ކާބޯތަކެތީގެ ރައްކާތެރިކަން ކަށަވަރުކުރުމަށް ބޭނުންވާ ލެބޯޓަރީގެ މަސައްކަތް ވަރަށް އަވަހަށް ފެށޭނެ: ޑރ.ޚަލީލް

ކާބޯތަކެތީގެ ރައްކާތެރިކަން ކަށަވަރުކުރުމަށް ބޭނުންވާ އެންމެ މަތީ ފެންވަރުގެ ހެލްތު ލެބޯޓަރީއެއް މިދައުރުގެ ތެރޭގައި ޤާއިމުކުރައްވާނެކަމަށް ސިއްޙަތާބެހޭ ވަޒީރު ޑރ.ޢަބްދުﷲ ޚަލީލް ވިދާޅުވެއްޖެއެވެ.

ސިއްޙަތާބެހޭ ވަޒީރު ޑރ.ޢަބްދުﷲ ޚަލީލް ވިދާޅުވީ، ހެލްތު ލެބޯޓަރީ ތަރައްޤީކުރުމަށް ބޭނުންވާ ބިން މިހާރު ހަމަޖެހި ސިއްޙަތާ ބެހޭ ވުޒާރާއާއި ޙަވާލުކޮށްފައިވާކަމަށެވެ.

ރާއްޖޭގައި ކާބޯތަކެތީގެ ރައްކާތެރިކަން ކަށަވަރުކުރުމަށް އެކަށީގެންވާ ގޮތުގައި މަސައްކަތް މީގެކުރިން ކުރެވިފައެއް ނުވެއެވެ. އޭގެ ގިނަ ސަބަބުތަކެއް ހުރިއިރު މައިގަނޑު އެއް ދައްޗަކަށްވެފައިވަނީ އެމަސައްކަތް ކުރަން ބޭނުންވާ ޖާގަ ދެވޭނެ ލެބޯޓަރީއެއް ނެތުމުގެ މައްސަލައެވެ. އެހެންނަމަވެސް އަލަށް ތަންފީޒުކުރަން ފަށާ ކާބޯތަކެތީގެ ރައްކާތެރިކަމުގެ ޤާނޫނާއެކު ކާބޯތަކެއްޗާއި ގުޅުންހުރި ހުރިހާ ޓެސްޓުތަކަކާއި ތަހުލީލުތައް ކުރެވޭނެ މަގު ފަހިކުރެވޭނެ ފުރިހަމަ ލެބޯޓަރީއެއް ޤާއިމުކުރުމަށް ސިއްޙަތާބެހޭ ވުޒާރާގެ މައްޗަށް ލާޒިމްކުރެއެވެ.

ސިއްޙަތާބެހޭ ޤާނޫނާއެކު އަންނާނެ ބަދަލުތަކުގެ މަޢުލޫމާތު ހިއްސާކުރައްވަމުން ސިއްޙަތާބެހޭ ވަޒީރު ޑރ.ޢަބްދުﷲ ޚަލީލް ވިދާޅުވީ މިޤާނޫނާއެކު ކާބޯތަކެއްޗާއި ބޭހާއި އަދި އެނޫންވެސް ޢާއްމު ސިއްޙަތާއި ގުޅުންހުރި ކަންކަމުގެ ތަހުލީލުތައް ހެދޭނެ ޚާއްސަ އިންތިޒާމުތަކާއެކު، އެކަމަށް ބޭނުންވާ ލެބޯޓަރީއެއް ޤާއިމުކުރުމުގެ މަސައްކަތް ކުރަމުންދާކަމަށެވެ. ވަޒީރު ވިދާޅުވީ މިލެބޯޓަރީ ޤާއިމުކުރުމުގެ މަސައްކަތް ކުރަމުންދަނީ ހުޅުމާލޭ ފުރަތަމަ ފިޔަވަހީގައިކަމަށެވެ.

"ލެބޯޓަރީ ޑިޒައިންކުރުމަށް ބަޔަކާއި ޙަވާލުކުރުމުގެ މަސައްކަތް ވަރަށް އަވަހަށް ކުރެވޭނެ. އެކަމަށް ބޭނުންވާ ބިންވެސް މިހާރުވަނީ އަޅުގަނޑުމެނަށް ދެއްވާފައި. ކާނާގެ ރައްކާތެރިކަން ކަށަވަރުކުރުމަށް އަދި ބޭހާއި އެނޫންވެސް ޢާއްމު ސިއްޙަތާއި ގުޅުންހުރި ޓެސްޓުތައް އެންމެ މަތީ ފެންވަރުގައި ހެދޭނެ ލެބޯޓަރީއެއް މިދައުރުގައި ޤާއިމުކުރެވިގެންދާނެ." ވަޒީރު ވިދާޅުވިއެވެ.

ކާބޯތަކެތީގެ ރައްކާތެރިކަމުގެ ޤާނޫނުގެ ދަށުން، ޤާއިމުކުރުމަށް ލާޒިމްކުރާ ލެބޯޓަރީން ރާއްޖެއަށް އިމްޕޯޓްކުރާ ނުވަތަ ރާއްޖެއިން އެކްސްޕޯޓްކުރާ ކާބޯތަކެއްޗާއި ރާއްޖޭގައި އުފައްދާ ކާބޯތަކެތި ޓެސްޓު ކުރެވޭނެ އިންތިޒާމު ޤާއިމުކުރަންޖެހެއެވެ. ހަމައެއާއެކު ކާބޯތަކެތި އުފައްދާ އަދި ބަންދުކުރާ ތަންތަނާއި ގުދަންކުރާ ތަންތަނާއި ރައްކާކުރާ ތަންތަނުގެ އިތުރުން ކާބޯތަކެތި ވިއްކާ ތަންތަނުގެ ސިއްޙީ ރައްކާތެރިކަން ބެލުމަށް ކުރަންޖެހޭ ތަޙުލީލުތައް ކުރެވޭނެ އިންތިޒާމުވެސް މިލެބޯޓަރީގައި ހުންނަންޖެހޭނެއެވެ.

މޯލްޑިވްސް ފުޑް އެންޑް ޑްރަގް އޮތޯރިޓީގެ ބެލުމުގެ ދަށުން ހިނގަންޖެހޭ މި ލެބޯޓަރީން ކުރާ ތަހުލީލުތަކާއި ހިފަހައްޓަންޖެހޭ ފެންވަރާއި މިންގަނޑު ޤަވާއިދަކުން އެނގެން އޮންނަންޖެހޭނެކަމަށް ޤާނޫނުގައި ވަނީ ބަޔާންކޮށްފައެވެ. އަދި ރާއްޖޭގައި ޤާއިމުކުރާ ލެބޯޓަރީގައި ހެދެން ނުހުންނަ ޓެސްޓުތައް ހެދުމުގެ އިންތިޒާމު ރާއްޖޭގެ އެހެން ލެބޯޓަރީއަކުން ނުވަތަ ރާއްޖެއިން ބޭރުގެ ރިފަރަލް ލެބޯޓަރީތަކުން ހެދޭނެ އިންތިޒާމު ހަމަޖެއްސުމަށްޓަކައި ބޭނުންވާނެ އުސޫލުތަކާއި ގަވާއިދުތައް ހެދުމަށް ޤާނޫނުން ވަނީ މޯލްޑިވްސް ފުޑް އެންޑް ޑްރަގް އޮތޯރިޓީއަށް މަތިކޮށްފައެވެ.

މިހާރު ރާއްޖެއަށް އެތެރެކުރާ ކާބޯތަކެތި ޓެސްޓުކުރެވެނީ ކަނޑުމަގުން އެތެރެކުރެވޭ ކާބޯތަކެތި އެމްޕީއެލްގެ ޕޯޓު ސަރަޙައްދުގައާއި އެއަރފްރައިޓްކޮށް އެތެރެކުރާ ކާބޯތަކެތި، ވެލާނާ އިންޓަރނޭޝަނަލް އެއަރޕޯޓުގައި ޤާއިމުކޮށްފައި ހުންނަ ތަންތަނުގައެވެ. އަދި ސައިންޓިފިކް ސާމްޕަލްތައް ނަގައިގެން ހަދަންޖެހޭ ބައެއް ތަހުލީލުތައް އެމްއެފްޑީއޭގައި މިވަގުތު ހުރި ލެބޯޓަރީގައި ހަދަމުންދާއިރު އިތުރު ޓެސްޓުތައް ހެދުމަށް ރާއްޖެއިން ބޭރަށްވެސް ފޮނުވާކަން ސިއްޙަތާބެހޭ ވުޒާރާއިން ފާހަގަކުރައްވައެވެ.