ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމެންސް ވޮލީބޯލް ޗެލެންޖް ކަޕް 2024 ގެ ފައިނަލް މެޗުގައި ކިރްގިސްތާނާ ދެކޮޅަށް ފަސް ސެޓު ކުޅެގެން ބަލިވުމަކީވެސް ލިބުނު ކުރިއެރުމެއް ކަމަށާއި، ޓީމުން ބޮޑެތި ކުރިއެރުންތަކެއް ހޯދާފައިވާކަން ހާމަވާ ކަމަށް ގައުމީ އަންހެން ވޮލީބޯޅަ ޓީމުގެ ކޯޗު ސޮފްވާން މުޙައްމަދު ބުނެފިއެވެ.
ރޭ ކުޅުނު ފައިނަލް މެޗުގައި ކިރްގިސްތާނު އަތުން ރާއްޖެ ބަލިވީ ފަސް ސެޓަށް ކުޅެގެންނެވެ. މެޗުގައި ދިވެހި ޓީމަށް ތަރުހީބުދިނުމަށް މުޅި ޒުވާނުންގެ މަރުކަޒު ފުރާލިއިރު، ދައުލަތުގެ ބައެއް އިސްވެރިންވެސް ވަނީ ޓީމަށް ތަރުހީބުދިނުމަށް ޒުވާނުންގެ މަރުކަޒަށް ވަޑައިގެންފައެވެ.
ފައިނަލުގެ ކުރިން ފުރަތަމަ ބުރުގައި ކިރްގިސްތާނު އަތުން ރާއްޖެ ބަލިވީ ސީދާ ތިން ސެޓުންނެވެ. ނަމަވެސް ފައިނަލުގައި ދިވެހި ޓީމުގެ ފަރާތުން ކިރްގިސްތާނަށް އުނދަގޫތަކާ ކުރިމަތިލާން ޖެހުނެވެ. ކޮންމެ ޓީމަކަށް ދެ ސެޓު ލިބުމުން ނަތީޖާ ނެރުމަށް ކުޅުނު ފަސްވަނަ ސެޓުގައި ކިރްގިސްތާނު މޮޅުވީ ލިބުނު ފުރުސަތުތަކުގެ ބޭނުން ހިފައިގެންނެވެ.
ސޮފްވާން ބުނީ ފައިނަލް މެޗުގެ ފަހު ސެޓު ދިވެހި ޓީމަށް ގެއްލުނީ ހެދުނު ގޯސްތަކެއްގެ ސަބަބުން ކަމަށެވެ. އެގޮތުން ރިސީވްގައި އުނދަގޫތަކެއް ދިމާވި ކަމަށާއި، ސެޓަރަށް ރަނގަޅަށް ސެޓު ނުވެގެން ގޭމް ކޮންޓްރޯލް ގެއްލި، ލީޑު ފުޅާވެގެން މެޗު ގެއްލުނީ ކަމަށް ސޮފްވާން ބުންޏެވެ.
ފައިނަލުން ބަލިވި ނަމަވެސް ޓީމަށް ބޮޑެތި ކުރިއެރުންތަކެއް އައިސްފައިވާކަން ކޯޗު ފާހަގަކުރި އެވެ. އެގޮތުންް ޓީމުގެ މޯޓިވޭޝަން، ހުނަރުގެ ގޮތުންވެސް ޓީމުން ތަފާތު ފެނުނު ކަމަށް ކޯޗު ބުންޏެވެ. އެހެންކަމުން މިފަދަ އިތުރު ބައިނަލްއަގްވާމީ މުބާރާތްތަކެއް ލިބުމަކީ ޓީމަށް ފައިދާކުރާނެ ކަމެއްގެ ގޮތުގައި ސޮފްވާން ފާހަގަކުރި އެވެ.
މީގެއިތުރުން ސޮފްވާން ވަނީ ފައިނަލް މެޗު ބެލުމަށް ގިނަ އަދަދެއްގެ ދިވެހި ރައްޔިތުން ސޯޝަލްއަށް އައުމުން އެކަމަށް ޝުކުރުއަދާކޮށްފައެވެ. އަދި އެ ސަޕޯޓު ފެނުމުން ލިބުނީ ބޮޑު ހައިރާންކަމެއް ކަމަށާއި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އާއި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ދިވެހި ވޮލީއަށް ދެއްވާ އަހައްމިއްޔަތާއި ހިތްވަރު ފާހަގަކުރާ ކަމަށެވެ.