ތިލައުތުރު ފުޓްސަލް މުބާރާތް 2024 ގައި ބާރަށާއިި، ފިއްލަދޫ އަދި އިހަވަންދޫން ކުޅުނު ފުރަތަމަ މެޗުތައް ކާމިޔާބުކޮށްފިއެވެ.
ތިލަދުންމަތީ އުތުރުބުރީ އަތޮޅު ކައުންސިލުން އިންތިޒާމުކޮށްގެން ކުރިއަށްގެންދާ މި މުބާރާތް މި އަހަރު ބާއްވަނީ ކެލާގައެވެ. މި މުބާރާތުގައި ހއ. އަތޮޅުގެ 10 ޓީމެއް ބައިވެރިވެފައިވާއިރު، މުބާރާތް ކުރިއަށްދަނީ ދެ ގްރޫޕަކަށް ބަހާލައިގެންނެވެ.
ކެލާ ފުޓްސަލް ދަނޑުގައި މިއަދު ހަވީރު ކުޅުނު ގްރޫޕް އޭގެ މެޗުން ބާރަށް މޮޅުވީ އެންމެ ފަހުގެ ޗެމްޕިއަން ވަށަފަރު އަތުން 3-2 ގެ ނަތީޖާއަކުންނެވެ. މި މެޗުގެ ފުރަތަމަ ހާފުގައި ބާރަށުން ލީޑު ނެގިއިރު، މި ލަނޑު އެ ޓީމަށް ކާމިޔާބުކޮށްދިނީ މުޙައްމަދު ޝަމާއިލެވެ. އަދި ދެވަނަ ހާފުގައި ބާރަށުގެ ކެޕްޓަން އަބްދުﷲ މިސްބާހު ވަނީ އެ ޓީމަށް ލީޑު ފުޅާކޮށްދީފައެވެ. އޭގެ ފަހުން މި މެޗުގައި އަބްދުﷲ ސިނާން ކާމިޔާބުކުރި ލަނޑާއެކު ވަށަފަރުން ފަރަގުކުޑަކުރި ނަމަވެސް، އަޙްމަދު ޝަޒީމް ވަނީ ބާރަށަށް އަނެއްކާވެސް ލީޑު ފުޅާކޮށްދީފައެވެ. މި މެޗުގައި ވަށަފަރުން ކާމިޔާބުކުރި ދެވަނަ ލަނޑު އެ ޓީމަށް ޖަހައިދިނީ ސާޖިދު ރަޝީދެވެ.
މި މުބާރާތުގައި މިއަދު ހަވީރު ބައްދަލުކޮށްފައިވަނީ ގްރޫޕް ބީގައި ހިމެނޭ ތުރާކުނާއި ކެލާއެވެ. މި މެޗު ނިމުނީ ދެ ޓީމުން ކުރެ ޓީމަކަށް ލަނޑެއް ކާމިޔާބުނުކުރެވިއެވެ. އެކަމަކު މި މެޗުގައި ދެ ޓީމަށްވެސް ވަނީ ލަނޑު ޖަހާނެ ގިނަ ފުރުސަތުތަކެއް ލިބިގެންގޮސްފައެވެ.
މީގެ އިތުރުން މިރޭ ކުޅުނު ގްރޫޕް އޭގެ މެޗުން ފިއްލަދޫ މޮޅުވީ މުރައިދޫ އަތުން ފަހަތުން އަރައި 3-1 ގެ ނަތީޖާއަކުންނެވެ. މި މެޗުގައި މުރައިދޫން އެންމެ ފުރަތަމަ ލީޑު ނެގިއިރު، މި ލަނޑު އެ ޓީމަށް ކާމިޔާބުކޮށްދިނީ އިޔާން އަޙްމަދު ރަޝީދެވެ. އެކަމަކު ދެވަނަ ހާފުގައި ފިއްލަދޫގެ އަބްދުﷲ އިޚުވާން ވަނީ އެ ޓީމަށް ނަތީޖާ އެއްވަރުކޮށްދީފައެވެ. އަދި އޭގެ ފަހުން ފިއްލަދޫން ލީޑު ނެގީ އާދަމް އަބްދުލްރަހީމް ކާމިޔާބުކުރި ލަނޑާއެކުއެވެ. އަދި އެ ޓީމަށް ލީޑު ފުޅާކޮށްދިނީ މުޙައްމަދު ހުޝާމެވެ.
މި މުބާރާތުގައި މިރޭ ކުޅުނު ފަހު މެޗުގައި ގްރޫޕް ބީގައި ހިމެނޭ އިހަވަންދޫން ވަނީ ފަހަތުން އަރައި 3-1 ގެ ނަތީޖާއަކުން އުތީމު ބަލިކޮށްފައެވެ. މި މެޗުގެ ވަރަށް ކުރީކޮޅު އުތީމުން ލީޑު ނެގިއިރު، މި ލަނޑު އެ ޓީމަށް ޖަހައިދިނީ މުޙައްމަދު މަޒީނެވެ. އެކަމަކު ފުރަތަމަ ހާފު ނިމުމުގެ ކުރިން އިހަވަންދުން ވަނީ އެ ޓީމު ކޮޅަށް ނަތީޖާ އަނބުރާލާފައެވެ. އެގޮތުން މި ހާފުގައި އެ ޓީމުގެ ލަނޑުތައް ޖަހައިދިނީ ކެޕްޓަން މުޙައްމަދު މަދީހާޤއި އިބްރާހީމް ހާމިދެވެ. އަދި ދެވަނަ ހާފުގެ ފަހު ކޮޅުއ އިހަވަންދޫން ލީޑު ފުޅާކޮށްފައިވަނީ މުޙައްމަދު ސާނިއު ކާމިޔާބުކުރި ލަނޑުންނެވެ.