ޕީއެންސީގެ އިންތިޚާބު މިމަހުގެ 23 ވަނަ ދުވަހަށް ފަސްކޮށްފި
-
އިންތިޚާބު ބާއްވަން މީގެކުރިން ނިންމާފައި އޮތީ މިމަހުގެ 9 ވަނަ ދުވަހު
ވެރިކަންކުރާ ޕީޕަލްސް ނެޝަނަލް ކޮންގްރެސް، ޕީއެންސީގެ އެތެރޭގެ އިންތިޚާބު މިމަހުގެ 23 ވަނަ ދުވަހަށް ފަސްކޮށްފިއެވެ.
މީގެ ކުރިން މި އިންތިޚާބު ބޭއްވުމަށް ނިންމާފައި އޮތީ މިމަހުގެ 9 ވަނަ ދުވަހުއެވެ.
ޕީއެންސީން ނެރުނު ބަޔާނެއްގައި ބުނީ އެ ޕާޓީގެ އެތެރޭގެ އިންތިޚާބު ބާއްވާ ތާރީޚު ފަސްކޮށްފައިވަނީ، މިމަހުގެ 10 ވަނަ ދުވަހަކީ ރަސްމީ ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ ހަމަޖެއްސެވުމާ ގުޅިގެން ކަމަށެވެ.
މިމަހުގެ 10 ވާ އާދިއްތަ ދުވަހަކީ ރަސްމީ ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ ހަމަޖެއްސެވީ 11 ވަނަ ދުވަހަކީ ދިވެހިރާއްޖޭގެ ޖުމްހޫރީ ދުވަސްކަމަށްވެފައި 9 ވާ ހޮނިހިރު ދުވަހަކީ ހަފްތާ ބަންދު ދުވަހަކަށްވާތީއެވެ.
ޕީއެންސީން ބުނީ މިމަހުގެ 8 ވަނަ ދުވަހުން ފެށިގެން ލިބޭ 4 ދުވަހުގެ ބަންދުގައި ގިނަ ބަޔަކު ރަށުން ބޭރަށް ދަތުރުކުރަން ހަމަޖެހިފައިވާ ކަމަށެވެ. އެހެންކަމުން 9 ވަނަ ދުވަހު އިންތިހާބު ބާއްވައިފިނަމަ މެންބަރުންނަށް ވޯޓުލުމަށް ދަތިވާތީ ގިނަ އަދަދެއްގެ ކެންޑިޑޭޓުންނާއި ޕާޓީގެ މެންބަރުންގެ އެދެމުގެ މަތިން އިންތިޚާބު ބާއްވާ ތާރީޚު ފަސްކޮށްފައިވާކަމަށްވެސް ޕީއެންސީގެ ބަޔާނުގައިވެއެވެ.
ޕީއެންސީން ބުނީ އިންތިޚާބު ބާއްވާ ތާރީޚު ފަސްކުރުމާއި ގުޅިގެން އިންތިޚާބުކުރަންޖެހޭ މަޤާމުތަކާއި ކެންޑިޑޭޓުންގެ ނަންތަކުގެ އިތުރުން ވޯޓުލެވޭ މީހުންގެ ލިސްޓު ޢާންމުކުރާނީ މިމަހުގެ 10 ވަނަ ދުވަހު ކަމަށެވެ.
އިންތިޚާބު އިޢުލާންކޮށް، އިންތިޚާބުކުރާ މަޤާމުތަކަށް ކުރިމަތިލާން ޕީއެންސީން ހުޅުވާލީ މިދިޔަ ސެޕްޓެންބަރުމަހުގެ 11 ވަނަ ދުވަހުއެވެ. އިންތިހާބަށް ކުރިމަތިލާން ހުޅުވާލި މުއްދަތު މިދިޔަ މަހުގެ 24 ވަނަ ދުވަހު ވަނީ ހަމަވެފައެވެ.
ޕީއެންސީގެ އެތެރޭގެ އިންތިޚާބު ވާނީ މިހާތަނަށް ރާއްޖޭގައި ސިޔާސީ ޕާޓީއަކުން ބާއްވާ އެންމެ ބޮޑު އިންތިޚާބަށްކަމަށް އެ ޕާޓީ ބުނެއެވެ. އެގޮތުން މި އިންތިޚާބުގައި ޖުމްލަ 2095 މަޤާމަކަށް މެންބަރުން އިންތިޚާބުކުރާނެކަމަށް އެ ޕާޓީން ބުނެއެވެ.
އިންތިޚާބުކުރާ މަޤާމުތަކުގެ ތެރޭގައި ދާއިރާތަކުގެ ރައީސުންނާއި ނައިބުރައީސުން އަދި ރަށްރަށުގެ ޒުވާނުންގެ ހަރަކާތުގެ ރައީސުންނާއި ރަށްރަށުގެ އަންހެނުންގެ ހަރަކާތުގެ ރައީސުންނާއި ސްޓިއަރިން ކޮމިޓީތަކުގެ މެންބަރުން ހިމެނެއެވެ.