އިންސާނީ ޙައްގުތައް ރައްކާތެރިކުރުމަށް މަސައްކަތްކުރާ ފަރާތްތަކަށް ދޭންޖެހޭ ރައްކާތެރިކަން ނުދެވޭ: އެޗްއާރްސީއެމް

އިންސާނީ ޙައްގުތައް ރައްކާތެރިކުރުމަށް މަސައްކަތްކުރާ ފަރާތްތަކަށް ކުރިމަތިވާ ނުރައްކާތަކާއި ގުޅިގެން ޢަމަލުކުރާނެ ހަރުދަނާ ނިޒާމެއް މިހާރު ނެތްކަމަށް ހިއުމަން ރައިޓްސް ކޮމިޝަނުން ވިދާޅުވެއްޖެއެވެ.

މިއީ މިހާރުން މިހާރަށް ބޭނުންވާ މުހިންމު ނިޒާމެއްކަން ކޮމިޝަނުންވަނީ ފާހަގަކުރައްވާފައެވެ.

ރާއްޖޭގައި އިންސާނީ ޙައްގުތައް ކަށަވަރުކުރުމަށް މަސައްކަތްކުރާ އެކި ފަރާތްތަކަށް ފޯރުކޮށްދޭންޖެހޭ ރައްކާތެރިކަން ކަށަވަރުކުރުމަށްޓަކައި ކަމާއި ގުޅުންހުރި އިދާރާތަކާއެކު ބޭއްވި ވޯކްޝޮޕްގައި ވާހަކަދައްކަވަމުން ހިއުމަން ރައިޓްސް ކޮމިޝަންގެ މެމްބަރު މޫމިނާ ވަޙީދު ވިދާޅުވީ ރާއްޖޭގައި އިންސާނީ ޙައްގުތައް ރައްކާތެރިކުރުމަށް މަސައްކަތްކުރާ ފަރާތްތަކަށް ބޮޑެތި ނުރައްކާތަކާއި ކުރިމަތިލާންޖެހޭކަމަށެވެ. އަދި ރާއްޖޭގައި މިހާރު މިފަރާތްތަކަށް ރައްކާތެރިކަން ފޯރުކޮށްދިނުމަށް ކަނޑައަޅާފައިވާ ނިޒާމަކީ އެންމެ އެކަށީގެންވާ ގޮތުގައި އޮތް ނިޒާމެއް ނޫންކަން އޭނާ ފާހަގަކުރެއްވިއެވެ.

މިބައްދަލުވުމުގެ ސަބަބުން އިންސާނީ ޙައްގުތައް ރައްކާތެރިކުރުމަށް މަސައްކަތްކުރާ އެކި ފަރާތްތަކާއި ކަމާއި ގުޅުންހުރި އެކި ފަރާތްތަކާ ދެމެދު އޮތް ގުޅުން ހަރުދަނާކުރެވި ގުޅިގެން މަސައްކަތްކުރެވޭނެ ނިޒާމެއް ޤާއިމުކުރެވޭނެކަމަށް މޫމިނާވިދާޅުވިއެވެ.

"އަސްލު ރާއްޖޭގައި މިވަގުތު ނެތް އެންމެ ރަނގަޅު ނިޒާމެއް ހިއުމަން ރައިޓްސް ޑިފެންޑަރސްއަށް ލިބޭ ތްރެޓްސްތަކަށް އެޑްރެސްކުރާކަށް. އެހެންވީމަ މިއީ ޤާއިމުވެފައި އޮންނަންޖެހޭ މުހިއްމު ނިޒާމެއް." މޫމިނާ ވިދާޅުވިއެވެ.

އިންސާނީ ޙައްގުތައް ކަށަވަރުކުރުމަށް މަސައްކަތްކުރާ ޖަމްޢިއްޔާތަކަށް ކަނޑައަޅާފައިވާ ޤާނޫނީ އަދި ރައްކާތެރިކަމުގެ ފިޔަވަޅުތަކާ ގުޅޭގޮތުން ސަރުކާރުގެ ކަމާއި ގުޅުންހުރި މުއައްސަސާތަކުންވަނީ މިވޯކްޝޮޕްގައި ބައިވެރިވެފައެވެ. އެގޮތުން ޒުވާނުން ބާރުވެރިކުރުވުމާއި މަޢުލޫމާތާއި ފަންނާ ބެހޭ ވުޒާރާއާއި، ދިވެހި ފުލުހުންގެ ޚިދުމަތާއި އޭޝިއާ ޕެސިފިކް ފޯރަމް ގުޅިގެން މިވޯކްޝޮޕްގައި ގިނަ މަޝްވަރާތަކެއް ކުރެވޭނެކަމާށް އެޗްއާރްސީއެމުން ވިދާޅުވެއެވެ. މިއާއެކު އިންސާނީ ޙައްގުތައް ކަށަވަރުކުރުމަށް ޖަމްޢިއްޔާތަކުން ކުރާ މަސައްކަތްތައް އިތުރަށް ހާމަވެ، މިހާރު ދިމާވަމުންދާ ދަތިތައް ދެނެގަނެވި، އެކަންކަމަށް ޙައްލު ހޯދުމަށް ފަސޭހަވެގެންދާނެކަމަށް އެޗްއާރްސީއެމުން ވިދާޅުވެއެވެ.