ފީފާ ވޯލްޑް ކަޕް ކޮލިފައިންގެ އޭޝިއާގެ ޕްރިލިމިނަރީ ބުރުގެ މެޗު 1-0 ގެ ނަތީޖާއަކުން ކާމިޔާބުކޮށް، ބަހްރެއިނުން އޮސްޓްރޭލިއާ ސިއްސުވާލައިފިއެވެ.
އޮސްޓްރޭލިއާގެ ގޯލްޑް ކޯސްޓްގެ ރޮބީނާ ސްޓޭޑިއަމްގައި ކުޅުނު މި މެޗުގައި އޮސްޓްރޭލިއާ އިން ވަނީ މި މެޗުގެ ގިނަ ވަގުތު ބޯޅަ ކޮންޓްރޯލްކޮށް ބަހްރޭންގެ ގޯލަށް ނުރައްކާތެރި ގިނަ ހަމަލަތަކެއް ފޮނުވާލާފަ އެވެ. ނަމަވެސް ބަހްރޭނުގެ ގޯލު ފޫއަޅުވާލުމަށް އެ ޓީމަށް ވަނީ ނުކުޅެދިފަ އެވެ.
މެޗުގެ 77 ވަނަ މިނިޓުގައި އޮސްޓްރޭލިއާގެ ކުސިނީ ޔެންގީ އަށް ރެފްރީ ރަތް ކާޑެއް ދައްކާ ދަނޑުން ފޮނުވާލުމާއިއެކު އޮސްޓްރޭލިއާއިން މެޗުގެ ފަހު ވަގުތުތައް ކުޅެފައިވަނީ އެއް ކުޅުންތެރިއަކު މަދުކޮށެވެ.
މި މެޗުން ބަހްރޭން މޮޅުވި ލަނޑަކީ މެޗުގެ 89 ވަނަ މިނިޓުގައި އޮސްޓްރޭލިއާގެ ޑިފެންޑަރ ސޯޓަރގެ އަތުން ބައިކޮޅަށް ވަދެފައިވާ ލަނޑެކެވެ.
މިއީ އޮސްޓްރޭލިއާގެ މައްޗަށް ބަހްރޭނަށް ކުރި ހޯދިފައިވާ ފުރަތަމަ ފަހަރެވެ. މީގެ ކުރިން މި ދެޓީމު ހަތް ފަހަރު މަތިން ބައްދަލު ކޮށްފައިވާއިރު ބަހްރޭނަށް އޮސްޓްރޭލިއާގެ މައްޗަށް ކުރި ހޯދިފައެއް ނުވެއެވެ.
ގްރޫޕުގެ ދެވަނަ މެޗުގައި އޮސްޓްރޭލިއާ ދެން ބައްދަލު ކުރާނީ އިންޑޮނޭޝިއާ އާއި ދެކޮޅަށް ރަށުން ބޭރުގައެވެ. އަދި ބަހްރޭން ނިކުންނާނީ އަމިއްލަ ގައުމުގައި ޖަޕާން އާއި ދެކޮޅަށެވެ.