ސިޔާސީ މަގާމެއް އަދާކުރައްވާ ބޭފުޅަކަށް ދައުލަތާ ދެކޮޅަށް ވަކާލާތު ނުކުރެވޭނެ: ހައިކޯޓު
-
މި މައްސަލާގައި ބަންޑާރަ ނައިބު ދެކެވަޑައިގަންނަވާ ގޮތް ސާފުކުރެއްވި
ރައީސުލްޖުމްހޫރިއްޔާ އައްޔަންކުރައްވާފައިވާ ސިޔާސީ މަގާމެއްގައި ހުންނަވާ ބޭފުޅަކަށް ވަކީލެއްގެ ގޮތުން ދައުލަތާ ދެކޮޅަށް ވަކާލާތު ނުކުރެވޭނެކަމަށް ހައި ކޯޓުން މިއަދު ކަނޑައަޅުއްވައިފިއެވެ.
ހައިކޯޓުން މިގޮތަށް ކަނޑައެޅުއްވީ، ދައުލަތުން ދައުވާކުރާ މައްސަލައެއްގައި ހިމެނޭ މީހެއްގެ ދިފާޢީ ވަކީލެއްގެ ގޮތުގައި ސިޔާސީ މަޤާމެއްގައި ހުންނެވި ބޭފުޅަކު މަސައްކަތް ކުރައްވާުތީއެވެ.
ހައިކޯޓުގައި ކުރިއަށްދާ މި މައްސަލާގައި ޕްރޮސެކިއުޓަރ ޖެނަރަލްގެ އޮފީހުގެ ފަރާތުން ވަނީ ރައީސުލްޖުމްހޫރިއްޔާ އައްޔަންކުރައްވާފައިވާ ޑެޕިއުޓީ މިނިސްޓަރަކު ދައުލަތާ ދެކޮޅަށް ވަކާލާތު ކުރުމަކީ ކުރެވިގެންވާނެ ކަމެއް ނޫން ކަމަށް ވިދާޅުވެ، ޝަރީއަތުގައި އެ މައްސަލަ ފާހަގަކުރައްވާފައެވެ.
އެކަމާއި ގުޅިގެން ހައި ކޯޓުގައި ބޭއްވި އަޑުއެހުމުގައި ފަނޑިޔާރުންގެ ބެންޗުން ވަނީ ދައުލަތުގެ މުވައްޒަފަކު ދައުލަތާ ދެކޮޅަށް ވަކާލާތު ކުރުމުން މަސްލަހަތު ފުށުއަރާތީ އެކަމުގައި ސަރުކާރުގެ ސިޔާސަތަކީ ކޮބައިތޯ ބަންޑާރަ ނައިބުގެ އޮފީހާ ސުވާލުކުރައްވާއެވެ.
ބަންޑާރަ ނައިބުގެ އޮފީހުން ކޯޓުގައި ދެއްވި ޖަވާބުގައި ވިދާޅުވީ ސިޔާސީ މަގާމެއްގައި ހުރެ ދައުލަތާ ދެކޮޅަށް ކޯޓުގައި ވަކާލާތުކުރުމަކީ ސަރުކާރުގެ މަސްލަހަތާ ދެކޮޅަށް މަސައްކަތް ކުރުން ކަމަށެވެ. އަދި އެފަދަ މަގާމެއްގައި ހުރި މީހެއްގެ އެންމެ މުހިންމު ކަމަކަށް ވާން ޖެހޭނީ ދައުލަތުގެ މަސްލަހަތު އިސްކުރުން ކަމަށްވެސް ބަންޑާރަ ނައިބުގެ އޮފީހުން ވިދާޅުވިއެވެ.
މި މައްސަލަ ރައްދުވާ ވަކީލު ވިދާޅުވީ ސިޔާސީ މަގާމެއްގައި ހުރުމަކީ މައްސަލައެއްގައި ވަކާލާތު ކުރުމަށް އޮތް ހުރަހެއް ކަމަށް ދެކެވަޑައިނުގަންނަވާ ކަމަށެވެ.
ހުރިހާ ފަރާތަކުން ދެއްކި ވާހަކަތަކަށްފަހު މި މައްސަލަ ބައްލަވާ ހައި ކޯޓުގެ ތިން ފަނޑިޔާރުންގެ ބެންޗުގެ އިއްތިފާގުން ނިންމެވީ ރައީސުލްޖުމްހޫރިއްޔާ އައްޔަންކުރައްވާފައިވާ ސިޔާސީ މަޤާމެއްގައި ހުންނަވައިގެން ދައުލަތާ ދެކޮޅަށް ވަކާލާތު ނުކުރެވޭނެ ކަމަށެވެ.