އުއްމީދަކީ ކައުންސިލުތަކުގެ ޙިއްސާއާއި ދައުރު މިހާރަށްވުރެވެސް ފުޅާކުރުން: ވަޒީރު އާދަމް ޝަރީފް

އުންމީދަކީ ކައުންސިލުތަކަށް އޮންނަ ހިއްސާއާ ދައުރު މިހާރަށްވުރެ ވެސް ފުޅާވެގެންދިއުންކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ.

އެ މަނިކުފާނު މިހެން ވިދާޅުވީ "ކޮޅުމަޑުލު އިސްރަށްވެހިންގެ މަހާސިންތާ 2024" ހުޅުވައިދެއްވުމަށް އެއަތޮޅުގެ ވެރިރަށް ވޭމަންޑޫގައި ބޭއްވި ރަސްމިއްޔާތު ޝަރަފުވެރިކޮށްދެއްވާ ދެއްކެވި ވާހަކަފުޅުގައެވެ.

މި ރަސްމިއްޔާތުގައި ވަޒީރު އާދަމް ޝަރީފް ވިދާޅުވީ ސަރުކާރުގެ ފަރާތުން ކުރާ ކޮންމެ ކަމެއް ކުރުމުގައި ރައްޔިތުންނާ ހަމައަށް އައިސްގެން އެ ކަމެއް ކުރާ ކަމަށް ވާނަމަ، އެ ކަމެއްގައި ރަށްރަށުގެ ކައުންސިލްގެ ދައުރު އޮންނަންޖެހޭ ކަމަށާއި، ކައުންސިލުގެ ހިއްސާ އިތުރުވާންޖެހޭ ކަމަށާއި، އަދި އިތުރު ކުރަންޖެހޭ ކަމަށެވެ.

"ރަށްރަށުގައި ކުރާ ކަންތައްތައް އެއީ ނަރުދަމާ ކަމަށް ވިއަސްވެސް، އެއީ ފެނުގެ ޚިދުމަތް ކަމަށް ވިއަސްވެސް، ނުވަތަ ކަރަންޓުގެ ޚިދުމަތެއް ކަމަށް ވިޔަސްވެސް، ނުވަތަ އެ ރަށެއްގައި ދައުލަތުން ނުވަތަ ސަރުކާރުގެ ފަރާތުން ވަކި މުއައްސަސާއެއް ޤާއިމްކުރުން ކަމަށް ވިޔަސްވެސް، އެ ކަމެއް ކުރުމުގައި ރައްޔިތުންގެ ފަރާތުން ވާހަކަދައްކާ މަޝްވަރާކުރަން ތިބޭ ބަޔަކީ ކައުންސިލުތައް" ވަޒީރު ވިދާޅުވިއެވެ.

ވަޒީރު އާދަމް ޝަރީފު ވިދާޅުވީ މިހާރު ހިނގަމުންދާ ލާމަރުކަޒީ ނިޒާމު ތަޢާރަފުކުރެވިގެން ދިޔައީ ވެސް، އަދި މިހާ ހިސާބަށް މި އައިއިރު ވެސް ލާމަރުކަޒީ ނިޒާމަށް ބަދަލުގެނައުމަށްޓަކައި ޤާނޫނު އަސާސީ ވެސް ބަދަލުކޮށްފި ކަމަށް ވިދާޅުވިއެވެ. އަދި ލާމަރުކަޒީ ޤާނޫނަށް ވެސް ގިނަ އިޞްލާޙުތަކެއް މިހާރު ވެސް ގެނެވިއްޖެ ކަމަށް ވިދާޅުވިއެވެ.

ލާމަރުކަޒީ ނިޒާމު ރަނގަޅުކުރުމަށްޓަކައި ކޮންމެ ސަރުކާރަކުން ވެސް ގިނަ މަސައްކަތްތަކެއް ކުރައްވާފައިވާ ކަމަށާ، މި ނިޒާމު ފުރަތަމަ ތަޢާރަފުކުރެވުނު އިރުގައި ވެސް ނިޒާމުގައި ރަނގަޅުކުރަންޖެހޭ އެތައް ކަމެއް ހުރިކަން ވަޒީރު ފާހަގަކުރެއްވިއެވެ.

އެހެންނަމަވެސް އެ މަނިކުފާނު ވިދާޅުވީ ރައްޔިތުން ވޯޓުދީގެން، ރައްޔިތުންގެ ޙައްްޤުގައި ބަސްބުނަން ތިއްބެވި ބޭފުޅުންނަކީ ކައުންސިލަރުން ކަމަށް ވާތީ، ރައްޔިތުންގެ ހައްޤުގައި ވަކާލާތު ކުރުމުގެ ފުރުޞަތާއި، ރައްޔިތުން ބޭނުންވާ ކަންތައްތައް ވިދާޅުވުމުގެ ފުރުޞަތު ކައުންސިލަރުން އެބަ އޮތް ކަމަށެވެ. އަދި މިއަދު ކޮންމެ ނިންމުމެއް ނިންމަނީ މާލޭން ނޫން ކަމަށް ވެސް ވަޒީރުގެ ވާހަކަފުޅުގައި ވިދާޅުވިއެވެ.

ރޭ ފެށުނު ކޮޅުމަޑުލު އިސްވާރުންގެ މަހާސިންތާ 2024 ގައި ކޮޅުމަޑުލުގެ ރަށްރަށުގެ ކައުންސިލްތަކުގެ ރައީސުންނާއި، ސެކްރެޓަރީ ޖެނެރަލުންނާއި، އަތޮޅުގެ ކަންކަން ބަލަހައްޓަވައި ދައުލަތުގެ މުއައްސަސާތަކުގެ ވެރިންނާއި ޚާއްޞަ މަންދޫންނާއެކު ގާތްގަނޑަކަށް ސާޅީހަކަށް ބޭފުޅުން ބައިވެރިވެވަޑައިގަންނަވައެވެ. މި މަހާސިންތާ ނިމޭނީ މާދަމާއެވެ.