އުތުރުގެ އަތޮޅުތަކަށް ކުރަމުންދާ ވިއްސާރައިގަ ބޯކޮށް ވާރޭވެހި ކުޅުދުއްފުށި ސިޓީގައި ފެންބޮޑުވެއްޖެ

ރާއްޖޭގެ އުތުރަށް މިހާރުކުރަމުންދާ ވިއްސާރައިގައި ބޯކޮށް ވާރޭވެހި ފެންބޮޑުވުމުގެ ސަބަބުން ކުޅުދުއްފުށި ސިޓީގެ 3 ގޭބިސީއަކުން މީހުން ވަގުތީ ބޯހިޔާވަހިތަކަށް ބަދަލުކޮށްފައިވާކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ވިދާޅުވެއްޖެއެވެ.

ކުޅުދުއްފުށީގެ އިތުރުން އުތުރުގެ ބައެއް ރަށްރަށް ބޯކޮށް ވާރޭވެހި ފެންބޮޑުވުމުގެ ޙާދިސާތަކެއް ރިޕޯޓުކުރަމުންދާކަން އެއޮތޯރިޓީން ފާހަގަކުރައްވައެވެ.

ރާއްޖެއަށް ކުރަމުންދާ ހުޅަނގު މޫސުމުގެ ވިއްސާރައިގައި މިރޭ އުތުރުގެ ރަށްތަކަށް ބޯކޮށްވާ ރޭވެހޭނެކަމަށް ލަފާކޮށް މޫސުމާ ބެހޭ ޤައުމި އިދާރާއިންވަނީ ހއ.އަތޮޅުން ފެށިގެން ށ.އަތޮޅާ ހަމައަށް އޮރެންޖް އިންޒާރު ނެރެފައެވެ. އެގޮތުން މިރޭ 20:30 އިން ފެށިގެން 22:30 އާއިހަމައަށް އިންޒާރު ނެރެފައިވާއިރު އެގަޑިތަކުގައި އެސަރަޙައްދަށް ބޯކޮށް ވާރޭވެހިގެން ގެއްލުންތަކެއް ލިބިފައިވާކަމުގެ ރިޕޯޓުތަކެއް ލިބިފައިވާކަމަށް އެންޑީއެމްއޭއިން ވަނީ ވިދާޅުވިއެވެ.

މިހާތަނަށް ލިބެމުންދާ މައުލޫމާތުތަކުން ބޯކޮށް ވާރޭވެހުމުގެ ސަބަބުން އެންމެ ބޮޑަށް ގެއްލުންވަމުންދަނީ ކުޅުދުއްފުށި ސިޓިއަށްކަމަށް އެންޑީއެމްއޭއިން ވިދާޅުވެއެވެ.

ކުޅުދުއްފުށި ސިޓީ ކައުންސިލުން ވިދާޅުވީ ބޯކޮށް ވާރޭވެހި ފެންބޮޑުވުމާ ގުޅިގެން 6 ގެއަކަށް ފެންވަދެގެން އެގެތަކުން ވަގުތީ ބޯހިޔާވަހިކަމަށް އެދިފައިވާކަމަށާއި މިހާތަނަށް 3 ގެއަކުން މީހުން ބަދަލުކޮށްފައިވާކަމަށެވެ.

ކުޅުދުއްފުށި ސިޓީއަށް ވެހުނު ވާރޭގައި މިހާތަނަށް 100 ގެއަކަށް ފެންވަދެގެން ރިޕޯޓުކޮށްފައިވާއިރު 50 އިންސައްތަ ގޭބިސީއަށް އެކި މިންވަރަށް ފެނުގެ އަސަރު ކޮށްފައިވާކަން ސިޓީ ކައުންސިލުން ފާހަގަކުރެއެވެ.

މީގެއިތުރުން ބޯކޮށް ވާރޭވެހި އުތުރުގެ 3 އަތޮޅުގެ ބައެއް ރަށްތަކުގައިވެސް ފެން ބޮޑުވުމުގެ ޙާދިސަތައް ރިޕޯޓުކުރަމުންދާކަން އެންޑީއެމްއޭއިން ފާހަގަކުރައްވައެވެ.

އެގޮތުން ހއ.ހޯރަފުއްޓާއި ށ.ފީވަކާއި ނޫމަރާއިންވެސް ގެތަކަށް ފެންވަދެގެން ރިޕޯޓުކޮށްފައިވާކަމަށް އެންޑީއެމްއޭއިން ވިދާޅުވެއެވެ. އޭގެތެރޭގައި ހޯރަފުށީގެ 2 ގެއަކާއި، ނޫމަރާގެ 5 ގެއަކާއި، ފޭވަކުންވެސް 5 ގެއަކަށް ފެންވަދެގެންވަނީ ރިޕޯޓުކޮށްފައެވެ.

މޫސުމާ ބެހޭ ޤައުމީ އިދާރާއިން ވިދާޅުވީ މިވަގުތުވެސް އުތުރުގެ ރަށްތަކަށް ވާރޭ ވެހެމުންދާކަމަށާއި ބޮޑަށް ލަފާކުރެވެނީ މިރޭގެ ކުރިއަށް އޮތް ގަޑިތަކުގައިވެސް ތުނިކޮށް އެސަރަޙައްދަށް ވާރޭ ވެހެމުންދާނެކަމަށެވެ. އަދި ވިއްސާރަ ރަނގަޅުވާނެކަމަށް ބެލެވެނީ ބުދަ ދުވަހުގެ މެންދުރު ފަހުކަމަށް މޫސުމާ ބެހޭ ޤައުމީ އިދާރާއިން ވިދާޅުވެއެވެ.