އަނިޔާ ލިބިފައިވާ ކުދިންނަށް ރައްކާތެރިކަން ފޯރުކޮށްދިނުމުގެ ޤައުމީ އެކްޝަން ޕްލޭން އިފްތިތާޙްކޮށްފި

ކުޑަކުދިންގެ ޙައްގުތައް ކަށަވަރުކޮށް، އަނިޔާ ލިބިފައިވާ ކުދިންނަށް ރައްކާތެރިކަން ފޯރުކޮށްދިނުމަށް އެކުލަވާލާފައިވާ ޤައުމީ އެކްޝަން ޕްލޭން އިފްތިތާޙްކޮށްފިއެވެ.

މި އެކްޝަން ޕްލޭން އިފްތިތާޙްކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދެވެ.

ކުޑަކުދިންނަށް ރައްކާތެރި މާހައުލެއް ޤާއިމުކޮށްދިނުމަށް ސަރުކާރުގެ އެކުލަވާލާފައިވާ މިއެކްޝަން ޕްލޭނަކީ 5 އަހަރު ދުވަހުގެ މުއްދަތަކަށް 2024 އިން 2028ގެ ނިޔަލަށް ތަންފީޒުކުރުމަށް ހަމަޖެހިފައިވާ ސްޓްރެޓެޖިކް އެކްޝަން ޕްލޭނެކެވެ. މިޕްލޭންގެ ދަށުން 5 ދާއިރާއަކުން 3 ދަރަޖައެއްގައި ކުޑަކުދިންގެ ރައްކާތެރިކަން ކަށަވަރުކުރުމަށް މަސައްކަތްކުރުމަށްވަނީ ހަމަޖެހިފައެވެ. އެއީ ގެއާއި ސްކޫލް މާޙައުލާއި، މުޖުތަމަޢާއި އޮންލައިން މަންސަތަކާއި، ކަމާބެހޭ އެކި މުއައްސަސާތަކުގެ ދަރަޖައެވެ. މިއެކްޝަން ޕްލޭންގެ ދަށުން ކޮންމެ ކުއްޖަކީ ރައްކާތެރި މާހައުލެއްގައި އަނިޔާއިން ސަލާމަތްވެފައިވާ ގެއެއްގައި ބޮޑުވުމުގެ ފުރުސަތު ލިބިގެންވާ ކުއްޖެއްކަން ކަށަވަރުކުރުމަށް މަސައްކަތްކުރާނެއެވެ.

މިއެކްޝަން ޕްލޭންގެ ދަށުން އަނިޔާއަށް ނުވަތަ ނުރައްކަލަށް ހުށައެޅޭ ކުދިންނަށް އެހީތެރިކަން ފޯރުކޮށްދިނުމުގެ ސީދާ ގޮތްތަކެއް ކަނޑައެޅި ހުރިހާ އިދާރާއަކުން އެއްގޮތެއްގައި މަސައްކަތްކުރުމުގެ ނިޒާމެއް ޤާއިމުކުރުމަށްވަނީ ހަމަޖެހިފައެވެ. އަދި ކުދިންނަށް ރައްކާތެރި މާހައުލެއް ހޯދައިދިނުމަށް ބެލެނިވެރިން ހޭލުންތެރިކުރުވާ، އާއިލާ ތެރެއިން އަނިޔާއަށް ހުށައެޅޭ ކުދިން ސަލާމަތްކުރުމުގެ މަގުތައް ދަސްކޮށްދިނުމުގެ ކަންކަން ކުރިއަށްގެންދިޔުމަށްވަނީ ހަމަޖެހިފައެވެ. ހަމައެއާއެކު ސްކޫލް މާހައުލުގައި ގަނާގެ ޝިކާރައަކަށްވާ ކުދިންނަށް ކުރިމަތިވާ ހާލަތްތަކުން އަރައިގަތުމަށް ދިރާސީ ހޯދުންތަކުގެ އަލީގައި މަސައްކަތް ކުރުމަށްވެސް ވަނީ ހަމަޖެހިފައެވެ.

މިރަސްމިއްޔާތުގައި ވާހަކަފުޅުދައްކަވަމުން އިޖުތިމާޢީ އަދި އާއިލީ ތަރައްޤީއާ ބެހޭ ވަޒީރު ޑރ.ޢައިޝަތު ޝިހާމްވަނީ ކުޑަކުދިން ހިމާޔަތްކުރުމަށް ރާއްޖެއިން ހޯދާފައިވާ ކާމިޔާބީތައް ފާހަގަކުރައްވާފައެވެ. އެހެންނަމަވެސް ތަހުޒީބު ވެއްޓަކުން ފެންނަން ނުޖެހޭ ކަމެއްގެ ގޮތުގައި ކުޑަކުދިންނަށް އަނިޔާކުރުން ހިމެނޭއިރު އެފަދަ ކަންކަން މިއަދު ފެންނަމުންދާތީ އެކަންކަމާއި ދެކޮޅަށް އަދިވެސް ހަރުދަނާ އުސޫލުތަކާއެކު ގުޅިގެން މަސައްކަތް ކުރަންޖެހޭކަން ވަޒީރު ފާހަގަކުރެއްވިއެވެ.

"ރައީސް ޑރ.މުޢިއްޒު ޚާއްސަ އަހަންމިއްޔަތު ކަމެއް ދެއްވާ ކުޑަކުދިންނަށް ކުރެވޭ އަނިޔާއިން ސަލާމަތްވެފައިވާ މުޖުތަމަޢަކަށް ހެދުމަށް. އެހެންކަމުން ސަރުކާރުގެ ސިޔާސަތުގެ ދަށުން ކުދިންނަށް ކުރެވޭ އަނިޔާއިން ސަލާމަތްވުމަށް ދުރާލާ މަސައްކަތް ކުރުމުގެ ޤައުމީ އެކްޝަން ޕްލޭނެއް މިޤާއިމުކުރެވުނީ މިކަމުގައި މުޖުތަމަޢުގެ ހުރިހާ ފަރާތެއް ގުޅިގެން މަސައްކަތް ކުރަންޖެހޭތީ." ވަޒީރު ވިދާޅުވިއެވެ.

އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ.ޢައިޝަތު ޝިހާމްގެ ވާހަކަފުޅުގައިވަނީ ފަލަސްޠީނުގައި ހާލުގައި ޖެހިފައިވާ ކުޑަކުދިންގެ ހާލަތަށްވެސް އަލިއަޅުއްވާލައްވާފައެވެ. މިއީ މިޖީލުގައި ހިންގަމުންދާ އެންމެ އިންސާނިއްޔަތާއި ޚިލާފު ޖަރީމާއެއްގެ ގޮތުގައި އެކަން ސިފަކުރައްވާ ޖީލެއްގެ ކުދިން ދިރިހުރުމާއި އަސާސީ ހައްގުތަކުން މަހުރޫމްކޮށްފައިވާކަން ވަޒީރުވަނީ ފާހަގަކުރައްވާފައެވެ.

"ވަގުތީ ހިޔާވަހިތަކަށާއި، ސްކޫލްތަކާއި ހޮސްޕިޓަލްތަކަށް އެއްވެސް އިމެއް ނެތި ހަމަލާ ދޭދިނުން އަދި އެކަމުގައި އެކި ބަހަނާތައް ދައްކަމުން އެއީ ބަލައިގަނެވޭކަމެއްގެ ގޮތުގައި ދެއްކުމަށް މަސައްކަތްކުރުން ކުށްވެރިކުރަން. އަދި އެއްފަރާތެއްގައި މިމަންޒަރު ބަލަން ތިބެންޖެހުމަކީވެސް މިޖީލު ދެކެންޖެހިފައިވާ ހިތްދަތިކަމެއް." ވަޒީރު ވިދާޅުވިއެވެ.

ކުޑަކުދިންގެ ހައްގުތައް ކަށަވަރުކޮށް، އަނިޔާ ލިބިފައިވާ ކުދިންނަށް ރައްކާތެރިކަން ފޯރުކޮށްދިނުމަށް އެކުލަވާލާފައިވާ ޤައުމީ އެކްޝަން ޕްލޭން އިފްތިތާޙްކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދެވެ. މިރަސްމިއްޔާތުގައި ސަރުކާރުގެ ވަޒީރުންނާއި، ޔުނިސެފުން ރާއްޖެއަށް ކަނޑައަޅުއްވާފައި ހުންނަވާ ކަންޓްރީ ރެޕްރެޒެންޓެޓިވްއާއި، ކުޑަކުދިންގެ ހައްގުތަކަށް މަސައްކަތްކުރާ ސަރުކާރުގެ އެކި އިދާރާތަކާއި އެކި ޖަމްޢިއްޔާތަކުންވަނީ ބައިވެރިވެފައެވެ.