ރެއާލް މެޑްރިޑާއި ޔުވެންޓަސްއަށް މީގެ ކުރިން ކުޅެފައިވާ އިޓަލީގެ ޑިފެންޑަރު ފަބިއޯ ކަނަވާރޯ، ޑިޕޯޓިވޯ ލަ ކޮރޫނާގެ ކޯޗުގެ މަގާމަށް ގެނައުމަށް މަޝްވަރާކުރަމުންދާ ކަމަށް ފަހުގެ މީޑިއާ ޚަބަރުތައް ބުނެފިއެވެ.
އުމުރުން 51 އަހަރުގެ ކަނަވާރޯ އެންމެ ފަހުން ހުރީ ސެރިއޭގެ ކްލަބު އުދިނޭޒީގެ ކޯޗުގެ މަގާމުގައެވެ. އެ ކްލަބާއެކު ހަ މެޗެއްގައި ކޯޗެއްގެ ޒިންމާ އަދާކޮށް، ލީގުގައި މަގާމު ދެމެހެއްޓުމަށްފަހު ސީޒަން ނިމުމުން މިދިޔަ ޖޫން މަހު ވަނީ އެ މަގާމު ދޫކޮށްލާފައެވެ.
މިވަގުތު ސްޕެއިނުގެ ދެވަނަ ޑިވިޝަނުގައި ވާދަކުރަމުން އަންނަ ޑިޕޯޓިވޯގެ ހުސްވެފައިވާ ކޯޗުގެ މަގާމަށް ގެނައުމަށް އެންމެ އެކަށޭނަ ފަރާތަކީ ކަނަވާރޯ ކަމަށް އެ ޓީމުން ދެކެއެވެ. މިއާއެކު، މި ހަފްތާގެ ހުކުރު ދުވަހު ޑިޕޯޓިވޯ އިން ވަނީ އެކަމަށް ޝައުގުވެރިކަން ފާޅުކޮށް، މަޝްވަރާތައް ފަށައިފައެވެ.
އެހެންކަމުން، އެ ކްލަބުގެ އަމާޒަކީ ކުރިއަށް އޮތް ދުވަސްތަކުގައި ކަނަވާރޯ އާއެކު ބައްދަލުވުންތައް ބާއްވައި، އެއްބަސްވުމަކަށް އާދެވޭތޯ މަސައްކަތްކުރުން ކަމަށް ވެސް ސްޕެއިނުގެ މީޑިއާ ހަބަރުތައް ބުނެއެވެ. މިވަގުތަށް ބަލާއިރު، ބޮޑު ހުށަހެޅުމެއް ނެތްނަމަވެސް، އެ ޓީމުގެ ވިސްނުންހުރީ 2026 ވަނަ އަހަރު ނުވަތަ 2027 ގެ ނިޔަލަށް ދެމިގެންދާ ކޮންޓްރެކްޓެއްގައި އެއްބަސްވުމަކަށް އައުމެވެ.
ކުޅުންތެރިއެއްގެ ގޮތުގައި ގިނަގުނަ ކާމިޔާބީތަކެއް ހާސިލްކޮށްފައިވާ ކަނަވާރޯގެ ޕްރޮފެޝަނަލް ކެރިއަރުގައި ނާޕޮލީގެ ޔޫތު އުމުރުފުރާގެ ޓީމުތަކުން ވިދާލައި، ޕާމާގެ އިތުރުން އިންޓަ މިލާނާއި، ޔުވެންޓަސް އަދި ރެއާލްގައި ވެސް ވަނީ މޮޅު ކުޅުމެއްދައްކާފައެވެ. އޭގެފަހުން، ޔޫއޭއީގަ އާއި އިންޑިއާގަ ކުޅުމަށްފަހު އޭނާ ރިޓަޔާކުރީ 2012 ވަނަ އަހަރު އެވެ.
އަހަރުގެ މޮޅު ކުޅުންތެރިޔާއަށްދޭ ބެލަންޑިއޯ ހާސިލްކޮށްފައިވާ ކަނަވާރޯ ވަނީ 2006 ވަނަ އަހަރުގެ ފީފާ ވޯލްޑް ކަޕްގެ ޗެމްޕިއަންކަން ހޯދީ އިޓަލީ ޓީމުގައި މުހިއްމު ދައުރެއް އަދާކޮށްފައެވެ. އޭނާ ވަނީ ގައުމީ ޓީމަށް 136 މެޗު ކުޅެދީފައެވެ.
ކަނަވާރޯގެ ކޯޗިންގ ކެރިއަރުގައި މިހާތަނަށްއައިއިރު މާބޮޑު ކާމިޔާބީއެއް ހާސިލްކޮށްފައިނުވީނަމަވެސް އޭނާ ވަނީ ޗައިނާގެ ކްލަބުތައް ކަމަށްވާ، ގުއާންގޒޫ އެވަގްރާންޑޭ އާއި ޓިއާންޖިން ޓިއަންހާއީ އަދި ސައުދީ އަރަބިއްޔާގެ އަލް ނަސްރުގެ އިތުރުން ޗައިނާގެ ގައުމީ ޓީމަށާއި އިޓަލީގެ ބެނެވެންޓޯ އާއި އުދިނޭޒީ އަށް އިރުޝާދުދީފައެވެ.
ފަޚުރުވެރި ތާރީޚެއް އޮތް ޑިޕޯޓިވޯ އަކީ ސްޕެނިޝް ލީގުގެ ޗެމްޕިއަންކަން މިހާތަނަށް ހޯދާފައިވާ ނުވަ ކްލަބުގެ ތެރެއިން އެއްކްލަބެވެ. އަދި މީގެ ވިއްސަކަށް އަހަރުކުރިއަށް ބަލާއިރު، އެ ޓީމުން އައީ ގަވާއިދުން ޔުއެފާ ޗެމްޕިއަންސް ލީގުގައި ކުޅެމުންނެވެ. އެކަމަކު، 2018 ގެ ފަހުން ސްޕެއިނުގެ އެއްވަނަ ޑިވިޝަނުގައި އެ ޓީމު ވާދަކޮށްފައެއްނުވެއެވެ.
މިހާރު ދަރަނި ބޮޑުވެފައިވާ މި ކްލަބުގެ އައު މަޝްރޫޢުގެ ދަށުން ރައީސް ހުއާން ކާލޯސް އެސްކޮޓެޓް ވަނީ ކުރީގެ އާސެނަލް ކުޅުންތެރިއެއް ކަމުގައިވާ ޗާލީ ޕަޓީނޯ ފަދަ ޒުވާން އުއްމީދީ ކުޅުންތެރިން ގެނައުމުގައި ކާމިޔާބު ހޯދައިފައެވެ.
އެ ޓީމު މިވަގުތު އޮތީ 22 ޓީމު ހިމެނޭ ސްޕެއިނުގެ ދެވަނަ ޑިވިޝަނުގެ 20 ވަނައިގައެވެ. އެ ޓީމާ ރެލިގޭޝަނާ ދެމެދު އޮތީ އެންމެ ތިން ޕޮއިންޓްގެ ފަރަގެކެވެ.