މުހިންމު ކަންކަން ނިންމުމުގައި އަންހެން ކައުންސިލަރުންގެ މަޝްވަރާ ބަލައިގަނޭ: ދިރާސާ

މުހިންމު ކަންކަން ނިންމުމުގައި އަންހެން ކައުންސިލަރުންގެ ޚިޔާލާއި މަޝްވަރާ ބަލައިގަންނަކަމަށް ލާމަރުކަޒީ ނިޒާމުގެ ތެރޭގައި މިންތީގެ ތަފާތުކުރުމާގުޅޭގޮތުން ހެދި ދިރާސާއިން ދައްކައިފިއެވެ. ލާމަރުކަޒީ ނިޒާމުގެ ތެރޭގައި މިންތީގެ ތަފާތުކުރުމާ ބެހޭގޮތުން ދިރާސާ ހަދާފައިވަނީ ލޯކަލް ގަވަރމެންޓް އޮތޯރިޓީ، އެލްޖީއޭއާއި ޔުނައިޓެޑް ނޭޝަންސް ޑިވެލޮޕްމެންޓް ޕްރޮގްރާމް، ޔޫއެންޑީޕީއާއި މޯލްޑިވްސް އިންސްޓިޓިއުޓް އޮފް ލޯކަލް ގަވަރނަންސް، އެމްއައިއެލްޖީއިންނެވެ.

މި ދިރާސާގައި 2021 ވަނަ އަހަރު ބޭއްވި ލޯކަލް ކައުންސިލް އިންތިޚާބުގައި މެންބަރުކަމަށް އިންތިޚާބުވެވަޑައިގެންފައިވާ 199 އަންހެން ކައުންސިލް މެންބަރުން ބައިވެރިވެވަޑައިގެންނެވިއެވެ. ދިރާސާގެ ބައިވެރިންގެ ތެރޭގައި ހިމެނޭ 177 އަންހެން ކައުންސިލަރުންނަކީ ސިޔާސީ ޕާޓީއަށް ނިސްބަތްވެވަޑައިގަންނަވާ ބޭފުޅުންނެވެ. އަދި އަމިއްލަ ގޮތުން ވާދަކުރައްވައިގެން އިންތިޚާބުވެވަޑައިގެންފައިވާ 22 އަންހެން ކައުންސިލަރުންވެސް މި ދިރާސާގައި ބައިވެރިވެވަޑައިގެންފައިވެއެވެ. އެހެންކަމުން މި ސަރވޭގައި ރާއްޖޭގައި ތިބި 51 އިންސައްތަ އަންހެން ކައުންސިލަރުން ބައިވެރިވެފައިވެއެވެ.

މި ދިރާސާއަށްފަހު ނެރެފައިވާ އެސެސްމެންޓް ރިޕޯޓުގައިވާގޮތުން ބައިވެރިންގެ 68.8 އިންސައްތަ އަންހެން ކައުންސިލަރުން ޤަބޫލުކުރާ ގޮތުގައި ލޯކަލް ކައުންސިލްތަކަށް އިންތިޚާބުކުރާ މެންބަރުންގެ 33 އިންސައްތައަކީ އަންހެނުންނަށް ކޯޓާ ކަނޑައެޅުމުން، މުހިންމު ނިންމުންތަކުގައި އަންހެނުންގެ ބައިވެރިވުން އިތުރުކަމަށެވެ. އަދި 93.5 އިންސައްތަ އަންހެނުން މެންބަރުން ޤަބޫލުކުރާ ގޮތުގައި މާލީ ކަންކަމާ ބެހޭގޮތުން ގޮތް ނިންމުމުގައި ޚިޔާލުފާޅުކުރުމުގެ ފުރުޞަތު އެމީހުންނަށް ލިބެއެވެ.

މީގެ އިތުރުން ދިރާސާގައި ބައިވެރިވެވަޑައިގެންނެވި 87 އިންސައްތަ މެންބަރުން ޤަބޫލުކުރާ ގޮތުގައި ސަރުކާރުންނާއި އެހެނިހެން ޖަމްޢިއްޔާތަކުން ކުރިއަށްގެންދާ މަޝްރޫޢުތަކާބެހޭ މަޝްވަރާތަކުގައި ބައިވެރިވުމުގެ ފުރުޞަތު އެ މީހުންނަށް ލިބެއެވެ. އަދި އަންހެނުންގެ ޚިޔާލުތަކަށް އެހެން ކައުންސިލަރުން އިޙްތިރާމްކުރާކަން 72.3 އިންސައްތަ ބައިވެރިން ޤަބޫލުކުރެއެވެ. އަދި އެކި ޕްރޮގުރާމްތައް ތަންފީޒްކުރުމުގައި ކައުންސިލްގެ މުވައްޒަފުންގެ އެހީތެރިކަން ލިބޭކަމަށް 88 އިންސައްތަ ބައިވެރިން ޤަބޫލުކުރެއެވެ.

ދިރާސާގެ ބައިވެރިންގެ ތެރެއިން 60.8 އިންސައްތަ މީހުން ޤަބޫލުކުރާ ގޮތުގައި ކައުންސިލްގެ މެންބަރުން ބައިވެރިވުމަށް ދައުވަތު ލިބޭ ތަމްރީން ޕްރޮގުރާމްތަކާއި މަތީ ފަންތީގެ މަހާސިންތާތަކުގައި ބައިވެރިވުމުގެ ފުރުޞަތު އަންހެން ކައުންސިލަރުންނަށް ލިބެއެވެ. އަދި ކޮންމެ ޖިންސަކަށްވެސް ހަމަހަމަކަންމަތީ ތަމްރީންވުމުގެ ފުރުޞަތު ލިބޭކަމަށް 72.3 އިންސައްތަ ބައިވެރިން ޤަބޫލުކުރެއެވެ.

މި ދިރާސާގެ މުޅި އެސެސްމެންޓް ރިޕޯޓު އިނގިރޭސިއާއި ދިވެހިބަހުން އެލްޖީއޭގެ ކިޔެވެނި ޕްލެޓްފޯމުގައިވަނީ ޝާއިޢުކޮށްފައެވެ.

މުހިންމު ނިންމުންތަކާއި ސިޔާސަތު ކަނޑައެޅުމާއި ސަރުކާރުގެ މަންތީ ފަންތީގައި އަންހެނުންގެ ބައިވެރިވުމާއި ދައުރު އިތުރުކުރުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން ފުރަތަމަ ފަހަރަށް ކޮމިޝަނަރ ޖެނެރަލް އޮފް ކަސްޓަމްސްގެ މަޤާމަށް އަންހެން ބޭފުޅަކު އައްޔަންކުރެއްވީވެސް މިސަރުކާރުންނެވެ. މީގެ އިތުރުން ދައުލަތުގެ އިސް މަޤާމުތަކަށް ގިނަ އަދަދެއްގެ އަންހެން ބޭފުޅުން ރައީސުލްޖުމްހޫރިއްޔާ އައްޔަންކުރައްވާފައިވެއެވެ.

އަދި ވިޔަފާރީގެ މައިދާނުގައި އަންހެނުންގެ ބައިވެރިވުން އިތުރުކުރުމަށް އެމީހުންނަށް ޚާއްސަކޮށްގެން 6.5 މިލިޔަން ޑޮލަރުގެ ލޯން ސްކީމެއް ތަޢާރަފްކޮށް ވިޔަފާރީގައި އަންހެނުންގެ ދައުރު ފުރާކުރުންފަދަ ކަންކަން ސަރުކާރުގެ ސިޔާސަތުގައި ހިމެނެއެވެ.