ކ. ތުލުސްދޫގައި މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕް 2024 ގެ މެންސް އޯޕަން ބައިގެ ތިންވަނަ ބުރުގައި ވާދަކޮށް، ރާއްޖޭގެ އަޙްމަދު އާގިލް (އައްމަޑޭ) އާއި، އިސްމާޢީލް ރަޝީދު (ސްމައިލީ) އާއި، ހޫދު އަޙްމަދު އަދި އިސްމާޢީލް މިގުލާލް ހަތަރުވަނަ ބުރުން ޖާގަ ހޯދައިފިއެވެ.
މެންސް އޯޕަން ބައިގެ ތިންވަނަ ބުރުގެ ހީޓުތައް މިއަދު ކުރިއަށްދިޔައިރު، ރާއްޖޭގެ ސީނިއާ ޓީމުގެ ކެޕްޓަން އައްމަޑޭ ވާދަކޮށްފައިވަނީ ހީޓު ދޭއްގައެވެ. މި ހީޓުގެ ދެވަނައަށް އައްމަޑޭ ދިޔައިރު، އޭނާ ވަނީ 11.50 ސްކޯ ކޮށްފައެވެ. މި ބައިގެ ހީޓު ތިނެއްގައި ރާއްޖޭގެ ބީ ޓީމުގައި ހިމެނޭ ސްމައިލީ ވާދަކުރިއިރު، އޭނާވެސް ދިޔައީ ހީޓުގެ ދެވަނައަށެވެ. އެގޮތުން މި ހީޓުގައި ސްމައިލީ ވަނީ 8.07 ގެ ސްކޯއެއް ހަދާފައެވެ.
ތިންވަނަ ބުރުގެ ހީޓު ފަހެއްގައި ރާއްޖޭގެ ބީ ޓީމުގެ އަޙްމަދު ހިޝާމް ޝަހީމް ވާދަކުރިއިރު، އޭނާ ދިޔައީ ހީޓުގެ ހަތަރުވަނައަށެވެ. އެގޮތުން މި ހީޓުގައި ހިޝާމަށް ސްކޯ ކުރެވުނީ 7.96 އެވެ. މީގެ އިތުރުން ހީޓު ހަތެއްގައި ވާދަކުރި ރާއްޖޭގެ ބީ ޓީމުގެ ހަސަން ނާސިހަށް ލިބުނީ ހަތަރުވަނައެވެ. އެގޮތުން މި ހީޓުގައި އޭނާއަށް ސްކޯ ކުރެވުނީ ހަ ޕޮއިންޓެވެ.
ތިންވަނަ ބުރުގެ ހީޓު 10 ގެ އެއްވަނަ ރާއްޖޭގެ ސީނިއާ ޓީމުގެ ހޫދު ހޯދާފައިވަނީ 13.16 ގެ ސްކޯއަކާއެކުއެވެ. އަދި ހީޓު 11 ގެ އެއްވަނަ ސީނިއާ ޓީމުގެ މިގުލާލް ހޯދިއިރު، އޭނާ ވަނީ 9.17 ސްކޯ ކޮށްފައެވެ.
މި ފަހަރުގެ މުބާރާތުގައި 20 ގައުމަކުން 100 އަށްވުރެ ގިނަ އެތުލީޓުން ބައިވެރިވެފައިވާއިރު، އޭގެ ތެރޭގައި ރާއްޖޭގެ ދެ ޓީމުވެސް ހިމެނެއެވެ. ރާއްޖޭގެ ދެވަނަ ޓީމަަަށް ނަން ދެވިފައިވަނީ، ތުލުސްދޫ ޓީމުގެ ނަމުންނެވެ. ރާއްޖޭގެ ސާފިން މެންސް އޭ ޓީމާއި ޖޫނިއާ އޭ ޓީމު ވާދަކުރަމުން އަންނަނީ 2026 ވަނަ އަހަރުގެ އޭޝިއަން ގޭމްސް ކޮލިފައިން ބުރުގައެވެ.