ޔުއެފާ ޗެމްޕިއަންސް ލީގުގައި ފްރާންސްގެ ލިލް އާއި އިޓަލީގެ ޔުވެންޓަސް ބައްދަލުކުރި މެޗު 1-1 ގެ ނަތީޖާއަކުން އެއްވަރުވެއްޖެއެވެ.
ލިލްގެ ދަނޑުގައި ކުޅުނު މި މެޗުގެ 27 ވަނަ މިނިޓުގައި ލިލްގެ ޑޭވިޑް ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ. އަދި މި ލަނޑަށް ފަހުވެސް އެ ޓީމަށް ވަނީ ލަނޑު ޖަހަން ރަގަޅު ފުރުސަތުތަކެއް ލިބި ބޭކާރުވެފަ އެވެ.
މި މެޗުގައި ޔުވެންޓަސް އިން ޖެހި ހަމައެކަނި ލަނޑު މެޗުގެ 60 ވަނަ މިނިޓުގައި އެ ޓީމަށް ލިބުނު ޕެނަލްޓީ އަކުން ކާމިޔާބު ކޮށްދީފައިވަނީ ވްލަހޮވިޗް އެވެ.
މި މެޗުގައި ޔުވެންޓަސް އިން ރަގަޅު ކުޅުމެއް ދައްކާ އިދިކޮޅު ޓީމަށް ވަނީ ނުރައްކާކޮށް ގިނަ ހަމަލަތަކެއް ފޮނުވާލާފަ އެވެ. އަދި އިތުރު ދެ ލަނޑު ކާމިޔާބުކުރި ނަމަވެސް ރެފްރީ ވަނީ އެ ދެ ލަނޑުވެސް އޮފްސައިޑް ކަމަށް ނިންމާފަ އެވެ.
މި ނަތީޖާ އާއިއެކު ޔުވެންޓަސް އަށް ޗެމްޕިއަންސް ލީގުގައި ކުޅުނު ހަތަރު މެޗުން ލިބިފައިވާ ހަތް ޕޮއިންޓާއެކު އޮތީ ތާވަލުގެ ދިހަވަނައިގަ އެވެ. އަދި ލިލް އަށް ލިބިފައިވަނީ 12 ވަނަ އެވެ.