތަކުގެ ތެރެއިން މިކްސް ޑަބަލްސް ޗެމްޕިއަންކަން ހޯދާފައިވަނީ ހަސަން ޝާޒް މުޙައްމަދާއި އާމިނަތު އަޒުރާގެ ޕެއާ އެވެ. މި ޕެއާ ޗެމްޕިއަންކަން ހޯދީ ފައިނަލުގައި މުޙައްމަދު އަކްސަމް ވަހީދާއި ދީނާ އަޙްމަދު ބަލިކޮށްގެންނެވެ. އަންހެން ޑަބަލްސް ޗެމްޕިއަންކަން ދީނާ އަޙްމަދާއި އައިޝަތު ޔަޝްފާގެ ޕެއާ ހޯދީ ފައިނަލުގައި އައިޝަތު އަލީ އާއި އާމިނަތު ފާތީ ބަލިކޮށްގެންނެވެ.
ފިރިހެން ޑަބަލްސް ޗެމްޕިއަންކަން ހޯދާފައިވަނީ މުޙައްމަދު ޝަރީފް އާއި މުޙައްމަދު ސަމީރުގެ ޕެއާ އެވެ. މި ޕެއާ ޗެމްޕިއަންކަން ހޯދާފައިވަނީ ފައިނަލުގައި އިސްމާއީލް ސުވެއިދު އާއި މުޙައްމަދު އަފީފްގެ ޕެއާ ބަލިކޮށްގެންނެވެ. ދެވަނަ ޑިވިޝަނުގެ ފިރިހެން ޗެމްޕިއަންކަން ހަސަން އުސްވަތުﷲ ހޯދާފައިވަނީ ފައިނަލުގައި އަބްދުﷲ އަފީފް ބަލިކޮށްގެންނެވެ.
މުބާރާތުގެ ވަނަވަނައަށް އިނާމު ހަވާލުކޮށްދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އާއި ދިވެހި ސިފައިންގެ ކުލަބުގެ ރައީސް ކާނަލް އަޙްމަދު ޒުބެއިރުގެ އިތުރުން ގައުމީ ފުޓުބޯޅަ ޓީމުގެ ކުރީގެ ކެޕްޓަން އަކްރަމް އަބްދުލްޢަނީ އެވެ.