އެމެރިކާގެ ނިއު ޔޯކުގައި މިހާރު ކުރިއަށްދާ ޔޫއެސް އޯޕަން ޓެނިސް މުބާރާތުގެ ފައިނަލުގެ ޖާގައެއް އެރީނާ ސަބަލެންކާ ހޯދައިފިއެވެ.
ބެލަރޫސްއަށް އުފަން އުމުރުން 26 އަހަރުގެ ސަބަލެންކާ މި މުބާރާތުގެ އަންހެން އިވެންޓުގެ ފައިނަލުގެ ޖާގައެއް ހޯދާފައިވަނީ އެމެރިކާ އެމާ ނަވާރޯ އާއި ދެކޮޅަށް ކުޅުނު މެޗު ސީދާ ދެ ސެޓުން ކާމިޔާބު ކޮށްގެންނެވެ.
މި މެޗުގެ ފުރަރަމަ ސެޓް ފަސޭހަކަމާއިއެކު 6-3 ގެ ނަތީޖާއަކުން ސަބަލެންކާ މޮޅުވި ނަމަވެސް ދެވަނަ ސެޓުގައި ވާދަވެރި ކުޅުމެއްވަނީ ފެނިގެން ގޮސްފައެވެ. އެގޮތުން މި ސެޓުގައި ފުރަތަމަ ފަހަރަށް ސަބަލެންކާގެ މައްޗަށް ނަވާރޯ ކުރިވެސް ހޯދާފައި ވެއެވެ.
ނަމަވެސް ދެވަނަ ސެޓުގައި ސަބަލެންކާ އަށް ހެދުނު ގޯސްތައް ރަގަޅުކޮށް އޭނާ ވަނީ 7-6 ގެ ނަތީޖާއަކުން ސެޓް ކާމިޔާބުކޮށް ޖެހިޖެހިގެން ދެވަނަ ފަހަރަށް މި މިމުބާރާތުގެ ފައިނަލުގެ ޖާގައެއް ހޯދާފަ އެވެ.
2021 ވަނަ އަހަރާއި 2022 ވަނަ އަހަރުގެ ސެމީ ފައިނަލުގެ ބަލިވުމަށްފަހު މިދިޔަ އަހަރުގެ ފައިނަލުން ޖާގަ ހޯދި ނަމަވެސް ކޮކޯ ގައުފް އަތުން ބަލިވެ އޭނާއަށް ވަނީ މި މުބާރާތް ކާމިޔާބު ކުރުމުގެ ފުރުސަތު ގެއްލިފައެވެ. އެހެންކަމުން މި އަހަރުގެ މުބާރާތާއި ސަބަލެންކާ ކުރިމަތިލާފައިވަނީ ތިންވަނަ ގްރޭންޑް ސްލޭމް މުބާރާތް ކާމިޔާބު ކުރުމަށެވެ.
މި މުބާރާތުގެ ފައިނަލުގައި ސަބަލެންކާ އާއި ދެކޮޅަށް ކުޅޭނެ ކުޅުންތެރިއެއް އެނގިގެންދާނީ ސެމީ ފައިނަލުގައި އެމެރިކާގެ ޖެސިކާ ޕެގޫލާ އާއި ޗެކް ރިޕަބްލިކްގެ ކެރޮލީނާ މުޗޯވާ ކުޅޭ މެޗަށްފަހުގައެވެ.