ބޭރުގައި ކިޔަވާ ދަރިވަރުންނަށް ޑޮލަރު ލިމިޓް ބޮޑުކުރަން ޚާއްސަ ޕޯޓަލްއެއް

ރާއްޖެއިން ބޭރުގައި ކިޔަވާ ދަރިވަރުންނަށް ބޭންކް އޮފް މޯލްޑިވްސް، ބީއެމްއެލްއިން ދޭ ޑޮލަރު ލިމިޓް ބޮޑުކުރަން ބޭނުންވާ ދަރިވަރުންނަށް އެކަމަށް ޚާއްސަ ޕޯޓަލްއެއް ހަމަޖައްސައިފިއެވެ. މި ޕޯޓަލްއަށް ރަޖިސްޓަރ ކޮށްގެން ދަރިވަރުންނަށް ޑޮލަރ ލިމިޓް 1200 ޑޮލަރަށް ބޮޑުކުރެވޭނެއެވެ.

ބީއެމްއެލް އިން ބުނީ، ޕޯޓަލްގައި ރަޖިސްޓްރީ ވުމަށް ޕާސްޕޯޓާއި ސްޓޫޑަންޑް ވިސާ އާއި ޔުނިވާސިޓީ އެންރޯލްމެންޓް ލެޓާ ބޭނުންވާނެ ކަމަށެވެ. ލިމިޓު އިތުރު ކޮށްދޭން ނަގާނީ މަސައްކަތު 1 ދުވަހެވެ.

ރާއްޖެއިން ބޭރުގައި ކިޔަވާ ދަރިވަރުންނަށް ބީއެމްއެލްގެ ރުފިޔާ ޑެބިޓް ކާޑުތަކުން ޑޮލަރު ލިބޭ މިންވަރު ބޮޑުކުރަން ސަރުކާރުން ނިންމެވީ މިދިޔަ މަހުގެ 23 ވަނަ ދުވަހުއެވެ. އެއިރު ބުނެފައިވަނީ ނޮވެމްބަރ 1 ވަނަ ދުވަހުން ފެށިގެން ލިމިޓް ބޮޑުވާނެކަމަށެވެ. ކުރިން ރާއްޖެއިން ބޭރުގައި ކިޔަވާ ދަރިވަރުންނަށް ލިބެނީ 750 ޑޮލަރެވެ.

ބީއެމްއެލް އިން ބުނީ، ރަޖިސްޓަރވުމުން ޑެބިޑް ކާޑުގެ ލިމިޓު 1،200 ޑޮލަރަށް އިތުރު ކުރެވޭނެ ކަމަށާއި އެކަން އެނގޭނެ ނޮޓިފިކޭޝަނެއް މޯބައިލް އެޕްލިކޭޝަނަށް އަންނާނެކަމަށެވެ.

ރާއްޖެއިން ބޭރުގައި ކިޔަވާ ދަރިވަރުންނަށް ބީއެމްއެލްގެ ޑެބިޓް ކާޑު މެދުވެރިކޮށް ޑޮލަރު ނެގޭ މިންވަރު 1200 ޑޮލަރަށް އިތުރުކުރުމަށް އެބޭންކުން ނިންމިކަން އިއުލާންކުރީ އޮކްޓޫބަރު މަހުގެ ތެރޭގައެވެ.

ބޭރުގައި ކިޔަވާ ދަރުވަރުންނަށް ޑޮލަރު ލިމިޓް ބޮޑުކުރުންފަދަ ދިވެހި ރައްޔިތުންގެ ލާބަޔާއި މަންފާއަށްޓަކައި، އަދި ރައްޔިތުންނަށް ދަތިވާ ކަންކަން ޙައްލުކޮށްދެއްވުމުގައި، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު، ކަނޑައަޅުއްވާ ސިޔާސަތުތައް ތަންފީޒުކުރުމަށް ބޭންކް އޮފް މޯލްޑިވްސްއިން ދެއްވާ އެއްބާރުލެއްވުމުގެ މުހިއްމުކަން ސަރުކާރުންވަނީ ފާހަގަކުރައްވާފައެވެ.

ސަރުކާރުން ވަނީ ޤައުމުގެ ތަރައްޤީއާއި ރައްޔިތުންގެ ފުދުންތެރިކަން އިތުރުކޮށްދީ، މާލީ މުޢާމަލާތްތައް ފަސޭހަކޮށްދިނުމުގައި ބޭންކް އޮފް މޯލްޑިވްސްގެ ދައުރު ފުޅާކުރުމަށް އަބަދުވެސް ވާގިވެރިވަމުން ދާނެކަމުގެ ޔަގީންކަން ދެއްވާފައެވެ. އަދި ދައުލަތުގެ ޚަރަދުތަކާއި ދަރަނި ކުޑަކޮށް، ދައުލަތަށް ލިބޭ އާމުދަނީގެ މަންފާ ރައްޔިތުންނަށް އިތުރުވަމުންދާނެ ތިޔާގި ދުވަސްތަކެއް ޤައުމަށް ހޯދައިދިނުމަށް ސަރުކާރުން އަޅަން ފަށާފައިވާ އިޞްލާޙީ ފިޔަވަޅުތައް ހަރުދަނާކަންމަތީ ދެމެހެއްޓުމަށް ސަރުކާރުން އަބަދުވެސް އިސްކަން ދެމުން ގެންދާނެކަމަށްވެސް ސަރުކާރުން ވަނީ ބުނެފައެވެ.