ޤަވާއިދާ ޚިލާފުވެގެން އެވިޑް ކޮލެޖަށް އެޅި ފިޔަވަޅު އުވާލައިފި

ޤަވާއިދާ ޚިލާފުވުމުން އެވިޑް ކޮލެޖާމެދު މޯލްޑިވްސް ކޮލިފިކޭޝަން އޮތޯރިޓީ، އެމްކިޔުއޭއިން އެޅި ފިޔަވަޅު އުވާލައިފިއެވެ.

އެމްކިޔުއޭއިން އެވިޑު ކޮލެޖަށް ފިޔަވަޅު އެޅީ މިދިޔަ މަހުގެ ފަހުކޮޅުގައެވެ. އެގޮތުން، އެވިޑް ކޮލެޖަށް ފިޔަވަޅު އަޅަން ނިންމީ ލެކްޗަރާއިންނަށް ދޭން ޖެހޭ މުސާރަ ނުދީގެން ދަރިވަރުންގެ އިމްތިހާން ކަރުދާސްތައް ބައެއް ލެކްޗަރާއިން މާކް ނުކުރުމުގެ ސަބަބުން ކަމަށް އެމްކިޔުއޭއިން ވިދާޅުވެއެވެ.

މީގެ ސަބަބުން ޕްރޮގްރާމްގެ މުއްދަތު އިތުރުވެ، އެ މުއްދަތަށް ދަރިވަރުންނަށް އިތުރަށް ފައިސާ ދައްކަން ޖެހުމުގެ ޝަކުވާ ހިމެނޭކަންވެސް އެމްކިޔުއޭއިން ފާހަގަކުރައްވައެވެ. އެ ޝަކުވާއާ ގުޅިގެން އެމްކިއުއޭއިން އެވިޑް ކޮލެޖުގެ 7 ޕްރޮގްރާމެއްގެ ރެންޑަމް ބެޗް އޮޑިޓެއް ކުރިއަށް ގެންދިއުމުން ޕްރޮގްރާމް އެކްރެޑިޓޭޝަން ޤަވާއިދާ ގައިޑްލައިނާ ޚިލާފު ގިނަ ކަންތައްތަކެއް ކޮށްފައިވާކަން ވަނީ ފާހަގަކޮށްފައެވެ.

މިކަންކަމާ ބެހޭ މައުލޫމާތު އެމްކިއުއޭއިން ވަނީ މެއި މަހުގެ 5 ވަނަ ދުވަހު އެވިޑް ކޮލެޖުގެ މެނޭޖްމަންޓާ ބައްދަލުކޮށް ހިއްސާކޮށްފައެވެ. އަދި 2017 އިން ފެށިގެން އެކި އަހަރު މަތިން އެވިޑް ކޮލެޖަށް އެކި ކަންކަން ރަނގަޅު ކުރުމަށް އެމްކިއުއޭއިން ލިޔުމުން އަންގާފައިވާތީ، އެމްކިއުއޭއިން ނިންމީ ގައުމީ ސަނަދުތަކުގެ އޮނިގަނޑާއި ޕްރޮގްރާމް އެކްރެޑިޓޭޝަނާ ޚިލާފަށް ހިންގާ ކަންކަން ރަނގަޅު ކުރުމަށް އެކޮލެޖަށް އެންގުމަށެވެ. އަދި އިތުރު ޕްރޮގްރާމްތަކަށް އެކްރެޑިޓޭޝަނާއި ހިންގުމުގެ ހުއްދަ ނުދިނުމަށް ވެސް އެއޮތޯރިޓީން ވަނީ ނިންމާފައެވެ.

އެމްކިޔުއޭއިން ނެރުނު ބަޔާނެއްގައި ވިދާޅުވީ ފިޔަވަޅުތައް މުރާޖައާކުރުމަށް އެވިޑް ކޮލެޖާއެކު މި މަހުގެ 18 ވަނަ ދުވަހު މަޝްވަރާކޮށްފައިވާ ކަމަށެވެ. އަދި މި މަހުގެ 22 ވަނަ ދުވަހު އެމްކިޔުއޭގެ ޓީމުން އެ ކޮލެޖަށް ޒިޔާރަތްކޮށް ކުރިން ފާހަގަކުރެވުނު ކަންކަން މިހާރު ރަނގަޅުކޮށްފައިވާކަމަށް އެ އިދާރާއިން ވިދާޅުވެއެވެ.

ގަވާއިދާ ޚިލާފުވުމުގެ ސަބަބުން އެވިޑް ކޮލެޖާއެކު ކްލިކް ކޮލެޖަށްވެސް އެމްކިޔުއޭއިން ވަނީ ފިޔަވަޅު އަޅާފައެވެ.