ސީ-ޓު-އެއަރ: މަހެއްގެތެރޭ 400 ކޮންޓެއިނަރުގެ މުދާ ޤައުމުތަކަށް ފޮނުވުމުގެ ފުރުސަތު ރާއްޖެއަށް

ސީ-ޓު-އެއަރ ކާގޯ ޚިދުމަތުގައި، މަހެއްގެ މައްޗަށް 400 އަށްވުރެ ގިނަ ކޮންޓެއިނަރުގެ މުދާ ކަނޑުމަގުން ރާއްޖެ ގެނެސް، ވައިގެ މަގުން ދުނިޔޭގެ އެކި ގައުމުތަކަށް ފޮނުވުމުގެ ފުރުސަތު އެބައޮތް ކަމަށާއި، މިކަމާއި ގުޅޭ މަސައްކަތްތައް ކުރެވެމުންދާކަމަށް މޯލްޑިވްސް ޕޯޓްސް ލިމިޓެޑް، އެމްޕީއެލްގެ ސީއީއޯ މުހައްމަދު ވަޖީޙް އިބްރާހީމް ވިދާޅުވެއްޖެއެވެ.

ސޯޝަލް މީޑިއާގައި ކުރެއްވި ޕޯސްޓެއްގައި އެމްޕީއެލްގެ ސީއީއޯ މުޙައްމަދު ވަޖީޙް ވަނީ ރާއްޖޭގެ ނާޒުކު އިޤްތިޞާދު ހަރުދަނާކޮށް، އިޤްތިޞާދަށް ދިރުން ގެނެސްދޭނެ އިތުރު ސިނާޢަތްތައް އުފެއްދެވުމަކީ، ރައީސް ޑޮކްޓަރ މުޙައްމަދު މުޢިއްޒުގެ ވެރިކަން ފެށްޓެވުމާއެކު އެންމެ އިސްކަން ދެއްވި އެއް މަސައްކަތްޕުޅުކަން ފާހަގަކުރައްވާފައެވެ.

އެގޮތުން އެމަނިކުފާނުގެ ވެރިކަމަށް 1 އަހަރު ނުވަނީސް، "ސީ-ޓު-އެއަރ ކާގޯ" ނަމުގައި އިޤްތިޞާދަށް ދިރުން ގެނެސްދޭނެ އިތުރު ދާއިރާއަކުން މަސައްކަތް ފެށި، އެމަސައްކަތް ތަރައްގީވާން ފަށާފައިވާކަންވެސް ސީއީއޯ ވަޖީޙް ފާހަގަކުރެއްވިއެވެ.

ސީ-ޓު-އެއަރ ކާގޯގެ ޚިދުމަތަކީ، ކަނޑުމަގުން އަންނަ މުދާ، ޓްރާންސިޓުކޮށް ވައިގެ މަގުން ދުނިޔޭގެ އެހެން ގައުމުތަކަށް ފޮނުވުމެވެ. މިމަސައްކަތަކީ، ދުނިޔޭގެ ވަރަށް ގިނަ ގައުމުތަކުން ކުރަމުން އަންނަ، އަދި މިމަސައްކަތުން އެގައުމުތަކުގެ އިޤްތިޞާދަށް ބޮޑެތި މަންފާތަކެއް ލިބެމުން އަންނަ މަސައްކަތެކެވެ.

ދިވެހިރާއްޖޭގައި މިމަސަތްކަތް ފެށުމުގެގޮތުން މޯލްޑިވްސް ޕޯޓްސް ލިމިޓެޑާއެކު ފުރަތަމަ ފަހަރަށް އެއްބަސްވުމެއްގައި ސޮއިކުރެވުނީ މިއަހަރުގެ މާޗްމަހު ޓާކިޝް އެއަރ ލައިނާއެކުއެވެ. އެއަށްފަހު ފުރަތަމަ ކާގޯ ޝިޕްމަންޓް ފޮނުވީ މިއަހަރުގެ މެއިމަހުއެވެ.

މިވަގުތު ސީ-ޓު-އެއަރ ކާގޯ ޚިދުމަތުގައި ރާއްޖޭން ބޭރު ކުރެވޭ މުދަލަކީ، ބަނގްލާދޭޝްގައި އުފައްދާ އަންނައުނުގެ ބާވަތްތަކެވެ. ބަނގްލާދޭޝްގެ ގާމެންޓު އިންޑަސްޓްރީގެ ބޮޑު ޕަސެންޓޭޖެއް ވައިގެ މަގުން ފޮނުވަނީ ޔޫރަޕުގެ ގައުމުތަކަށެވެ. މިހާތަނަށް މިމުދަލުގެ ބޮޑު ބައެއް ދުނިޔޭގެ އެކި ގައުމުތަކަށް ގެންގޮސްފައިވަނީ، އިންޑިޔާ އާއި، ސްރީލަންކާ މެދުވެރިކޮށެވެ.

ރާއްޖޭގައި މިޚިދުމަތް ފެށިފަހުން މިކަމަށް ލިބޭ ތަރުހީބު ބޮޑުވެ، މިވީ ކުޑަ ދުވަސްކޮޅު ތެރޭ، މި ޚިދުމަތުގެ ޑިމާންޑު ވަނީ ވަރަށް ބޮޑަށް އިތުތުރުވެފައެވެ. އެގޮތުން ނިމިދިޔަ އޮކްޓޯބަރ މަހު އެކަނިވެސް، 96 ކޮންޓެއިނަރ (418 ޓަނުގެ މުދާ /34946 ދާގީނާ) ގެ މުދާ ވަނީ ވައިގެ މަގުން ރާއްޖޭން ބޭރަށް ފޮނުވާފައިވާ ކަމަށް ވަޖީޙު ވިދާޅުވިއެވެ. މިމަސައްކަތުގައި މިވަގުތު ރާއްޖެއަށް ދަތުރުކުރާ 7 އެއަރ ލައިނަކުން ވަނީ ބައިވެރިވެފައެވެ.

ވަޖީޙް ވިދާޅުވީ ރާއްޖޭގައި މިޚިދުމަތް ފުޅާވެ، މިކަމުގެ ޑިމާންޑު ބޮޑުވަމުންދާތީ، މިވިޔަފާރީގައި އުޅޭ މިސަރަހައްދުގެ ބައެއްގައުމުތައް ވަނީ ކަންބޮޑުވާން ފަށާފައިވާކަމަށެވެ.

ރާއްޖޭގައި މިޚިދުމަތް އިތުރަށް ފުޅާކޮށް، ކަސްޓަމަރުންގެ އިތުބާރު ހޯދުމަށް ކުރަމުންދާ މަސައްކަތްތަކުގެ ތެރެއިން ދާދި ފަހުން ވަނީ، އެމްޕީއެއްލްގެ ޓީމަކާއި، މިމަސައްކަތުގައި އިސްކޮށް އުޅުއްވާ، އެއްފަރާތްކަމަށްވާ، އިނަރ މޯލްޑިވްސްގެ ވެރިޔާ މުޙައްމަދު ފިރާޤާއެކު ބަނގްލާދޭޝްގެ ޗިޓަގޮންގއަށް ޒިޔާރަތްކޮށް ބަނގްލާދޭޝްގެ ގާމެންޓު ފެކްޓަރީތަކުގެ ވެރިންނާއެކު މަޝްވަރާކޮށްފައެވެ.

ވަޖީޙް ވިދާޅުވީ މިމަޝްވަރާތަކުން އެނގިގެންދިޔަ މުހިންމު އެއްކަމަކީ، މިކަން ރަނގަޅަށް ކުރެވޭ ގޮތް ވެއްޖެނަމަ، މަހެއްގެ މައްޗަށް 400 އަށްވުރެގިނަ ކޮންޓެއިނަރުގެ މުދާ ކަނޑުމަގުން ރާއްޖެ ގެނެސް، ވައިގެ މަގުން ދުނިޔޭގެ އެކި ގައުމުތަކަށް ފޮނުވުމުގެ ފުރުސަތު އޮތްކަން ކަމަށެވެ.
މިކަމަށްޓަކައި، (ކޮންޓއިނަރ ތައް ރާއްޖެ ގެނައުމަށްޓަކައި) ރާއްޖެއަށް ދަތުރު ކުރާ ޝިޕިންގ ލައިންތަކާއެކު ވާހަކަ ދެކެވެމުންދާ ކަމަށާއި، މިމަސައްކަތަށް ބޭނުންވާ، މެޝިނަރީތަކާއި އިކުއިޕްމަންޓުތައް ހަމަކޮށް، ކަސްޓަމަރުން ހިތްހަމަ ޖެހޭފަދަ ޚިދުމަތްތަކެއް ފޯރު ކޮށްދެވޭތޯ މަސައްކަތްކުރަމުންދާ ކަމަށް ވަޖީޙް ވިދާޅުވިއެވެ.

ވަޖީޙް ވިދާޅުވީ ކައިރި މުސްތަގުބަލެއްގައި ރާއްޖޭގެ އިޤްތިޞާދަށް އިތުރަށް ދިރުން ގެނެސްދޭނެ ސިނާޢަތަކަށް ވެގެން މިސިނާޢަތްވެގެންދިޔުމަކީ އްއްމީދެއު ކަމަށެވެ.