ދެއްވަދޫ އަންހެނުން ކޮމިޓީގެ ބައި-އިލެކްޝަންގެ 3 ގޮނޑިވެސް ޕީއެންސީއަށް

ގއ. ދެއްވަދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީން ހުސްވި 3 ގޮނޑިއަށް ޕީޕަލްސް ނެޝަނަލް ކޮންގްރެސް، ޕީއެންސީގެ ކެންޑިޑޭޓުން އިންތިޚާބުވެއްޖެއެވެ.

މި ގޮނޑިތަކަށް ޕީއެންސީގެ ކެންޑިޑޭޓުން އިންތިޚާބުވީ، ބައި-އިލެކްޝަންގައި ވާދަކުރުމަށް ހުޅުވާލި ފުރުޞަތުގެ މުއްދަތު ހަމަވިއިރު، އިންތިޚާބުކުރަންޖެހޭ އަދަދަށް ކެންޑިޑޭޓުން ކުރިމަތިލާފާވާތީއެވެ. މިގޮތުން ދެއްވަދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށް އިންތިޚާބުވި 3 މެންބަރުންނަކީ ޙައްވާ ޢަލީދީދީއާއި ޒާހިރާ އިބްރާހީމާއި މަރްޔަމް ނަޢީމެވެ.

ދެއްވަދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބައި-އިލެކްޝަން ބޭއްވުމަށް އިލެކްޝަންސް ކޮމިޝަނުން ކަނޑައެޅުއްވީ އަންނަ މަހުގެ 14 ވަަނަ ދުވަހެވެ. ނަމަވެސް މިހާރު މި ބައި-އިލެކްޝަނެއް ނޯންނާއެވެ. ދެއްވަދޫ ބައި-އިލެކްޝަންގެ އިތުރުން ހދ. ކުރިނބީ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބައި-އިލެކްޝަން އަންނަ މަހުގެ 14 ވަނަ ދުވަހު ބޭއްވުމަށްވެސް އިލެކްޝަންސް ކޮމިޝަނުން ނިންމެވިއެވެ.

ކުރިނބީ ބައި-އިލެކްޝަންގައިވެސް އެ ރަށުގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށް 3 މެންބަރުން އިންތިޚާބުކުރާނެއެވެ. މި ބައި-އިލެކްޝަަންގައި ޕީއެންސީއާއި އިދިކޮޅު އެމްޑީޕީގެ 3 ކެންޑިޑޭޓުން ވާދަކުރެއެވެ.

ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް 2022 ވަނަ އަހަރު ގެނެސްފައިވާ އިޞްލާހުގައި ބުނެފައިވާގޮތުން، އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށް މެންބަރުން އިންތިޚާބުކުރުމުގެ ބައި-އިލެކްޝަންސް ބާއްވަންޖެހޭނީ އަހަރަކު އެއްފަހަރުއެވެ.