މިއީ ޤައުމުގެ ދިފާޢުގައި ތައްޔާރަށް އޮތް ލަޝްކަރެއް އޮތްކަން ދުނިޔެއަށް ދައްކަންވީ ވަގުތު: ދިފާޢީ ވަޒީރު

އަސްކަރިއްޔާގެ ކުރިއެރުމަށް ރައީސުލްޖުމްހޫރިއްޔާ ޑރ.މުޙައްމަދު ކުރައްވަމުން ގެންދަވާ މަސައްކަތްޕުޅާއެކު، މިއަދަކީ ދިވެހި މިނިވަންކަން ދިފާޢުކުރުމަށް ތައްޔާރަށް އޮތް ލަޝްކަރެއް އޮތްކަން މުޅި ދުނިޔެއަށް ދައްކަންވީ ވަގުތުކަމަށް ދިފާޢީ ވަޒީރު ޣައްސާން މަޢުމޫނު ވިދާޅުވެއްޖެއެވެ.

ވަޒީރު މިހެން ވިދާޅުވީ ނަސްރުގެ ދުވަހުގެ ރަސްމީ ޖަލްސާގައި ވާހަކަފުޅުދައްކަވަމުންނެވެ.

ނަސްރުގެ ދުވަހުގެ ރަސްމީ ޖަލްސާގައި ދެއްެކެވި ވާހަކަފުޅުގައި ދިފާޢީ ވަޒީރު ޣައްސާން މަޢުމޫނު ވަނީ 15 ވަރަކަށް އަހަރުގެ މެދުކެނޑުމަކަށްފަހު އަލުން، ނަސްރުގެ ދުވަސް ކުލަގަދަގޮތެއްގައި ޤައުމީ ފެންވަރެއްގައި ފާހަގަކުރަން ފެއްޓެވީތީ އެކަމަށްޓަކާ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުއަށް ޝުކުރު އަދާކުރައްވާފައެވެ.

ޣައްސާން ވިދާޅުވީ ނޮވެބަރު3ގެ އުދުވާނީ ޙަމަލާ ވެގެންދިޔައީ ދިވެހި އަސްކަރިއްޔާގެ ޤާބިލުކަން އިތުރުކުރަން ޖެހިފައިވާކަމުގެ ރަނގަބީލަށްކަންކަމަށެވެ. އޭރުން ފެށިގެން 20 އަހަރެއްހާ މުއްދަތަށްފަހު، ދެން އައި 15 ވަރަކަށް އަހަރު އެކަމަށް ދެމުންއައި ސަމާލުކަން ކުޑަވެފައި އޮތުމަށްފަހުން، އަލުން މި ދާއިރާއިން އަނެއްކާވެސް މަސައްކަތްތައް ފެއްޓެވީ މިދިޔަ އަހަރުގެ ނޮވެމްބަރުމަހުގެ 17ވަނަ ދުވަހުން ފެށިގެންކަމަށް ވަޒީރު ވިދާޅުވިއެވެ.

"ފަޚުރުވެރި ދިވެހި ސިފައިން. މިއަދަކީ މި ހަޤީގަތުގެ މައްޗަށް އިތުރަށް ފިކުރުކުރަންވީ ދުވަސް. ރައީސް ގެންނަމުންދާ ޒަމާނީ ވަސީލަތްތައް ޤައުމުގެ ދިފާއަށް އަތުރާލުމަށް ވިލަރެސްކުރަންވީ ދުވަސް. މިއަދަކީ ޤައުމަށް ވަފާތެރި ރައްޔިތުންނަށް އިޙްލާސްތެރި، އަމުރަށް ކިޔަމަންތެރި، ހަރަކާތްތެރިވުމުގައި ހުށިއާރު، ކެރޭ ހިވާގި، ގާބިލު، ދިވެހި މިނިވަންކަން ދިފާއުކުރުމަށް ތައްޔާރަށް އޮތް ލަޝްކަރެއް އޮތްކަން މުޅި ދުނިޔެއަށް ދައްކަންވީ ދުވަސް. މިއަދަކީ ނަފްސަށްވުރެ ޤައުމު އިސްކުރުމުގެ ޢަޒުމު އާކުރަންވީ ދުވަސް." ދިފާޢީ ވަޒީރު ޣައްސާން މައުމޫން ވިދާޅުވިއެވެ.

ދިފާޢީ ވަޒީރުގެ ވާހަކަފުޅުގައި ވަނީ ނޮވްމެބަރު 3ގެ އުދުވާނީ ހަމަލާއިން ނަސްެރު ހޯދުމުގައި ޝަހީދު ޙުސައިން އާދަމް ވެވަޑައިގެންނެވި ގުރުބާނީ ފާހަގަކުރައްވާފައެވެ. އަދި ރާއްޖޭގެ މިނިވަންކަމާއި ސިޔާދަތު ހިމާޔަތްކުރުމުގައި ސިފައިން ދެމިތިބޭނެކަމުގެ ޔަގީންކަންވެސް އެމަނިކުފާނު ދެއްވިއެވެ.

"ދިވެހި ރައްޔިތުންނަށް މިރޭ އަޅުގަނޑު ދޭ ޔަގީންކަމަކީ ދިވެހި އަސްކަރިއްޔާ ދެމިއޮތްހާ ހިނދަކު މި ރާއްޖޭގެ މިނިވަންކަމާ ސިޔާދަތާ އިސްތިޤްލާލު ޙިމާޔަތްކުރުމަށް، ސިފައިންގެ ހުވާގައި ވާގޮތަށް ލެޔާ ފުރާނައިން ޤުރުބާންވާނެކަމުގެ ޔަގީންކަން." ދިފާޢީ ވަޒީރު ޣައްސާން މައުމޫން ވިދާޅުވިއެވެ.

ނަސްރުގެ ދުވަހުގެ ރަސްމީ ޖަލްސާގައި ދައުލަތުގެ އިސްވެރިންނާއި ގިނަ އަދަދެއްގެ ސިފައިން ބައިވެރިވެވަޑައިގެންނެވިއެވެ.