ނަޑާލް، ލޭވާ ކަޕުން ވަކިވެއްޖެ

ކުރީގެ އެއްވަނަ ޓެނިސް ކުޅުންތެރިޔާ، ރަފައެލް ނަޑާލް އަންނަ ހަފްތާގައި ފެށުމަށް ހަމަޖެހިފައިވާ ލޭވާ ކަޕުން ވަކިވެއްޖެއެވެ.

ނަޑާލް، 38، ބުނީ، އެ މުބާރާތުގައި ނުކުޅެން ނިންމީ މިވަގުތަށް އޭނާގެ އެންމެ ރަނގަޅު ފޯމެއްގައި ކުޅެވޭނެ ހާލަތެއް ނެތުމުގެ އިތުރުން ފުރިހަމަ ފިޓްނަސްއަށް އެނބުރިއައުމަށް މަސައްކަތްކުރަމުންދާތީވެ ކަމަށެވެ.

މިހާތަނަށް 22 ގްރޭންޑް ސްލޭމް ޓެނިސް މުބާރާތް ކާމިޔާބުކޮށްފައިވާ ނަޑާލް އެންމެ ފަހުން ކުޅުނީ މިދިޔަ ޖުލައި މަހުގައި ކުރިއަށްދިޔަ ޕެރިސް އޮލިމްޕިކްސްގެ ޓެނިހުގެ އިވެންޓްގައެވެ. މި ފަހަރުގެ ގޭމްސްގެ ސިންގަލްސް އިވެންޓްގައި ވާދަވެރި ސާބިއާގެ ނޮވަކް ޖޮކޮވިޗް އަތުން ބަލިވި މެޗަށްފަހު އެހެން މުބާރާތަކުން ފެނިފައެއްނުވެއެވެ.

އެގޮތުން، ފިޓްނަސްގެ ސަބަބުން އެންމެ ފަހުން ކުޅެވުނު ޔޫއެސް އޯޕަން ޓެނިސް މުބާރާތުގައި ވެސް ނަޑާލް ނުކުޅެއެވެ. އޭރު ނަޑާލް އަމާޒުހިފާފައިވަނީ މި މަހުގެ 20-22 އަށް ބާލިންގައި ބޭއްވުމަށް ހަމަޖެހިފައިވާ ލޭވާ ކަޕުގައި ކުޅުމަށެވެ.


"އަންނަ ހަފްތާގައި ބާލިންގައި ބޭއްވުމަށް ހަމަޖެހިފައިވާ ލޭވާ ކަޕުގައި ބައިވެރިނުވެވޭނެކަން ހިއްސާކުރަން ޖެހޭތީ ވަރަށް ބޮޑަށް ހިތާމަކުރަން،" ނަޑާލް ބުންޏެވެ.

"މިއީ ޓީމު މުބާރާތެއް. އަދި ޓީމް ޔޫރަޕަށް ފުރިހަމަ އެހީތެރިކަމެއް ދިނުމަށްޓަކައި، އަހަރެން ކުރަންޖެހޭނީ އެމީހުންނަށް އެންމެ ފައިދާހުރި ކަންތައް. މި ވަގުތު ޓީމަށް ކާމިޔާބީ ހޯދައިދިނުމަށް އެހީތެރިވެދެވޭނެ އެހެން ކުޅުންތެރިން އެބަތިބި."

ނަޑާލް އިތުރަށް ބުނީ، ލޭވާ ކަޕްގައި ކުޅެގެން މިހާތަނަށް ވަރަށް ފޮނި، އުފާވެރި ހަނދާންތަކެއް އެބަހުރި ކަމަށާއި، ހާއްސަކޮށް އޭނާ އުއްމީދުކޮށްގެން ހުރީ ބްޔޯންގެ ކެޕްޓަންކަމުގެ އެންމެ ފަހު އަހަރުގައި އެ ޓީމަށް ކުޅުމަށް ކަމަށެވެ. ޓީމް ޔޫރަޕަށް ކާމިޔާބީ އަށް އެދޭ ކަމަށާއި، ސަޕޯޓަރެއްގެ ގޮތުގައި އެ ޓީމަށް ހިތްވަރުދޭނެ ކަމަށް ވެސް ނިންމާލަމުން ނަޑާލް ބުންޏެވެ.

ނަޑާލް އެންމެ ފަހުން ލޭވާ ކަޕުގައި ކުޅުނީ 2022 ވަނަ އަހަރުއެވެ. އެއީ، ޓެނިހުގެ ތާރީޚުގައި އޭނާއާ އެންމެ ވާދަވެރިކޮށް ފެނުނު ކުރީގެ އެއްވަނަ ޓެނިސް ކުޅުންތެރިޔާ، ސްވިޒަލެންޑްގެ ރޮޖާ ފެޑެރާގެ ކެރިއަރުގެ އެންމެ ފަހު މެޗުގައި ކުޅުނު ފަހަރެވެ.

މީގެކުރީން، ގިނަ ދުވަސްތަކެއް ވަންދެން ދުނިޔޭގެ އެއްވަނައިގައި އޮތް ނަޑާލް އަށް ފާއިތުވި އަހަރުތަކުގައި ކުރިމަތިވީ އަނިޔާގެ އެކި މައްސަލަތަކާ ހުރެ، މިވަގުތު ވަނީ ދުނިޔޭގެ ރޭންކިންގެ 150 އަށް ވުރެ ދަށަށް ގޮސްފައެވެ.