އިސްލާމީ މަރުކަޒަށް 40 އަހަރު ފުރުމާ ދިމާކޮށް މަރުކަޒު ސާފުކުރަން ފަށައިފި

އިސްލާމީ މަރުކަޒަށް 40 އަހަރު ފުރޭ މުނާސަބަތާއި ގުޅިގެން، އިސްލާމީ މަރުކަޒު ސާފުކޮށް ރީތިކުރުމުގެ މަސައްކަތް އިސްލާމީ ކަންތައްތަކާ ބެހޭ ވުޒާރާގެ މުވައްޒަފުން ކުރިއަށް ގެންގޮސްފިއެވެ.

މިއަދު ހެނދުނުން ފެށިގެން އެވުޒާރާގެ އިސްވެރިންނާއި، މުވައްޒަފުން ވަނީ އިސްލާމީ މަރުކަޒުގައި ކުލަ ލުމުގެ މަސައްކަތާއި، ގަސްބުރުތައް ސާފުކޮށް ރީތިކުރުމުގެ މަސައްކަތާއި، މުންނާރު ސާފުކުރުމާއި ކުނި އުކާލުމުގެ މަސައްކަތް ކުރިއަށް ގެންގޮސްފައެވެ.

މިގޮތުން މަރުކަޒުގެ ބަގީޗާތައް ރީތިކުރުމަށް ވުޒާރާގެ މުވައްޒަފުން ގަސް ހޯދާފައިވާކަން ފާހަގަކޮށްލެވެއެވެ. މީގެ އިތުރުން ހެޔޮ އެދޭ އެކި ފަރާތްތަކުންވެސް ވަނީ މި މަސައްކަތަށް އެހީތެރިކަން ފޯރުކޮށްދެއްވާފައެވެ. މި މަސައްކަތްތަކުގައި ވުޒާރާގެ ގިނަ އަދަދެއްގެ މުވައްޒަފުން ވަނީ ބައިވެރިވެފައެވެ.

އިސްލާމީ މަރުކަޒަށް 40 އަހަރު ފުރޭނީ މިމަހުގެ 11 ވަނަ ދުވަހުއެވެ. މަރުކަޒަށް 40 އަހަރު ފުރުން ފާހަގަކުރުމަށް އެކި ކަންކަން އަންނަނީ ރާވަމުންނެވެ.

އިސްލާމީ މަރުކަޒު ތަރައްޤީކޮށް ހުޅުވާފައިވަނީ 11 ނޮވެންބަރު 1984 ވަނަ އަހަރުގައެވެ. މި މަރުކަޒު ބިނާ ކުރެއްވުމަށްޓަކައި އިސްލާމީ އެކި ޤައުމުތަކުގެ އެހީތެރިކަން ރާއްޖެއަށް ލިބިފައިވެއެވެ. މަރުކަޒު ޢިމާރާތް ކުރުމުގެ މަސައްކަތްކުރީ ސަރުކާރުން ކޮންޓްރެކްޓް ކުރައްވައިގެން ގެންނެވި މެލޭޝިޔާގެ ބަޔެކެވެ. މައިގަނޑު މަސައްކަތްތައް ކުރީ ހަތަރު ކުންފުންޏަކުންނެވެ.

އިސްލާމީ މަރުކަޒުގެ ނަމޫނާ ތައްޔާރުކޮށް ކޮންސަލްޓިންގ އާރކިޓެކްޓެއްގެ މަސައްކަތް ކުރީ މެލޭޝިޔާގެ ޓުއާން ޙާޖީ ޙާޖީދާރު ބިން ޙާޖީ ޢަބްދުލްމަޖީދެވެ. އޭނާ ވަނީ މަސައްކަތުގެ އަގުން ބައެއް ދިވެހި ސަރުކާރަށް ހަދިޔާކުރައްވައިފައެވެ. އިސްލާމީ މަރުކަޒު ބިނާކުރުމުގެ މަސައްކަތް ވަކި މަޝްރޫޢެއްގެ ގޮތުގައި ހަމަޖައްސަވައި، އެ މަޝްރޫޢުގެ ކަންތައްތައް ހިންގަވަމުން ގެންދެވީ ރައީސުލްޖުމްހޫރިއްޔާ އެ ކަމަށް ކަނޑައެޅުއްވި ޚާއްސަ ޓީމަކުންނެވެ.

އިސްލާމީ މަރުކަޒުގައިވާ މިސްކިތުގައި ހަރުކޮށްފައިވާ ލަކުޑި ދޮރުތަކާއި، ދޮރުފަތްތައް ޖެހުމާއި، އެ ނޫންވެސް ވަޑާމުގެ މުހިންމު މަސައްކަތްތަކާއި، ފުރާޅު ހިޔާކުރުމުގެ މަސައްކަތްކޮށްފައިވަނީ ދިވެހީންނެވެ. މިސްކިތުގެ އެތެރެ ޒީނަތްތެރިކުރުމަށް ޓަކައި ކުރެހުންތަކާއި ލިޔުންތައް ކަނޑައިނަގައި، ކީހައި، ތަތްކުރުމުގެ މަސައްކަތްކުރީ ރާއްޖޭގެ ޒުވާން ފަންނާނުންގެ ބަޔެކެވެ. މިސްކިތުގައި ހަރުކޮށްފައިވާ ލިޔުންތަކުގެ އަޞްލުތައް ލިޔުއްވައިފައި ވަނީ ވެސް ރާއްޖޭގެ ލިޔުންތެރީންނެވެ. މިސްކިތުގެ ނަމާއި މިޙްރާބުގައިވާ ލިޔުންތައް ލިޔުއްވައިފައިވަނީ އޭރުގެ ރައީސުލްޖުމްހޫރިއްޔާ އަލްއުސްތާޛު މައުމޫން ޢަބްދުލް ޤައްޔޫމެވެ.