ފަރުމަސްވެރިކަމަށް ދޫކުރާ ލޯނު 37 ފަރާތަކަށް ދޫކޮށްފި

ފަރުމަސްވެރިކަން ކުރާ ފަރާތްތަކަށް މި ސަރުކާރުން ދޫކުރާ ލޯނު މިހާތަނަށް 37 ފަރާތަކަށް ދޫކޮށްފައިވާކަމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ. ވަޒީރު މިހެން ވިދާޅުވީ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައެވެ.

ފަރުމަހުގެ މަސްވެރިކަމަށް ޚާއްސަކޮށްގެން އިފްތިތާހްކުރި މިލޯނަކީ އެސްޑީއެފްސީ އާއި އިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާގެ އެހީތެރިކަމާއެކު ތަޢާރަފްކުރި ލޯނެކެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަޙްމަދު ޝިޔާމް ވިދާޅުވީ، ފުރަތަމަ ފަރުމަސްވެރިކަމަށް ދޫކުރެވުނު ލޯނަކީ 30 މިލިއަން ރުފިޔާގެ ލޯނުގެ ފުރުސަތެއްކަމަށެވެ. މިއީ ރަހުނެއް ބަހައްޓަން ނުޖެހޭ ލޯނެއްކަމަށެވެ. ލޯނު ދައްކަން 10 އަހަރު ދުވަހަށް ބަހާލެވިފައި އޮތްކަމަށް ވަޒީރު ވިދާޅުވިއެވެ.

7 ލައްކަ ރުފިޔާއާއި ހަމައަށް ފަރުމަސްވެރިކަން ކުރާ ފަރާތްތަކަށް މި ލޯނު މެދުވެރިކޮށް ފައިސާ ލިބޭނެއެވެ. ވަޒީރު ވިދާޅުވީ މިހާތަނަށް ފަރުމަސްވެރިކަން ކުރާ 37 ފަރާތަކަށް ލޯނު ދޫކޮށްފައިވާކަމަށެވެ.

"121 ފަރާތުގެ ތެރެއިން 62 ފަރާތެއް އެޕްރޫވްވެފައި މިވަނީ. އޭގެތެރެއިން 37 ފަރާތަކަށް މިހާރު މިވަނީ ލޯނު ދޫކުރެވިފައި. މިއީ އަޅުގަނޑު ދެކޭގޮތުގައި ފަރުމަސްވެރިންނަށް ސަރުކާރަކުން މިހާތަނަށް ހުޅުވާލި އެންމެ ފަހި ފުރުސަތު" ވަޒީރު ވިދާޅުވިއެވެ.

ފަތުރުވެރިކަން ތަރައްޤީވަމުން އަންނައިރު ފަރުމަހަށް އޮންނަ ޑިމާންޑް އިތުރުވަމުންދާކަމަށާއި މިއީވެސް ކުރިއަރަމުން އަންނަ ސިނާއަތެއްކަމަށް ވަޒީރު ޝިޔާމް ވިދާޅުވިއެވެ. ފަރުމަސްވެރިންގެ ޝަކުވާތައް އަޑުއަހާލުމުން އިނގިގެންދިޔައީ މީގެކުރިން ފަރުމަސްވެރިންގެ ކަންބޮޑުވުންތަކަށް ސަރުކާރުތަކުން އެއްވެސް އިޖާބައެއް ދީފައެއް ނުވާކަންކަމަށް ވަޒީރު ޝިޔާމް ވިދާޅުވިއެވެ.