ހުޅުމާލޭގައި ޤަވާއިދާ ޚިލާފަށް އުޅެމުންދިޔަ 5 ބިދޭސީއަކު އިމިގްރޭޝަންގެ ބެލުމުގެ ދަށަށް

ހުޅުމާލޭގައި ގަވާއިދާ ޚިލާފަށް އުޅެމުންދިޔަ 5 ބިދޭސީއަކު މޯލްޑިވްސް އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.

އިމިގްރޭޝަނުން ވިދާޅުވީ ހުޅުމާލޭގައި ވެހިކަލް ދޮވެ ސާފުކުރުމަށް ބިދޭސީން ތިބޭ 5 ސަރަހައްދެއް ބަލައި ފާސްކޮށްފައިވާ ކަމަށެވެ. އަދި ސައްހަ ވިސާ ނެތި ގަވާއިދާ ޚިލާފަށް އުޅުނު 5 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފައިވާކަމަށް އިމިގްރޭޝަނުން ވިދާޅުވެއެވެ.

ހުޅުމާލޭގައި ވެހިކަލް ދޮވެ ސާފުކުރުމަށް ބިދޭސީން ތިބޭ 05 ސަރަހައްދެއް އިއްޔެ ވަނީ ބަލައި ފާސްކޮށްފައި. އަދި ގަވާއިދާ ހިލާފަށް ސައްހަ ވިސާއެއް ނެތި އުޅެމުންދިއަ 05 ބިދޭސީއަކު ވަނީ އިމިގްރޭޝަންގެ ބެލުމުގެ ދަށަށް ގެނެވިފައި. pic.twitter.com/jrLzWn78VV

— Maldives Immigration (@ImmigrationMV) October 31, 2024

ރާއްޖޭގައި ބޮޑުވެފައިވާ ބިދޭސީންގެ މައްސަލަ ހައްލުކުރުމަށް ކުރާ މަސައްކަތުގެ ދަށުން ގަވާއިދާ ޚިލާފަށް އުޅޭ ބިދޭސީންގެ ތެރެއިން 5000 މީހުން ފޮނުވާލަން މިއަހަރު ވަނީ އަމާޒު ހިފާފައެވެ. އަދި އެގޮތުން މިހާތަނަށް ގަވާއިދާ ޚިލާފަށް އުޅުނު 4000އަށް ވުރެ ގިނަ ބިދޭސީން އަނބުރާ ގައުމަށް ފޮނުވާލާފައިވާކަމަށް އިމިގްރޭޝަނުން ވިދާޅުވެއެވެ. މީގެ ތެރޭގައި ގަވާއިދާ ޚިލާފަށް އުޅުމުގެ ސަބަބުން އިމިގްރޭޝަންގެ ބެލުމުގެދަށަށް ގެންދިޔަ ފަރާތްތަކާއި އަމިއްލައަށް ފުރަން ބޭނުން ވެގެން އެކަމަށް އެދިގެން ފުރުވާލި ފަރާތްތަކުގެ އިތުރުން އިމިގްރޭޝަނުން ނޯޓިސްދިނުމަށްފަހު ފުރުވާލެވުނު ފަރާތްތައް ހިމެނެއެވެ.

ރާއްޖޭގައި ބޮޑުވެފައި އޮތް ބިދޭސީންގެ މައްސަލަ ހައްލުކުރުމަށް އެކި ސަރުކާރުތަކުން މަސައްކަތްކޮށްފައިވީނަމަވެސް މިކަމަށް އެދެވޭ ނަތީޖާއެއް ވަނީ ނުލިބިއެވެ. އެހެންނަމަވެސް މި ސަރުކާރުން އަޅަން ފެށި ހަރުކަށި ފިޔަވަޅުތަކާއެކު މިމައްސަލައަށް އެދެވޭ ނަތީޖާއެއް ދަނީ ފެންނަމުންނެވެ.