ރާއްޖޭން ޗައިނާއަށް މަހުގެ ބާވަތްތައް އެކްސްޕޯޓުކުރެވޭގޮތް ހެދުމަށް އެއްބަސްވުމެއްގައި ސޮއިކޮށްފި

ރާއްޖޭން ޗައިނާއަށް މަހުގެ ބާވަތްތައް އެކްސްޕޯޓުކުރެވޭގޮތް ހެދުމަށް ޚާއްސަ އެއްބަސްވުމެއްގައި ސޮއިކޮށްފިއެވެ.

މިއެއްބަސްވުމުގައި ސޮއިކޮށްފައިވަނީ ޖެނެރަލް އެޑްމިނިސްޓްރޭޝަން އޮފް ކަސްޓަމްސް އޮފް ދަ ޕީޕަލްސް ރިޕަބްލިކް އޮފް ޗައިނާ، ޖީއޭސީސީ އާއި ސިއްޙަތާ ބެހޭ ވުޒާރާއާ ދެމެދުއެވެ.

ރާއްޖޭން ޗައިނާއަށް އެކްސްޕޯޓުކުރާ މަހުގެ ބާވަތްތައް އިންސްޕެކްޓުކުރުމާއި ކަރަންޓީންކުރުމުގައި އަމަލުކުރާނެ ގޮތްތަކާއި މިންގަނޑުތައް ކަނޑައަޅާ މިއެއްބަސްވުމުގައި ސިއްޙަތާ ބެހޭ ވުޒާރާގެ ފަރާތުން ސޮއިކުރެއްވީ ސިއްޙަތާ ބެހޭ ވަޒީރުގެ ނައިބު އިސްމާއިލް ޒާހިރެވެ. ޖީއޭސީސީގެ ފަރާތުން ސޮއިކުރެއްވީ ވައިސް މިނިސްޓަރ ހޫ ހައިޕިންގއެވެ.

މިއެއްބަސްވުމާއި ގުޅޭގޮތުން ވާހަކަދައްކަވަމުން ޒާހިރު ވިދާޅުވީ މިއެއްބަސްވުމާއެކު ދިވެހި ވިޔަފާރިތަކާއެކު ގިނަ ފަސޭހަތަކެއް ލިބިގެންދާނެ ކަމަށެވެ.

"2015ވަނަ އަހަރުން ފެށިގެން ޗައިނާ މަރކެޓަށް ރާއްޖޭން މަހުގެ ބާވަތްތައް އެކްސްޕޯޓެއް ނުކުރެވޭ، އެހެންނަމަވެސް މިޕްރޮޓްކޯލްގެ ދަށުން ހުއިފިލަނޑާގެ ބާވަތްތަކާއި، ފަރުމަހުގެ ބާވަތްތައް އަދި ކަނޑުމަހުގެ ބާވަތްތައް ޗައިނާއަށް އެކްސްޕޯޓުކުރެވޭނެ،"ޒާހިރު ވިދާޅުވިއެވެ.

މިއެއްބަސްވުމާ ގުޅޭގޮތުން ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަންގ ލީޝިން ވިދާޅުވީ މިއެއްބަސްވުމުގެ ސަބަބުން ދެ ޤައުމަށްވެސް އޭގެ ފައިދާވާނެ ކަމަށެވެ. އެގޮތުން ޗައިނާގެ ވިޔަފާރިވެރިންނަށް ފަސޭހަކަމާއެކު ރާއްޖޭން ސީފުޑު ލިބޭނެ މަގު ފަހިވެގެންދާނެ ކަމަށް ވިދާޅުވިއެވެ.

"އެފްޓީއޭއަށްވެސް އަންނަ އަހަރު ކުރީކޮޅު އަމަލުކުރަން ފަށާއިރު، މިއެއްބަސްވުމާއެކު ރާއްޖޭން ޗައިނާއަށް މަހުގެ ބާވަތްތައް އެކްސްޕޯޓުކުރުމަށް ފަސޭހަވެގެންދާނެ،" ސަފީރު ވަންގ ލީޝިން ވިދާޅުވިއެވެ.

ޗައިނާއަށް ކަނޑުމަހުގެ ބާވަތްތަކާއި ސީފުޑްގެ ބާވަތްތައް އެކްސްޕޯޓުކުރެވެނީ ވަކި ޚާއްސަ މިންގަނޑުތަކެއް ފުރިހަމަކުރުމުންނެވެ. އެހެންކަމުން މި އެއްބަސްވުމާއެކު އެކަންކަމަށް އެހީތެރިވެދޭނެ ކަމަށް ސިއްޙަތާ ބެހޭ ވުޒާރާއިން ވިދާޅުވެއެވެ.

ކަނޑުފަޅުން ލިބޭ ނަފާ އިތުރުކުރުމަކީ މިސަރުކާރުގެ އަމާޒެކެވެ. އެގޮތުން ޗައިނާއާއެކު ގާއިމްކޮށްފައިވާ މިނިވަން ވިޔަފާރީގެ އެއްބަސްވުމަށް އަންނަ ޖެނުއަރީމަހުގެ އެއްވަނަދުވަހު އަމަލުކުރަން ފެށުމަށް ސަރުކާރުން ދަނީ ތައްޔާރުވަމުންނެވެ.

ސަރުކާރުން ވިދާޅުވީ މިހާރުވެސް ދިވެހި ރާއްޖެއާއި ޗައިނާއާ ދެމެދު 700 މިލިއަން ޑޮލަރުގެ ވިޔަފާރި ކުރެވެމުންދާކަމަށެވެ. އަދި މިނިވަން ވިޔަފާރީގެ އެއްބަސްވުމަށް އަމަލު ކުރަން ފެށުމާއެކު މިއަދަދު 1 ބިލިޔަން ޑޮލަރަށް އަރާނެކަމަށް ސަރުކާރުން ލަފާކުރައްވައެވެ.