އަންނަ ހުކުރު ދުވަހު މާލޭގައި ފަށާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމެންސް ވޮލީބޯލް ޗެލެންޖް ކަޕް 2024 ގައި ވާދަކުރާ ރާއްޖޭގެ ގައުމީ އަންހެން ވޮލީބޯޅަ ޓީމަށް ޖާޒީ ހަވާލުކޮށްފިއެވެ. ޓީީމުގެ ކުޅުންތެރިންނަށް ޖާޒީ ހަވާލުކޮށްދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢުއެވެ.
ކާވާ ވިމެންސް ވޮލީބޯލް ޗެލެންޖް ކަޕް ކުރިއަށްދާނީ އަންނަ ހުކުރު ދުވަހުން ފެށިގެން މި މަހުގެ 11 ވަނަ ދުވަހުގެ ނިޔަލަށް ޒުވާނުންގެ މަރުކަޒުގެ އެތެރޭ ކޯޓުގައެވެ. މި މުބާރާތުގައި ހަތަރު ގައުމެއް ވާދަކުރާއިރު، އެ ގައުމުތަކަކީ ރާއްޖޭގެ އިތުރުން ތަޖިކިސްތާނާއި، ކިރްގިސްތާން އަދި އަފްޣާނިސްތާނެވެ.
މުބާރާތުގައި ވާދަކުރާ ގައުމީ އަންހެން ވޮލީބޯޅަ ޓީމަށް ޖާޒީ ހަވާލުކުރުމަށް ޒުވާނުންގެ މަރުކަޒުގައި މިއަދު ބޭއްވި ހަފުލާގައި ވަނީ ރާއްޖޭގެ ސްކޮޑް އިއުލާން ކުރުމުގެ އިތުރުން، ޓީމުގެ ކެޕްޓަނާއި ވައިސް ކެޕްޓަންވެސް އިއުލާން ކޮށްފައެވެ. އެގޮތުން ޓީމުގެ ކެޕްޓަނަކަށް ތަޖުރިބާކާރު ކުޅުންތެރިޔާ ހައްވާ ރާޝިދާ ހަމަޖެއްސިއިރު، ވައިސް ކެޕްޓަނަކީ އިތުބާރު ސެޓަރު ފާތިމަތު ޖޫޒާން ޒަރީރެވެ.
މި ރަސްމިއްޔާތަށްފަހު "ޕީއެސްއެމް ސްޕޯޓްސް" އަށް ދެއްވި އިންޓަވިއުއެއްގައި ކުޅިވަރާ ބެހޭ ވަޒީރު ރާފިޢު ވިދާޅުވީ ކާމިޔާބީ އޮތީ މާ ދުރުގައި ނޫން ކަމަށާއި، ގާތްގާތުގައި ގިނަ މުބާރާތްތައް ބޭއްވުމަކީ ޓީމުގެ ކުޅުން ރަނގަޅުވަމުން އަންނާނެ ކަމެއް ކަމަށެވެ. އަދި އެންމެ ފަހުން އަންހެން ޓީމުން ވާދަކުރި މުބާރާތުގެ ތަޖުރިބާއާއެކު، މި ފަހަރުގެ މުބާރާތް ރަނގަޅުވާނެ ކަމަށް އެއްވެސް ޝައްކެއް ނުކުރާ ކަމަށްވެސް ވަނީ ވިދާޅުވެފައެވެ.
ކާވާ ވިމެންސް ވޮލީބޯލް ޗެލެންޖް ކަޕާ ރާއްޖޭގެ އަންހެން ޓީމު ކުރިމަތިލާއިރު، އެ ޓީމުން ވަނީ މިދިޔަ އޯގަސްޓް މަހު ނޭޕާލުގައި ބޭއްވި ކާވާ ވިމެންސް ވޮލީބޯލް ނޭޝަންސް ލީގުގައިވެސް ވާދަކޮށްފައެވެ.
ރާއްޖޭގައި ބާއްވާ ކާވާ ވިމެންސް ވޮލީބޯލް ޗެލެންޖް ކަޕުގެ ފުރަތަމަ މެޗުގައި އަންނަ ހުކުރު ދުވަހުގެ ހަވީރު ބައްދަލުކުރާނީ ތަޖިކިސްތާނާއި ކިރްގިސްތާނެވެ. އަދި އެރޭ ކުޅޭ މެޗުގައި ރާއްޖެ ނުކުންނާނީ އަފްޣާނިސްތާނާ ދެކޮޅަށެވެ. އެ މެޗުގެ ކުރިން ކާވާ ވިމެންސް ވޮލީބޯލް ޗެލެންޖް ކަޕް ހުޅުވުމުގެ ރަސްމިއްޔާތު ބޭއްވުމަށް ވަނީ ތާވަލުކޮށްފައެވެ.