ނެދަލެންޑްސްގެ ކެޕްޓަން، ވާޖިލް ވެން ޑައިކް، 2026 ވަނަ އަހަރުގެ ފީފާ ވޯލްޑް ކަޕްގެ ނިޔަލަށް ގައުމީ ޓީމަށް ކުޅޭނެ ކަމަށް އެ ޓީމުގެ ކޯޗު، ރޮނާލްޑް ކޫމަން ބުނެފިއެވެ.
ކޫމަން މިހެން ބުނީ، ޔުއެފާ ނޭޝަންސް ލީގުގައި ބޮސްނިއާ އެންޑް ހާޒެގޮވީނާ އާއި ޖަރުމަނާ ދެކޮޅަށް ކުޅުމަށް ހަމަޖެހިފައިވާ މެޗުގެ ކުރީން ބޭއްވި ނޫސްވެރިންގެ ބައްދަލުވުމެއްގައެވެ.
ވެން ޑައިކް، 33، ވަނީ މިހާތަނަށް ނެދަލެންޑްސްގެ ގައުމީ ޓީމަށް 74 މެޗު ކުޅެދީފައެވެ.
ކޫމަން ބުނީ، މިހާރު އެ ޓީމުގެ ކެޕްޓަންކަން ކުރަމުން އަންނަ ވެން ޑައިކް އާއެކު މަޝްވަރާތައް ބާއްވާފައިވާ ކަމަށާއި، އަދި އިތުރު ދެ އަހަރު ވަންދެން އޭނާ ގައުމީ ޓީމަށް ކުޅެމުންގެންދާނެ ކަމަށެވެ.
"އަހަރެންނަށް ހީވަނީ އެއީ ވަރަށް މުހިއްމު ކަމެއްހެން، އޭނާ އިތުރު ދެ އަހަރު އެންމެ މަތީ ލެވެލްގައި ގައުމީ ޓީމާއެކު ކުޅުން ކުރިއަށްގެންދިއުމާ މެދު ގޮތެއް ނިންމުން." ވެން ޑައިކްއާ ގުޅޭގޮތުން ކޫމަން ބުންޏެވެ.
ކޫމަން އިތުރަށް ބުނީ، މިއީ ވެން ޑައިކްގެ އިތުރުން އޭނާ ވެސް އެންމެ ބޭނުންވާ ގޮތް ކަމަށެވެ. އޭނާ އަކީ ނަމޫނާ ކެޕްޓަނެއް ކަމަށާއި، ނިމިދިޔަ ޔޫރޯ ފުޓްބޯޅަ މުބާރާތުގައި އެންމެ އެކަށޭނަ ކުޅުން ދެއްކޭގޮތްނުވި ކަމަށް ވެން ޑައިކް އެއްބަސްވެފައިވާ ކަމަށް ވެސް ކޫމަން ބުންޏެވެ.
ކެޕްޓަނެއްގެ ގޮތުގައި ވެން ޑައިކް ގިނަ ކަންތައްތަކެއް ދަސްކުރަމުން، ކުޅުންތެރިންނަށް ވަރަށް ބޮޑު އެހީތެރިކަމެއް ފޯރުކޮށްދެމުން އަންނަ ކަމަށާއި، ޓީމާއެކު އޭނާ ދެމިހުރުމަކީ ވަރަށް ބޮޑު ޕޮޒިޓިވްއެއް ކަމަށް ވެސް ކޫމަން ވަނީ ބުނެފައެވެ.
އަދި، ދާދިފަހުން ނެދަލެންޑްސްގެ އަޔެކްސް އެމްސްޓެޑަމް ދޫކޮށްލުމަށްފަހު ސަޢުދީ އަރަބިއްޔާގެ އަލް-އިއްތިހާދަށް ބަދަލުވި ސްޓީވެން ބާގްވިން މި ފަހަރުގެ ސްކޮޑަށް ނުނަގާކަން ކޫމަން ވަނީ ކަށަވަރުކޮށްދީފައެވެ.
ކުރިން ޓޮޓެންހަމް ހޮޓްސްޕާ އަށް ވެސް ކުޅެފައިވާ ބާގްވިންއާ ގުޅޭގޮތުން ކޫމަން ބުނީ، ބާގްވިންއާ މެދު އޭނާ ދެކޭގޮތް ރަނގަޅަށް އެނގޭނެ ކަމަށެވެ. އެގޮތުން، އުމުރުން 26 އަހަރުގައި އެންމެ ބޮޑު އިސްކަމެއްދޭން ވަނީ ފައިސާއަށްވުރެ ބޮޑަށް ކުޅުމަށް ކަމަށާއި، އެއީ ކޮންމެ ކުޅުންތެރިއަކަށް ވެސް މުހިއްމު ކަމެއް ކަމަށް ކޫމަން ފާހަގަކުރިއެވެ.
ކޫމަން ވަނީ، ސަޢުދީގައި ކުޅެމުން އަންނަ ޖޯޖީނިއޯ ވައިނަލްޑަމް އަށް އޭރު ގައުމީ ޓީމުން ފުރުޞަތުދެމުންއައި ސަބަބާ ގުޅޭގޮތުން ވާހަކަދައްކާފައެވެ. އެގޮތުން، ވައިނަލްޑަމް އަށް ޕީއެސްޖީގައި އެކަށީގެންވާ ވަރަށް ކުޅުމުގެ ފުރުޞަތު ނުލިބުމުން، ސަޢުދީ ލީގަށް ބަދަލުވުމުން އޭނާ އަށް ގިނަ މެޗުތަކެއް ކުޅެން ލިބޭކަން ފާހަގަކޮށް، ބާގްވިން އާއި ވައިނަލްޑަމްގެ ކެރިއަރުގައި އެ ނިންމުން ނިންމިއިރު އޮތް އުމުރުގެ ފަރަގު ވެސް ކޫމަން ފާހަގަކުރިއެވެ.
އެކަމަކު، މިހާރު ވައިނަލްޑަމްގެ އިތުރުން މާޓެން ޑެ ރޫން އަކީ އޭނާގެ ރޭވުންތެރިކަމުގައި ނުހިމެނޭ ކުޅުންތެރިން ކަމަށާއި، ނަމަވެސް މެމްފިސް ޑިޕާއީ އަށް އެ ދޮރު އަދިވެސް ހުޅުވިފައި އެބައޮތް ކަމަށް ވެސް ކޫމަން ބުންޏެވެ. ކޫމަން ބުނީ، މިވަގުތު ފްރީ އޭޖެންޓެއްގެ ގޮތުގައި ހުރި ޑިޕާއީ އަށް ކުޅޭނެ ކްލަބެއް ނިންމައި، އަލުން ގަވާއިދުން ކުޅުން ކުރިއަށްގެންދަން ފެށުމުން އެ ފުރުޞަތުދޭނެ ކަމަށެވެ.