ގައުމީ ޓީމަކަށް އިރުޝާދުދިނުމުގެ ފުރުސަތު ލިބިއްޖެނަމަ އެކަމާ މެދު ވިސްނާނެ ކަމަށް ދާދިފަހުން ރިޓަޔާކުރި ކޯޗު ކްލައުޑިއޯ ރަނިއޭރީ ބުނެފިއެވެ.
އުމުރުން 73 އަހަރުގެ ރަނިއޭރީ މިހެން ބުނީ، އިޓަލީގެ ނޫހެއް ކަމަށްވާ، ޑެލާ ސެރާ ޑެއިލީ އަށް ދިން އިންޓަވިއުއެއްގައެވެ.
"މީގެކުރީން، އެތައް ފުރުސަތުތަކަކަށް 'ނޫނެކޭ' ބުނެފައި ވީނަމަވެސް، އަލުން ކޯޗިންގެ ތެރެއަށް ނުކުންނަން ބޭނުންވާ ކަމަށް އަހަރެން އިޢުތިރާފުވަން،" ރަނިއޭރީ ދިން އިންޓަވިއުގައިވެއެވެ.
"ދެން ބަލަމާ ހިނގާ ގައުމީ ޓީމަކުން ގުޅައިފާނެތޯ." ރަނިއޭރީ ބުނެފައިވެއެވެ.
އެހެންނަމަވެސް އޭނާ އިޓަލީގެ ވަޒީފާ ބަލައިނުގަންނާނެ ކަމަށާއި، މިހާރުގެ އިޓަލީގެ ކޯޗު، ލޫސިއާނޯ ސްޕަލެއްޓީ އަށް ފުރިހަމަ އިތުބާރު އެބައޮތް ކަމަށް ރަނިއޭރީގެ ވާހަކައިގައި ވަނީ ފާހަގަކޮށްފައެވެ.
މިދިޔަ މެއި މަހު ރިޓަޔާކުރި ރަނިއޭރީ ވަނީ، 2016 ވަނަ އަހަރުގެ ޕްރިމިއާ ލީގު ލެސްޓާ ސިޓީ އަށް ކާމިޔާބުކޮށްދިނުމަށްފަހު ދުނިޔެއަށް ސިހުން ގެނެސްފައެވެ.
ރަނިއޭރީގެ ކޯޗިންގ ކެރިއަރުގައި ޗެލްސީ އާއި ޔުވެންޓަސްގެ އިތުރުން އެތުލެޓިކޯ މެޑްރިޑާއި އިންޓަ މިލާން، އޭއެސް ރޯމާ އަދި މޮނާކޯ ފަދަ ޔޫރަޕްގެ ވަރުގަދަ ކްލަބުތަކަށް ވަނީ އިރުޝާދުދީފައެވެ. ރަނިއޭރީ އެންމެ ފަހުން ކޯޗުކޮށްދީފައިވަނީ، ކަލިއާރީ އަށެވެ.