ޕްރައިވެޓް އިންޝުއަރެންސަށް އިސްކަންދޭގޮތަށް އާސަންދައިން ގެނައި ބަދަލުތައް އާއްމުކޮށްފި

އަމިއްލަ އިންޝުއަރެންސް ސްކީމްތަކަށް އިސްކަންދޭގޮތަށް، އާސަންދަ އައުޓްޕޭޝަންޓް ޚިދުމަތަށް ގެނައި ބަދަލުތައް އާސަންދަ ކުންފުނިން އާއްމުކުރައްވައިފިއެވެ.

އާސަންދަ ކުންފުނިން ވިދާޅުވީ މި ބަދަލުތަކަކީ ދެމެހެއްޓެނިވި ގޮތެއްގައި އާސަންދަ ސްކީމްގެ ޚިދުމަތްތައް ދިނުމަށްޓަކައި ނޭޝަނަލް ސޯޝަލް ޕްރޮޓެކްޝަން އެޖެންސީއިން ދީފައިވާ އިރުޝާދާ އެއްގޮތަށް، އާސަންދަ ސްކީމްގެ އިސްލާޙީ މަސައްކަތުގެ ތެރެއިން ގެންނަން ނިންމި ބަދަލެއްކަމަށެވެ. އެގޮތުން 2024 ނޮވެންބަރު 1 ވަނަ ދުވަހުން ފެށިގެން އައުޓްޕޭޝަންޓް (އެނދުމަތި ނުކޮށްދެވޭ ފަރުވާ) ޚިދުމަތްތަކަށް އާސަންދައިގެ ޚިދުމަތް ފޯރުކޮށްދިނުމުގައި، ޚިދުމަތް ހޯދާ ފަރާތަކީ އަމިއްލަ އިންޝުއަރެންސެއް އޮތް ފަރާތެއްނަމަ، އެ އިންޝުއަރެންސަށް އިސްކަންދިނުމަށް ނިންމާފައިވާކަމަށެވެ.

1 ނޮވެމްބަރުން ފެށިގެން އެގޮތަށް ޢަމަލުކުރުމަށް އާސަންދަ ސްކީމުގެ ދަށުން ޚިދުމަތްދޭ ހުރިހާ މަރުކަޒުތަކަށް މިހާރު ވާނީ އަންގާފައެވެ.

އާސަންދައިގެ ދަށުން ގެންނަން ނިންމި ބަދަލުތައް:

• 1. ޞިއްޙީ ޚިދުމަތް ހޯދުމަށް އަންނަ ފަރާތަކީ އަމިއްލަ އިންޝުއަރެންސެއް އޮތް ފަރާތެއްނަމަ، ޚިދުމަތުގެ މެމޯ ތައްޔާރުކުރުމުގެ ކުރިން، އެކަން ކަށަވަރުކޮށް އެ އިންޝުއަރެންސްގެ ކަވަރޭޖް ލިމިޓް ހަމަވަންދެން އެ އިންޝުއަރެންސް މެދުވެރިކޮށް ޚިދުމަތް ފޯރުކޮށްދިނުން.
• 2. ހޯދަން އެދޭ ޚިދުމަތަކީ އަމިއްލަ އިންޝުއަރެންސުން ކަވަރކުރާ ޚިދުމަތެއްނަމަ، އެ އިންޝުއަރެންސް މެދުވެރިކޮށް ޚިދުމަތް ފޯރުކޮށްދިނުން (އެންމެހައި ޚިދުމަތްތަކާއި ބޭސްސިޓީ ހިމެނޭގޮތަށް).
• 3. މިހާރު ޢަމަލުކުރަމުންދާ އުޞޫލާ އެއްގޮތަށް، އައުޓް ޕޭޝަންޓް ޚިދުމަތްތަކަށް އަމިއްލަ އިންޝުއަރެންސާއެކު އާސަންދައަށް ބިލްނުކުރުން.
• 4. އަމިއްލަ އިންޝުއަރެންސްގެ ދަށުން ނުލިބޭ ޚިދުމަތެއް، އާސަންދައިން ލިބޭނަމަ، އެ ޚިދުމަތެއް އާސަންދައިގެ ދަށުން ފޯރުކޮށްދިނުން.
• 5. އަމިއްލަ އިންޝުއަރެންސްގެ ކަވަރޭޖް ލިމިޓް ހަމަވެފައިވާނަމަ އަދި އާސަންދައިން އެ ޚިދުމަތެއް ލިބޭނަމަ، އެ ޚިދުމަތެއް އާސަންދައިގެ ދަށުން ފޯރުކޮށްދިނުން
• 6. އަމިއްލަ އިންޝުއަރެންސެއް އޮންނަ ފަރާތްތަކުން ހޯދާ ޚިދުމަތާއި ގުޅޭ ކަވަރޭޖް ލިމިޓް ހުސްނުވާނަމަ، ޚިދުމަތް ފޯރުކޮށްދިނުމުގައި އާސަންދަ ޕޯޓަލް ބޭނުންކުރުމާއި ބޭސް ސިޓީ ލިޔުމަށް ވިނަވި ޕޯޓަލް ބޭނުން ނުކުރުން

މީގެ އިތުރުން، ޕްރައިވެޓް އިންޝުއަރެންސްގެ ތެރޭގައި މޯލްޑިވްސް ޕޮލިސް ސަރވިސަސްއިން އަދި މޯލްޑިވްސް ޑިފެންސް ފޯރސްއިން ހިންގާ ސްކީމްތައް ނުހިމެނޭނެކަމަށް އާސަންދަ ކުންފުނިން ވިދާޅުވެއެވެ. އަދި އެނދުމަތިކޮށްގެން ދެވޭ ފަރުވާ ނުވަތަ (އިންޕޭޝަންޓް) ބިލްތަކަށް މިހާރުވެސް އަމަލުކުރަމުންދާ އުޞޫލުން އާސަންދަ ސްކީމުން ޚިދުމަތް ދިނުމަށްވެސް އާސަންދަ ކުންފުނިން ވަނީ ޚިދުމަތްދޭ ފާރާތްތަކަށް އަންގާފައެވެ.

މި ބަދަލާއި ގުޅޭގޮތުން އާސަންދަ ކޯލް ސެންޓަރު ނަންބަރު 1400އަށް ގުޅުއްވައިގެން މައުލޫމާތު ސާފުކުރެވޭނެއެވެ. އަދި ޚިދުމަތް ދިނުމުގައި މި އެންގުމާ ޚިލާފަށް ޢަމަލުކުރާނަމަ އާސަންދައަށް ޝަކުވާ ހުށައެޅުމަށްވެސް އެ ކުންފުނިން އެދިވަޑައިގަންނަވައެވެ.